[1] Song-chú fûn-fu Yok-sû-â
[2] tui Yî-set-lie̍t ngìn-mìn kóng: “Ngì-têu oi cheu Ngài ham Mô-sî chhòn-pûn ngì-têu ke min-lin, chṳ́-thin kí-chho sàng cho thò-sám-sàng.
[3] Ke m̀ tú-hó, m̀-he yû-yi hoi-sí ngìn ke, cho-tet to ke-vi hi, thò-phit po-hiet-sù ke ngìn.
[4] Án-ngiòng ke ngìn cho-tet thò-to khì-chûng ke yit-chho sàng, to sàng mùn-héu sṳ́m-phan ke thi-fông, hiong ke-têu chóng-ló kié-sṳt sṳ-chhìn ke kîn-ko. Kì-têu voi pûn kì ngi̍p sàng-tú, pûn kì thi-fông hó-he̍t, án-ngiòng, kì cho-tet liù hâ-lòi.
[5] Na-he po-hiet-sù ke ngìn tûi-to ke-vi, sàng-tú ke chóng-ló cho-m̀-tet chiông ke-ngìn kâu chhut-lòi, fán-chón oi pó-fu kì; yîn-vi kì lâu sí-chá mò yên-sù, m̀-he yû-yi hoi-sí ngìn ke.
[6] Kì cho-tet he̍t chhai sàng-tú, tén-heu chiap-su kûng-khôi ke sṳ́m-phan, ya oi tén-to tông-sṳ̀ ke thai-chi-sṳ̂ sí-thet, chang cho-tet chón-to kì só thò-phit ke kâ-hiông.”
[7] Só-yî Yî-set-lie̍t-ngìn chhai Yok-tan-hò sî-phién Nâ-fut-thâ-li sân-khî ke Kâ-li-li chṳ́-thin Kî-tâi-sṳ̂, chhai Yî-fap-lièn sân-khî chṳ́-thin Sṳ-kiam, chhai Yù-thai sân-khî chṳ́-thin Â-pâ-sàng (chhiu-he Hî-pak-lùn).
[8] Kì-têu yu chhai Yok-tan-hò tûng-phién, Yâ-li-kô tûng-phién ke khóng-yâ kô-ngièn, chhai Lî-phien kî-chhu̍k kin-nui chṳ́-thin Pí-sit, chhai Kâ-tet kî-chhu̍k kin-nui ke Kî-lie̍t chṳ́-thin Lâ-ma̍t, chhai Mâ-nâ-sî kî-chhu̍k kin-nui ke Pâ-sân chṳ́-thin Kô-làn, lòi-cho thò-sám-sàng.
[9] Liá-têu thò-sám-sàng he vi só-yû Yî-set-lie̍t-ngìn lâu chhiam-sṳ̀ he̍t chhai kì-têu tông-chûng ke ngoi-chhu̍k ngìn sat-li̍p ke. Fàm m̀-he yû-yi hoi-sí ngìn ke, chhiòn-phu cho-tet to ke-vi hi chhiáng-khiù pó-fu, sám-phit po-hiet-sù ke ngìn. Po-hiet-sù ke ngìn cho-m̀-tet chhṳ̀ kì, chhù-fî kì kîn-ko kûng-khôi ke sṳ́m-phan.