[1] Yok-sû-â seu-si̍p Lî-phien, Kâ-tet, lâu tûng Mâ-nâ-sî kî-chhu̍k ke ngìn lòi,
[2] tui kì-têu kóng: “Ngì-têu yí-kîn vàn-sṳ̀n Song-chú ke phu̍k-ngìn Mô-sî só min-lin ngì-têu cho ke tak-khien sṳ, ya thâng-chhiùng ngài só-yû ke fûn-fu.
[3] Chhṳ̍t-to kîm-pû-ngit, ngì-têu m̀-sṳt lì-khôi ngì-têu ke Yî-set-lie̍t thùng-pâu; ngì-têu ngin-chṳ̂n chûn-sú Song-chú — ngì-têu Song-ti ke min-lin.
[4] Liá-ha, Song-chú — ngì-têu ke Song-ti yí-kîn cheu Kì ke yin-hí, sṳ́ ngì-têu ke Yî-set-lie̍t thùng-pâu ôn-kî. Só-yî, ngì-têu cho-tet chón vuk-hâ, chón-to ngì-têu só tet-tó ke thú-thi, chhiu-he Song-chú ke phu̍k-ngìn Mô-sî pûn ngì-têu ke-te chhai Yok-tan-hò tûng-phién ke thú-thi.
[5] Chúng-he ngì-têu oi khok-sṳ̍t chûn-sú Song-chú ke phu̍k-ngìn Mô-sî kâu-pûn ngì-têu ke fap-li̍t kie-min: Kin-oi Song-chú — ngì-têu ke Song-ti, chûn-hàng Kì ke tho, fu̍k-chhiùng Kì ke kie-min, tui Kì chûng-sîm, chhiòn-sîm chhiòn-yi sṳ-fung Kì.”
[6] Só-yî Yok-sû-â chuk-fuk kì-têu, sung kì-têu chón vuk-hâ, kì yu kóng: “Ngì-têu oi tai-tén chhin-tô thèu-sâng, kîm, ngiùn, thùng, thiet, lâu sâm-fu, fûng-fûng fu-fu chón-hi. Oi lâu ngì-têu ke thùng-pâu fûn-hióng tui thi̍t-ngìn chhióng-lòi ke chan-li-phín.” Án-ngiòng kì-têu chhiu chón vuk-hâ hi lé. Mô-sî yí-kîn chiông Yok-tan-hò tûng-phién, Pâ-sân ke yit phu-fun thú-thi pûn Mâ-nâ-sî pan kî-chhu̍k; Yok-sû-â chiông Yok-tan-hò sî-phién ke thú-thi pûn Mâ-nâ-sî nang-ngoi yit-pan kî-chhu̍k lâu khì-thâ kî-chhu̍k.
[9] Só-yî Lî-phien, Kâ-tet, lâu tûng Mâ-nâ-sî kî-chhu̍k ke ngìn chón vuk-hâ hi. Kì-têu chhai Kâ-nàm-thi ke Sṳ-lò lì-khôi khì-thâ ke Yî-set-lie̍t-ngìn, hiong kì-têu chhṳ-kâ ke thú-thi Kî-lie̍t chhut-fat, chhiu-he kì-têu cheu Song-chú thûng-ko Mô-sî min-lin kì-têu hi cham-liâng ke thú-thi.
[10] Lî-phien, Kâ-tet, lâu tûng Mâ-nâ-sî kî-chhu̍k ke ngìn lòi-to Kî-li-liu̍k, chhiu-he Yok-tan-hò sî-phién. Kì-têu chhai hò-pa sùn hí yit-chho kô-thai ke chi-thàn.
[11] Yû-ngìn lâu Yî-set-lie̍t khì-thâ kî-chhu̍k ke ngìn kóng: “Khon nâ, Lî-phien, Kâ-tet, lâu tûng Mâ-nâ-sî kî-chhu̍k ke ngìn chhai Kî-li-liu̍k, chhiu-he chhai Yok-tan-hò ngài-têu liá-phién hí yit-chho chi-thàn!”
[12] Yî-set-lie̍t-ngìn yit thâng-tó liá sêu-sit, chhiòn fi-chung tû chhi-si̍p to Sṳ-lò, oi hi kûng-tá tûng-phién ke-têu kî-chhu̍k.
