[1] Koet-mìn chhiòn-phu ko Yok-tan-hò yî-heu, Song-chú tui Yok-sû-â kóng:
[2] “Ngì oi tui ngìn-mìn tông-chûng sién-chhut sṳ̍p-ngi ke ngìn, kok kî-chhu̍k yit-sà,
[3] fûn-fu kì-têu to Yok-tan-hò tú, to chi-sṳ̂ khî-he̍t ke thi-fông, chhí sṳ̍p-ngi chak sa̍k-thèu, yèn-heu tai ko-hi, piong chhai ngì-têu kîm-am-pû ôn-yàng ke thi-fông.”
[4] Só-yî, Yok-sû-â tui Yî-set-lie̍t-ngìn tông-chûng sat-li̍p sṳ̍p-ngi ke ngìn, kok kî-chhu̍k yit-sà, chiông kì-têu seu-si̍p khiung-ha,
[5] fûn-fu kì-têu: “Ngì-têu to Yok-tan-hò tú, hàng-to Song-chú — ngì-têu Song-ti ke yok-khui thèu-chhièn, tak-sà tui hò-pa tú chhí yit-chak sa̍k-thèu, khià chhai chhṳ-kâ kiên-thèu. Tak-chak sa̍k-thèu thoi-péu Yî-set-lie̍t yit-ke kî-chhu̍k.
[6] Ngì-têu oi chiông liá-têu sa̍k-thèu tun hí-lòi cho ki-ngiam-pî. Chiông-lòi, ngì-têu ke chṳ́-sûn mun-hí ngì-têu: ‘Liá-têu sa̍k-thèu he ki-ngiam má-ke?’
[7] Ngì-têu oi lâu kì-têu kóng, Song-chú ke yok-khui ko Yok-tan-hò ke sṳ̀, hò-pa súi chhiu thìn hâ-lòi, mò liù-thûng. Liá-têu sa̍k-thèu oi yún-yén sṳ́ Yî-set-lie̍t-ngìn ki-ngiam chhai liá-vi só fat-sên ke sṳ.”
[8] Ke sṳ̍p-ngi sà chhiu cheu Yok-sû-â ke min-lin hi-cho. Kì-têu chûn-cheu Song-chú fûn-fu Yok-sû-â ke fa tui Yok-tan-hò tú chhí sṳ̍p-ngi chak sa̍k-thèu, tak-chak sa̍k-thèu thoi-péu Yî-set-lie̍t yit-ke kî-chhu̍k; kì-têu chiông sa̍k-thèu khià to yàng-thi, piong chhai ke-vi.
[9] Yok-sû-â ya chhai Yok-tan-hò tú, chhai chi-sṳ̂ kông-tén yok-khui khî-he̍t ke thi-fông, nang-ngoi tôi sṳ̍p-ngi chak sa̍k-thèu. (Ke-têu sa̍k-thèu to kîm-pû-ngit hàn liù chhai ke-vi.)
[10] Ke-têu kông yok-khui ke chi-sṳ̂ khî-he̍t chhai Yok-tan-hò tûng-ông, tén ngìn-mìn vàn-sṳ̀n Song-chú fûn-fu Yok-sû-â ham kì-têu hi-cho ke sṳ. Liá ya he cheu Mô-sî min-lin Yok-sû-â cho ke. Ngìn-mìn kiak-kiak ko Yok-tan-hò.
[11] Kì-têu chhiòn-phu ko-hò yî-heu, ke-têu chi-sṳ̂ chang kông-tén Song-chú ke yok-khui, chhai thai-chung mien-chhièn hàng ko-hi.
[12] Lî-phien, Kâ-tet lióng kî-chhu̍k, lâu Mâ-nâ-sî pan kî-chhu̍k chông-phi hó ke chan-sṳ, cheu Mô-sî ke fûn-fu, chhai Yî-set-lie̍t-ngìn chui thèu-chhièn hàng.
[13] Thai-yok yû si-van chông-phi hó ke chan-sṳ chhai Song-chú mien-chhièn ko-hò, to Yâ-li-kô phìn-ngièn chún-phi siông-chhṳ̀.
[14] Ke-ngit, Song-chú sṳ́ Yî-set-lie̍t ngìn-mìn chhiòn-phu chûn Yok-sû-â cho thai liâng-chhiu. Tui ke-sṳ̀ hí, Yok-sû-â lâu Mô-sî khiung-yong, yit-sên-ngìn su ngìn-mìn chûn-kin.
[15] Song-chú fûn-fu Yok-sû-â kóng:
[16] “Min-lin ke-têu kông-tén yok-khui ke chi-sṳ̂ tui Yok-tan-hò sông-lòi.”
[17] Yok-sû-â chhiu cheu án-ngiòng hi-cho.
[18] Ke-têu kông-tén Song-chú yok-khui ke chi-sṳ̂ tui Yok-tan-hò yit sông-lòi, tha̍p-tó châu-thi, hò-pa súi yu khôi-sṳ́ liù-thûng, lâu thèu-pái khiung-yong chong-ko lióng-ngan.
[19] Châng-ngie̍t chhû-sṳ̍p, ngìn-mìn tui Yok-tan-hò sông-lòi, chhiu chhai Yâ-li-kô tûng-phién ke Kit-kap ôn-yàng.
[20] Yok-sû-â chiông ke-têu tui Yok-tan-hò tú khià-lòi ke sṳ̍p-ngi chak sa̍k-thèu tun chhai ke-vi.
[21] Kì tui Yî-set-lie̍t-ngìn kóng: “Chiông-lòi, ngì-têu ke chṳ́-sûn mun-hí ngì-têu: ‘Liá-têu sa̍k-thèu he ki-ngiam má-ke?’
[22] Ngì-têu oi lâu kì-têu kóng: ‘Yî-set-lie̍t-ngìn sṳt hàng-ko pien-cho châu-thi ke Yok-tan-hò.’
[23] Song-chú — ngì-têu ke Song-ti sṳ́ ngì-têu thèu-chhièn ke Yok-tan-hò châu-thet, tén-to ngì-têu chhiòn-phu hàng ko-hi, chhiu-chhiong Kì tông-ngièn sṳ́ ngài-têu thèu-chhièn ke Fùng-hói châu-thet, pûn ngài-têu hàng ko-hi khiung-yong.
[24] Kì án-ngiòng cho, oi sṳ́ thiên-ha van-mìn chhiòn-phu tî Song-chú ke sú thai-yû nèn-li̍t, ya oi sṳ́ ngì-têu yún-yén kin-vi Song-chú — ngì-têu ke Song-ti.”