[1] Yî-set-lie̍t ngìn-mìn chṳ̂n-fu̍k liá-te thú-thi yî-heu, chhiòn-thí ngìn-mìn chhi-si̍p chhai Sṳ-lò, tap Song-chú ke sṳn-chong-phùng.
[2] Yî-set-lie̍t-ngìn hàn-yû chhit-ke kî-chhu̍k màng tet-tó kì-têu yin-tet ke thú-thi.
[3] Só-yî Yok-sû-â tui Yî-set-lie̍t-ngìn kóng: “Ngì-têu oi tén kí-kiú chang ngi̍p-hi cham-liâng Song-chú — ngì-têu chú-siên ke Song-ti só su-pûn ngì-têu ke thú-thi nè?
[4] Liá-ha, tak kî-chhu̍k oi sién sâm-ke ngìn to ngài liá-vi lòi; ngài oi phai kì-têu hi kûi-chak thi-khî chhà-khon. Kì-têu oi chiông yin-tet ke thi-khî va̍k-hó thi-thù, yèn-heu chón-lòi kien ngài.
[5] Liá-te thú-thi oi fûn-cho chhit-fun; Yù-thai hàn-he pó-yû kì nàm-fông ke thú-thi, Yok-sit pó-yû kì pet-fông ke thú-thi.
[6] Ngì-têu oi chiông liá chhit-ke thi-khî ke thi-thù tai-lòi pûn ngài; ngài oi chhai liá thi-fông vi ngì-têu chhû-chhiâm, khiù-mun Song-chú — ngài-têu ke Song-ti.
[7] Li-vi-ngìn cho-m̀-tet pûn-tó thú-thi, yîn-vi cho Song-chú ke chi-sṳ̂, sṳ-fung Kì, chhiu-he kì-têu ke sán-ngia̍p. Kâ-tet, Lî-phien lâu tûng Mâ-nâ-sî kî-chhu̍k, kì-têu yí-kîn tet-tó Yok-tan-hò tûng-phién ke thú-thi lé; ke-he Song-chú ke phu̍k-ngìn Mô-sî pûn-pûn kì-têu ke.”
[8] Liá-têu ngìn hí-sṳ̂n hi chhà-khon thi-hìn, va̍k thi-thù. Yok-sû-â fûn-fu kì-têu, kóng: “Ngì-têu oi hàng-phien kûi-chak thi-khî, thi-thù va̍k-hó, tai chón-lòi pûn ngài. Ngài oi chhai Sṳ-lò liá thi-fông vi ngì-têu chhû-chhiâm, khiù-mun Song-chú.”
[9] Só-yî kì-têu hàng-phien kûi-chak thi-khî, chiông thi fûn-cho chhit-fun, siá-hâ kok sàng-chṳ́n ke miàng-chhṳ̂n, yèn-heu chón-to Sṳ-lò yàng-thi kien Yok-sû-â.
[10] Yok-sû-â chhiu chhai Sṳ-lò vi kì-têu chhû-chhiâm, khiù-mun Song-chú, chiông kok kî-chhu̍k yin-tet ke thú-thi pûn-pûn kì-têu.
[11] Thi-yit chhiâm he fûn-phi pûn Phien-ngâ-mén kî-chhu̍k ke-têu kâ-chhu̍k ke thú-thi. Kì-têu ke thú-thi chhai Yù-thai lâu Yok-sit kî-chhu̍k chûng-kiên.
[12] Pet-phién ke thi-kie tui Yok-tan-hò to Yâ-li-kô yî-pet ke sân-phài, hiong-sî kîn-ko sân-khî, chhṳ̍t-to Pak-Â-vùn khóng-yâ,
[13] yu tui ke-vi theu-to Lu-sṳ̂ nàm-phién ke sân-phài (Lu-sṳ̂ chhiu-he Pak-thi̍t-li), hiong-nàm to Â-thâ-liu̍k-Â-tha̍t, to ha Pak-Fò-lùn nàm-phién ke sân.
[14] Thi-kie tui liá-vi chón-hiong nang yit-ke fông-hiong, tui sân ke sî-phién hiong-nàm, to Yù-thai kî-chhu̍k ke sàng — Kî-lie̍t-Pâ-li̍t (chhiu-he Kî-lie̍t-Yâ-lìm). Liá he sî-phién ke thi-kie.
[15] Nàm-phién ke thi-kie tui Kî-lie̍t-Yâ-lìm ke piên-sùn khôi-sṳ́, to Nì-fut-tô-â chhièn-súi,
[16] yèn-heu hâ-to Hiûn-nun-chṳ́ sân-lak tui-mien ke sân-kiok, chhiu-he chhai Li-fa̍t-yîm sân-lak ke pet-tôn. Thi-kie tui liá-vi hiong-nàm kîn-ko Hiûn-nun sân-lak, Yâ-pu-sṳ̂ sân-liâng ke nàm-phién, to Yún-Lò-kiet,
[17] yèn-heu chón-hiong pet, to Yún-Sṳ-ma̍k, chai-to Â-tû-mìn lu-héu tui-mien ke Kî-li-liu̍k, yu-to Pô-hón-sa̍k (Pô-hón he Lî-phien ke lai-é),
[18] kîn-ko sân ke pet-phién, ke-vi khon Yok-tan hò-kuk, yèn-heu hiong-hâ chhṳ̍t-to sân-lak tái,
[19] kîn-ko Pak-Hot-lâ ke pet-phién, to Yok-tan-hò ngi̍p Sí-hói ke thi-fông vì-chṳ́. Liá he nàm-phién ke thi-kie.
[20] Yok-tan-hò he tûng-phién ke thi-kie. Yî-song ke thú-thi he Phien-ngâ-mén kî-chhu̍k ke-têu kâ-chhu̍k só pûn-tó ke sán-ngia̍p.
[21] Su̍k Phien-ngâ-mén kî-chhu̍k ke-têu kâ-chhu̍k ke sàng yû: Yâ-li-kô, Pak-Hot-lâ, Yî-ma̍k-kî-sit,
[22] Pak-Â-lâ-pâ, Sé-mâ-lién, Pak-thi̍t-li,
[23] Â-vùn, Pâ-lâ, Ngò-fut-lâ,
[24] Kî-fap-Â-mô-nì, Ngò-fut-nì lâu Kâ-pâ, chúng-khiung sṳ̍p-ngi chho sàng, lâu fu-khiun ke chhûn-chông.
[25] Nang-ngoi yû Kî-phiên, Lâ-mâ, Pí-liu̍k,
[26] Mí-sṳ̂-pâ, Kî-fî-lâ, Mô-sat,
[27] Li-kiên, Yî-li-pí-le̍t, Thâ-lâ-lâ,
[28] Sé-lâ, Yî-li-fut, Yâ-pu-sṳ̂ (chhiu-he Yâ-lu-sat-lâng), Kî-pí-â lâu Kî-lie̍t-Yâ-lìm, chúng-khiung sṳ̍p-si chho sàng, lâu fu-khiun ke chhûn-chông. Yî-song he Phien-ngâ-mén kî-chhu̍k ke-têu kâ-chhu̍k só pûn-tó ke sán-ngia̍p.