[13] Yî-set-lie̍t-ngìn phai chi-sṳ̂ Yî-li-â-sat ke lai-é Fî-nì-ha̍p, to Kî-lie̍t-thi hi kien Lî-phien, Kâ-tet, lâu tûng Mâ-nâ-sî kî-chhu̍k ke ngìn;
[14] yû sṳ̍p-ke Yî-set-lie̍t liâng-chhiu lâu Fî-nì-ha̍p khiung-ha hi. Kì-têu tak-sà thoi-péu chhai Yok-tan-hò sî-phién ôn-kî ke yit-ke kî-chhu̍k, chhiòn-phu he chûng-chhu̍k ke chhu̍k-chóng.
[15] Kì-têu lòi-to Kî-lie̍t-thi, khon-tó Lî-phien, Kâ-tet, lâu tûng Mâ-nâ-sî kî-chhu̍k ke ngìn-mìn,
[16] chhiu thoi-péu Song-chú ke chhiòn fi-chung tui kì-têu kóng: “Ngì-têu cho-má-ke cho liá fái-sṳ mo-fam Yî-set-lie̍t ke Song-ti nè? Ngì-têu vi chhṳ-kâ hí liá chi-thàn, phoi-ngia̍k Song-chú! Ngì-têu liá-ha mò-oi chai thâng-chhiùng Kì he-mò?
[17] Ngì-têu hàn ki-tet ngài-têu chhai Phî-ngí fam ke chhui mò? Ke-sṳ̀, Song-chú yung pot-vûn chit-fa̍t chhṳ-kâ ke chṳ́-mìn. Ngài-têu to liá-ha hàn-he vi ke-khien sṳ su-khú. Kám-kóng ke chhui hàn m̀-la he-mò?
[18] Ngì-têu liá-ha oi khî-chhie̍t Kì, m̀ thèn Kì he-mò? Kîm-pû-ngit ngì-têu phoi-ngia̍k Song-chú, thiên-kông-ngit Kì chhiu voi tui Yî-set-lie̍t chhiòn fi-chung fat-khién.
[19] Na-he ngì-têu ke thú-thi mò chhiang-li, mò sṳt-ha̍p kin-pai Song-chú, án-ngiòng, ko liá-phién lòi, to Song-chú ke sṳn-chong-phùng thìn-liù ke thi-fông lòi hiong ngài-têu thó-têu thú-thi. Ngì-têu cho-m̀-tet phoi-ngia̍k Song-chú, ya cho-m̀-tet tet-chhui ngài-têu. Cho-m̀-tet chhai Song-chú — ngài-têu Song-ti ke chi-thàn yî-ngoi nang-ngoi vi chhṳ-kâ hí chi-thàn.
[20] Ngì-têu oi ki-tet Chhia-lâ ke chṳ́-sûn Â-kôn ke sṳ-khien. Kì m̀ chûn-chhiùng min-lin, mò fí-me̍t yin-kôi fí-me̍t ke chan-li-phín, Yî-set-lie̍t chhiòn fi-chung kám m̀-he vi-tó liá-khien sṳ su chit-fa̍t? Â-kôn fam-chhui, lièn-lui phe̍t-ngìn lâu kì khiung-ha sí!”
[21] Lî-phien, Kâ-tet, lâu tûng Mâ-nâ-sî kî-chhu̍k ke ngìn, fì-tap he̍t chhai sî-phién kî-chhu̍k ke-têu chhu̍k-chóng kóng:
[22] “Song-ti he Thai-nèn Chá! Kì he Song-chú! Song-ti he Thai-nèn Chá! Kì he Song-chú! Kì tî ngài-têu cho-má-ke án-ngiòng cho; ngài-têu ya oi Yî-set-lie̍t-ngìn tî. Na-he ngài-têu phoi-ngia̍k Song-chú, tui Kì mò chûng-sîm, ngì-têu kîm-pû-ngit chhiu pûn ngài-têu sí!
[23] Na-he ngài-têu m̀ chûn-chhiùng Song-chú, fán-chón vi chhṳ-kâ hí chi-thàn, chhai táng-kô hien sêu-fa-chi, su-chi, ya-he phìn-ôn-chi, ngien Song-chú chhîn-chhṳ chit-fa̍t ngài-têu!
[24] Sṳ-sṳ̍t m̀-he án-ngiòng. Ngài-têu án-ngiòng cho he yîn-vi kiâng chiông-lòi ngì-têu ke chṳ́-sûn voi tui ngài-têu ke chṳ́-sûn kóng: ‘Ngì-têu lâu Song-chú — Yî-set-lie̍t ke Song-ti yû má-ke koân-he?
