[1] Yî-ha he Yî-set-lie̍t-ngìn chhai Yok-tan-hò sî-phién Kâ-nàm-thi pûn sán-ngia̍p ke chhìn-hìn. Chi-sṳ̂ Yî-li-â-sat lâu Nun ke lai-é Yok-sû-â, pin Yî-set-lie̍t kok kî-chhu̍k, ke-têu kâ-chhu̍k ke-têu liâng-chhiu chiông thú-thi pûn-pûn ngìn-mìn.
[2] Kì-têu chûn-cheu Song-chú pûn Mô-sî ke min-lin, chhû-chhiâm kiet-thin chiông Yok-tan-hò sî-phién ke thú-thi pûn-pûn kiú-ke pan kî-chhu̍k.
[3] Mô-sî yí-kîn chiông Yok-tan-hò tûng-phién ke thú-thi pûn-pûn nang-ngoi lióng-ke pan kî-chhu̍k ke ngìn. (Yok-sit ke heu-thoi fûn-cho Mâ-nâ-sî lâu Yî-fap-lièn lióng-ke kî-chhu̍k.) Li-vi-ngìn mò pûn-tó thú-thi, chúng-he kì-têu yû sàng hó he̍t, yû thú-thi hó hiuk ngiù-khiùn, yòng-khiùn.
[5] Yî-set-lie̍t-ngìn chûn-cheu Song-chú pûn Mô-sî ke min-lin chiông thú-thi fûn-phi hó-se.
[6] Yû yit-ngit, yû-têu Yù-thai kî-chhu̍k ke ngìn to Kit-kap hi kien Yok-sû-â. Khì-chûng yit-sà miàng ôn-to Kâ-le̍t, he Kî-nì-sé-ngìn Yâ-fù-nì ke lai-é. Kì tui Yok-sû-â kóng: “Chhai Kâ-tâi-sṳ̂-Pâ-nì-â ke sṳ̀, Song-chú tui sṳ̀n-ngìn Mô-sî thì-tó ngì lâu ngài ke sṳ, ngì tî liá-khien sṳ!
[7] Ngài si-sṳ̍p se ke sṳ̀, Song-chú ke phu̍k-ngìn Mô-sî phai ngài tui Kâ-tâi-sṳ̂-Pâ-nì-â lòi tá-tham liá thi-fông; ngài cheu-sṳ̍t chiông só khon-tó ke hiong kì po-ko.
[8] Khó-sit, lâu ngài khiung-ha hi ke ngìn kì-têu ke po-ko sṳ́ ngìn-mìn thai chho̍k-kiâng; chúng-he ngài chhiòn-sîm sun-fu̍k Song-chú — ngài ke Song-ti.
[9] Ke-ngit, Mô-sî chhiu tap-yin ngài, kóng: ‘Ngì ke kiok tha̍p-ko ke thú-thi, yit-thin voi sàng-cho ngì lâu ngì ke chṳ́-sûn yún-kiú ke sán-ngia̍p, yîn-vi ngì chhiòn-sîm sun-fu̍k Song-chú — ngài ke Song-ti.’
[10] “Khon nâ! Song-chú hiong Mô-sî kóng ke-têu fa to liá-ha, yí-kîn ko si-sṳ̍p ńg-ngièn. Ke-sṳ̀ Yî-set-lie̍t-ngìn chhai khóng-yâ liù-long, chúng-he Song-chú cheu Kì ke yin-hí pó-sú ngài ke sâng-miang. Ngì khon! Ngài yí-kîn pat-sṳ̍p ńg-se lé.
[11] Kîm-pû-ngit ngài hàn-he án-khien, chhiu-chhiong tông-ngit Mô-sî phai ngài chhut-hi ke sṳ̀ khiung-yong. Ngài hàn-he án yû-li̍t, cho-tet chhiong thèu-pái án-ngiòng chhut-hi siông-chhṳ̀.
[12] Liá-ha, chhiáng ngì chiông Song-chú yin-hí oi pûn ngài ke sân-khî kâu-pûn ngài. Ngì sṳt thâng-ko, ke thi-fông yû tông thai-hon ke Â-na̍p chhu̍k-ngìn, he̍t chhai kô-kô ke sàng-chhiòng tî-poi. Na-he Song-chú lâu ngài khiung-ha, ngài chhiu yû fap-thu chiông kì-têu kiuk chhut-hi, chhiu-chhiong Song-chú só yin-hí ke.”
[13] Yok-sû-â chhiu chuk-fuk Yâ-fù-nì ke lai-é Kâ-le̍t, chiông Hî-pak-lùn-sàng kâu-pûn kì, cho kì ke sán-ngia̍p.
[14] Só-yî Hî-pak-lùn to liá-ha hàn-he su̍k Kî-nì-sé-ngìn Yâ-fù-nì ke lai-é Kâ-le̍t ke heu-thoi, yîn-vi kì chhiòn-sîm sun-fu̍k Song-chú — Yî-set-lie̍t ke Song-ti.
[15] (Chhai liá yî-chhièn, Hî-pak-lùn ôn-to Â-pâ-sàng; Â-pâ he Â-na̍p-chhu̍k chûng chui khiòng-thai ke ngìn-vu̍t.) Yèn-heu, ke thi-fông thai-phìn, chhiòn-mò chan-chên.