[1] Song-chú sṳ́ Yî-set-lie̍t-ngìn hióng-su thai-phìn, si chû-vì sù-thi̍t m̀-kám lòi chok-koai, yí-kîn chhin-kiú lé. Liá-sṳ̀ Yok-sû-â ya tông-ló lé;
[2] kì seu-si̍p chhiòn-phu Yî-set-lie̍t-ngìn, chóng-ló, liâng-chhiu, sṳ́m-phan-kôn, lâu kôn-chóng lòi, tui kì-têu kóng: “Ngài liá-ha yí-kîn án-ló lé.
[3] Song-chú — ngì-têu ke Song-ti vi-tó ngì-têu tui liá-têu koet-kâ só-cho ke yit-chhiet, ngì-têu chhiòn-phu khon-tó lé; Song-chú — ngì-têu ke Song-ti yit-chhṳ̍t vi ngì-têu chan-chên.
[4] Ngài yí-kîn chiông só-yû cham-liâng lâu màng cham-liâng ke kok-koet thú-thi — tûng-phién tui Yok-tan-hò, sî-phién to Thi-chûng-hói — chhiòn-phu fûn-phi pûn ngì-têu kok kî-chhu̍k cho sán-ngia̍p.
[5] Song-chú — ngì-têu ke Song-ti voi sṳ́ kì-têu lì-khôi ngì-têu; ngì-têu chin-kûng ke sṳ̀, Kì oi chiông kì-têu kiuk-chéu. Ngì-têu voi cheu Song-chú — ngì-têu Song-ti ke yin-hí, tet-tó kì-têu ke thú-thi.
[6] “Só-yî, ngì-têu oi kiên-khiòng, oi khok-sṳ̍t chûn-hàng Mô-sî Fap-li̍t-sû só-siá ke yit-chhiet min-lin, m̀-hó phiên-chó, m̀-hó phiên-yu.
[7] Ngì-têu cho-m̀-tet lâu liù chhai ngì-têu tông-chûng ke ngoi-chhu̍k ngìn chhâm-chha̍p; cho-m̀-tet thì-tó kì-têu ke sṳ̀n-mìn, ya-he fung ke-têu sṳ̀n-mìn ke miàng fat-sṳ; cho-m̀-tet sṳ-fung kì-têu ya-he hiong kì-têu khúi-pai.
[8] Chṳ́-oi cheu ngì-têu to liá-ha yit-chhṳ̍t só chûn-hàng ke, ki-siu̍k tui Song-chú — ngì-têu ke Song-ti chûng-sîm.
[9] Ngì-têu chin-kûng ke sṳ̀, Song-chú yí-kîn chiông tông-khiòng tông-thai ke mìn-chhu̍k kiuk-chéu; to kîm-pû-ngit mò yit-ke koet-kâ yû phan-fap tí-tóng ngì-têu.
[10] Ngì-têu tông-chûng mò-lun nai-sà chhiu yû phan-fap tá-yàng yit-chhiên sà, yîn-vi Song-chú — ngì-têu ke Song-ti cheu Kì ke yin-hí voi vi ngì-têu chan-chên.
[11] Ngì-têu oi se-ngi, oi chhiòn-sîm kin-oi Song-chú — ngì-têu ke Song-ti.
[12] “Na-he ngì-têu tui Kì mò chûng-sîm, fán-chón lâu liù chhai ngì-têu tông-chûng ke ngoi-chhu̍k ngìn chhâm-chha̍p, thùng kì-têu thûng-fûn,
[13] ngì-têu chin-kûng ke sṳ̀, Song-chú — ngì-têu ke Song-ti yit-thin m̀-voi chai chiông liá-têu mìn-chhu̍k kiuk-chéu; fán-chón kì-têu voi chhiong lò-mióng, ham-chiáng, chhiong tá chhai ngì-têu poi-nòng ke piên-é, chhiuk chhai ngì-têu muk-chû ke net-è, chhṳ̍t-to ngì-têu mò yit-sà chhùn-liù chhai Song-chú — ngì-têu Song-ti só su-pûn ngì-têu liá-te chhin-chiâng ke thú-thi.
[14] “Liá-ha, ngài ko-sṳ̂n ke sṳ̀-kiên voi to lé. Ngì-têu yit-sîm yit-yi chhiòn-phu chhîn-chhú, Song-chú — ngì-têu ke Song-ti yí-kîn chiông Kì yin-hí pûn ngì-têu só-yû ke fuk-hi su-pûn ngì-têu lé. Kì ke yin-hí chhiòn-phu yû sṳ̍t-hien, mò yit-hong leu-thet.
[15] Chúng-he, ngì-têu oi tî, chhiu-chhiong Song-chú — ngì-têu ke Song-ti sṳ̍t-hien só-yû yin-hí pûn ngì-têu ke fuk-hi, Song-chú ya voi cheu-yong kong kok-yong ke châi-fo, chhṳ̍t-to chiông ngì-têu tui Kì só su liá-te chhin-chiâng ke thú-thi song chhù-me̍t.
[16] Na-he ngì-têu m̀ chûn-sú Song-chú — ngì-têu Song-ti só min-lin ngì-têu ke yok, hi sṳ-fung kin-pai phe̍t ke sṳ̀n-mìn, Kì voi thai fat-khién chit-fa̍t ngì-têu, sṳ́ ngì-têu tông-kiak chhiu tui Kì só su liá-te chhin-chiâng ke thú-thi song sêu-me̍t.”