[25] Song-chú yung Yok-tan-hò cho ngài-têu lâu ngì-têu Lî-phien, Kâ-tet-ngìn chûng-kiên ke kie-han; ngì-têu chhiu lâu Song-chú mò koân-he.’ Ke-sṳ̀, ngì-têu ke chṳ́-sûn kiâng-pha voi kim-chṳ́ ngài-têu ke chṳ́-sûn hi kin-pai Song-chú.
[26] “Só-yî ngài-têu hí yit-chho chi-thàn, m̀-he oi hien sêu-fa-chi ya-he phe̍t ke sên-ngì,
[27] he oi chhai ngì lâu ngài chûng-kiên, lâu sṳ-sṳ thoi-thoi, cho chṳn-kí, chṳn-mìn ngài-têu khok-sṳ̍t he chhai Song-chú ke sṳn-chong-phùng ke-vi hien sêu-fa-chi, phe̍t ke sên-ngì, lâu phìn-ôn-chi. Liá he oi chṳn-mìn ngài-têu he kin-pai Kì ke, miên-tet chiông-lòi ngì-têu ke chṳ́-sûn kóng, ngài-têu ke chṳ́-sûn lâu Song-chú mò koân-he.
[28] Liá chhiu-he ngài-têu ke chú-chông. Na-he chiông-lòi chṳ̂n-sṳ̍t fat-sên liá-sṳ, ngài-têu ke chṳ́-sûn chhiu cho-tet kóng: ‘Khon nâ, ngài-têu ke chú-siên hí yit-chho chi-thàn, lâu Song-chú ke chi-thàn khiung-yong, m̀-he oi hien sêu-fa-chi ya-he phe̍t ke chi-vu̍t, he oi chhai ngì lâu ngài chûng-kiên cho chṳn-kí.’
[29] Ngài-têu chhie̍t-tui m̀-voi phoi-ngia̍k Song-chú; chhù-liáu ke chhai Song-chú — ngài-têu Song-ti ke sṳn-chong-phùng chhièn ke chi-thàn, ngài-têu m̀-voi hí phe̍t ke chi-thàn, hi hien sêu-fa-chi, su-chi, lâu phe̍t ke chi-vu̍t lòi phoi-ngia̍k Kì.”
[30] Chi-sṳ̂ Fî-nì-ha̍p lâu thèn kì khiung-ha ke sṳ̍p-ke liâng-chhiu, chhiu-he he̍t chhai Yok-tan-hò sî-phién Yî-set-lie̍t kok kî-chhu̍k ke-têu chhu̍k-chóng, thâng-tó Lî-phien, Kâ-tet, lâu tûng Mâ-nâ-sî kî-chhu̍k ke ngìn só kóng ke fa, chhiòn-phu tông mân-yi.
[31] Chi-sṳ̂ Yî-li-â-sat ke lai-é Fî-nì-ha̍p tui kì-têu kóng: “Liá-ha ngài-têu tî, Song-chú lâu ngài-têu khiung-ha; ngì-têu pin-mò phoi-ngia̍k Kì. Só-yî, ngì-têu kiu-tó Yî-set-lie̍t-ngìn, sṳ́ kì-têu m̀-voi su Song-chú ke chit-fa̍t.”
[32] Án-ngiòng, chi-sṳ̂ Yî-li-â-sat ke lai-é Fî-nì-ha̍p lâu ke-têu liâng-chhiu lì-khôi Lî-phien-ngìn lâu Kâ-tet-ngìn, tui Kî-lie̍t-thi chón Kâ-nàm-thi, hi hiong Yî-set-lie̍t ngìn-mìn po-ko.
[33] Yî-set-lie̍t ngìn-mìn chhiòn-phu tông mân-yi, yu chan-mî Song-ti. Kì-têu mò chai thì-hí oi hi kûng-tá Lî-phien-ngìn lâu Kâ-tet-ngìn, pho-fái kì-têu he̍t ke thú-thi lé.
[34] Lî-phien-ngìn lâu Kâ-tet-ngìn kóng: “Liá-chho chi-thàn hiong ngài-têu cho chṳn-kí, chṳn-mìn Song-chú he Song-ti.” Só-yî, kì-têu ham liá-chho thàn cho “Chṳn-thàn”.