[1] Yok-sit ke chóng-chṳ́ Mâ-nâ-sî ke heu-thoi pûn-tó Yok-tan-hò sî-phién ke phu-fun thú-thi. Mâ-kit he Mâ-nâ-sî ke chóng-chṳ́, he Kî-lie̍t ke â-pâ, kì chhin voi siông-chhṳ̀, só-yî Yok-tan-hò tûng-phién ke Kî-lie̍t lâu Pâ-sân chhiu kûi-pûn kì.
[2] Yok-tan-hò sî-phién ke thú-thi kûi-pûn khì-thâ ke Mâ-nâ-sî kâ-chhu̍k, chhiu-he Â-pí-yî-chhia, Hî-le̍t, Â-sṳ̂-lie̍t, Sṳ-kiam, Hî-fut lâu Sṳ-mí-thai. Kì-têu he Yok-sit ke lai-é Mâ-nâ-sî tak kâ-chhu̍k ke chhu̍k-chóng.
[3] Sî-lò-fî-ha̍p he Hî-fut ke lai-é, Kî-lie̍t ke sûn-é, Mâ-kit ke chên-sûn, Mâ-nâ-sî ke hièn-sûn; kì mò lai-é, chṳ́-yû moi-é. Kì-têu ke miàng he Mâ-lâ, Nò-â, Hot-lâ, Me̍t-kâ, Tet-sat.
[4] Kì-têu to chi-sṳ̂ Yî-li-â-sat, Nun ke lai-é Yok-sû-â, lâu ke-têu liâng-chhiu mien-chhièn, kóng: “Song-chú fûn-fu Mô-sî pûn ngài-têu yit-fun thú-thi cho sán-ngia̍p, chhiong pûn nàm-ngìn khiung-yong.” Só-yî, cheu Song-chú ke min-lin, kì-têu ya lâu kì-têu ke â-suk â-pak khiung-yong pûn-tó thú-thi.
[5] Mâ-nâ-sî kî-chhu̍k, chhù-liáu Yok-tan-hò tûng-phién ke Kî-lie̍t lâu Pâ-sân yî-ngoi, hàn tet-tó sṳ̍p-fun,
[6] yîn-vi liá kí-ke ńg chṳ́-sûn lâu khì-thâ ke nàm chṳ́-sûn khiung-yong yû pûn-tó thú-thi. Mâ-nâ-sî khì-thâ ke heu-thoi tet-tó Kî-lie̍t.
[7] Mâ-nâ-sî kî-chhu̍k ke thi-kie tui Â-sat chhṳ̍t-to Sṳ-kiam tûng-phién ke Me̍t-mí-thâ, nàm-phién to Yún-Thâ-phû-â-ngìn he̍t ke thi-fông.
[8] Thâ-phû-â chû-vì ke thú-thi su̍k Mâ-nâ-sî, chúng-he chhai piên-kin ke Thâ-phû-â-chṳ́n he su̍k Yî-fap-lièn heu-thoi.
[9] Mâ-nâ-sî kî-chhu̍k ke thi-kie tui ke-vi hiong-nàm to Kâ-nâ-hò. Hò nàm-phién ke sàng-chṳ́n sûi-yèn chhai Mâ-nâ-sî kin-nui, chúng-he su̍k Yî-fap-lièn. Mâ-nâ-sî kî-chhu̍k ke thi-kie sun-tén hò ke pet-phién chhṳ̍t-to Thi-chûng-hói.
[10] Yî-fap-lièn chhai nàm-phién; Mâ-nâ-sî chhai pet-phién; Thi-chûng-hói he kì-têu sî-phién ke thi-kie. Â-sat chhai sî-pet kok; Yî-sat-kâ chhai tûng-pet kok.
[11] Mâ-nâ-sî kî-chhu̍k chhai Yî-sat-kâ lâu Â-sat kin-nui tet-tó Pak-San lâu Yî-pak-lièn, pin fu-khiun ke chhûn-chông, hàn-yû Tô-ngí (chhiu-he chhai hói-sùn ke-sàng), Yún-Tô-ngí, Thâ-na̍p, Mí-kit-tô, lâu liá-têu sàng-chṳ́n fu-khiun ke chhûn-chông.
[12] Chúng-he Mâ-nâ-sî-ngìn mò fap-thu chiông ke-têu sàng-tú ke ngìn-mìn kiuk-chéu, só-yî Kâ-nàm-ngìn hàn-he ki-siu̍k he̍t chhai ke-vi.
[13] Sṳm-chṳ tông Yî-set-lie̍t-ngìn khiòng-chong ke sṳ̀, kì-têu ya-mò chiông só-yû ke Kâ-nàm-ngìn kiuk-chéu, chṳ́-yû khiòng-pet Kâ-nàm-ngìn cho khú-kûng.
[14] Yok-sit ke heu-thoi tui Yok-sû-â kóng: “Cho-má-ke ngì chṳ́-yû pûn yit-fun thú-thi pûn ngài-têu cho sán-ngia̍p nè? Song-chú su-fuk pûn ngài-têu, ngài-têu ke ngìn-su tông-tô â!”
[15] Yok-sû-â kóng: “Na-he ngì-têu ngìn-su tô, hiàm Yî-fap-lièn sân-khî thet-se, chhiu-to Pí-li-sé-ngìn lâu Li-fa̍t-yîm-ngìn ke su-lìm tú hi khôi-khién thú-thi â!”
[16] Yok-sit ke heu-thoi kóng: “Tui ngài-têu lòi-kóng, ke sân-khî hàn-he m̀-la fat, m̀ tân-chhiang án-ngiòng, he̍t chhai phìn-ngièn ke Kâ-nàm-ngìn, chhiu-he chhai Pak-San lâu fu-khiun chhûn-chông, hàn-yû Yâ-sṳ̂-lie̍t phìn-ngièn ke ngìn, chhiòn-phu ya yû thiet chan-chhâ â.”
[17] Yok-sû-â tui Yok-sit kî-chhu̍k, chhiu-he Yî-fap-lièn lâu sî Mâ-nâ-sî kî-chhu̍k ke ngìn kóng: “Ngì-têu ke ngìn-khiéu khok-sṳ̍t tông-tô; ngì-têu ya tông khiòng-thai, m̀ yin-kôi chṳ́ tet-tó yit-fun thú-thi.
[18] Ke sân-khî oi kûi ngì-têu; sûi-yèn he su-lìm, ngì-têu cho-tet hi khôi-fat, chhiu voi tet-tó chhin-fat ke thú-thi. Chhiu-son Kâ-nàm-ngìn yû thiet chan-chhâ, tông khiòng-thai, ngì-têu ya voi chiông kì-têu kiuk chhut-hi.”