[1] Nun ke lai-é Yok-sû-â tui Sṳ̍p-thìn am-chûng phai lióng-ke tham-é, fûn-fu kóng: “Ngì-têu to Kâ-nàm-thi hi tá-tham, thi̍t-phe̍t thiàu-chhà Yâ-li-kô-sàng ke chhìn-khóng.” Kì-têu hi sàng-tú, chhiu to kî-ńg Lâ-ha̍p vuk-hâ ko-ya.
[2] Yâ-li-kô-vòng thâng-kóng ke am-pû yû Yî-set-lie̍t-ngìn lòi sàng-tú tá-tham,
[3] chhiu phai-ngìn hi tui Lâ-ha̍p kóng: “Chhai ngì vuk-tú ke ngìn he lòi tá-tham chhiòn-thi, ngì oi chiông kì-têu kâu chhut-lòi!”
[4] Lâ-ha̍p kóng: “Khok-sṳ̍t yû ngìn lòi-ko ngài liá-vi, chúng-he ngài m̀-tî kì-têu tui nai-vi lòi. Kì-têu chhai ngit-thèu lo̍k-sân, sàng-mùn koân-thet yî-chhièn chhiu lì-khôi lé. Ngài mò mun kì-têu oi to nai-vi hi; na-he ngì-têu kiak-kiak hi tûi, yit-thin tûi tet-tó.” (Khì-sṳ̍t, Lâ-ha̍p yí-kîn chiông ke lióng-ke tham-é tai-to vuk-táng, khong chhai yit thai-tôi ke vòng-mà-kut tî-poi.)
[7] Vòng phai-hi sêu-chhà ke ngìn yit lì-khôi Yâ-li-kô-sàng, sàng-mùn chhiu koân-thet. Ke-têu ngìn hi tûi lióng-ke tham-é, chhṳ̍t-to Yok-tan-hò ke thu-sòn héu.
[8] Lióng-ke tham-é hàn-màng soi-muk yî-chhièn, Lâ-ha̍p sông-to vuk-táng,
[9] tui kì-têu kóng: “Ngài tî Song-chú yí-kîn chiông liá thú-thi su-pûn ngì-têu. Liá thi-fông só-yû ke ngìn chhiòn-phu tông-kiâng ngì-têu, kiâng-to voi sí.
[10] Ngài-têu yû thâng-kóng, ngì-têu lì-khôi Âi-khi̍p ke sṳ̀, Song-chú ngióng-pân sṳ́ ngì-têu mien-chhièn ke Fùng-hói châu-thet; ngài-têu ya thâng-kóng, ngì-têu ngióng-pân tui-thai Yok-tan-hò tûng-phién ke lióng-ke Â-mô-li-vòng — Sî-fèn lâu Ngo̍k, chiông kì-têu fí-me̍t.
[11] Ngài-têu yit thâng-tó liá-têu sṳ chhiu chho̍k-kiâng, tak-sà yit sióng-tó ngì-têu chhiu mò-kat mò-sat, yîn-vi Song-chú — ngì-têu ke Song-ti he thiên-táng ngìn-kiên ke Song-ti.
[12] Liá-ha, khiù ngì-têu chṳ́-tén Song-chú tui ngài fat-sṳ, ngì-têu oi hó khoán-thai ngài chhiòn-kâ ngìn, chhîn-chhiong ngài hó khoán-thai ngì-têu khiung-yong. Khiù ngì-têu pûn ngài yit-ke khok-sṳ̍t ke pó-chṳn.
[13] Khiù ngì-têu tap-yin ngài, ngì-têu oi ngièu-sa ngài ke yà-ôi, hiûng-thi, chí-moi, pin kì-têu kâ-su̍k ke sin-miang, kiu ngài-têu thot-lì sí-mòng.”
[14] Ke lióng-sà en-kóng: “Ngì m̀-hó chiông ngài-têu ke pi-me̍t kóng chhut-hi, ngài-têu chhiu tap-yin ngì. Song-chú chiông liá thú-thi su-pûn ngài-têu ke sṳ̀, ngài-têu voi sṳ̀n-sîm sṳ̀n-yi hó-hó khoán-thai ngì. Na-he ngài-têu mò sin-yung, ngien Song-ti nâ ngài-têu ke sin-miang von ngì-têu ke sin-miang.”
[15] Lâ-ha̍p ke vuk hí chhai sàng-chhiòng táng, só-yî kì yung yit-thiàu sok-è chiông ke lióng-sà tui chhûng-mùn chhui hâ-hi.
[16] Kì tui kì-têu kóng: “Ngì-têu oi chéu-to sân-tú hi; na-mò, ngì-têu voi pûn ke-têu oi chok ngì-têu ke ngìn chhìm-tó. Ngì-têu oi chhai ke-vi khong sâm-ngit, tén kì-têu chón-lòi sàng-tú yî-heu chang cho-tet thò-chéu.”
[17] Kì-têu tui Lâ-ha̍p kóng: “Ngài-têu cheu ngì ke yêu-khiù só fat-sṳ ke, ngài-têu yit-thin voi chûn-sú,
[18] chúng-he ngì yit-thin oi cheu ngài-têu ke fa hi-cho. Ngài-têu cham-liâng ngì-têu thú-thi ke sṳ̀, ngì oi chiông liá-thiàu fùng sok-è thak chhai ngì piong ngài-têu thò-chéu ke chhûng-mùn táng. Ngì oi chiông ngiâ yà-ôi, hiûng-thi, lâu ngiâ-pâ chhiòn-kâ chhiòn-phu chhi-si̍p chhai ngì vuk-hâ.
[19] Na-he yû-ngìn hàng-chhut liá-kiên vuk, kì pûn-ngìn chhṳ̀-sí he chhṳ-kâ ke chit-ngim, m̀-he ngài-têu ke m̀-chho̍k; na-he yû-ngìn chhai ngì vuk-hâ su sông-hoi, chhui chhiu kûi-pûn ngài-têu.
[20] Na-he ngì chiông ngài-têu ke pi-me̍t kóng chhut-hi, ngài-têu chhiu m̀-sṳ́ chûn-sú tui ngì ke fat-sṳ.”
[21] Lâ-ha̍p tap-yin kì-têu ke thiàu-khien, yèn-heu chiông kì-têu sung-chéu. Kì-têu lì-khôi yî-heu, Lâ-ha̍p chiông fùng sok-è thak chhai chhûng-mùn táng.
[22] Lióng-ke tham-é to sân-tú khong hí-lòi. Vòng phai-hi sêu-chhà ke ngìn chhai sàng-ngoi tak só-chhai chhìm kì-têu, chhìm sâm-ngit hàn-he chhìm m̀-tó, chhiu chón Yâ-li-kô-sàng hi.
[23] Só-yî lióng-ke tham-é tui sân-tú chhut-lòi, ko-hò hi kien Nun ke lai-é Yok-sû-â, chiông kîn-ko ke chhìn-hìn hiong kì po-ko.
[24] Kì-têu tui Yok-sû-â kóng: “Ngài-têu khok-sin Song-chú yí-kîn chiông ke-thi chhiòn-phu su-pûn ngài-têu lé. Ke-vi ke ngìn chhiòn-phu tông kiâng ngài-têu.”