[1] Song-ti su-fuk Nò-â lâu kiâ lai-é, tui kì-têu kóng: “Oi kiung tô-tô chṳ́-ńg, phien-mân sṳ-kie.
[2] Só-yû thi-song ke chhu-lui, khûng-chûng ke fî-niâu, thi-song ke phà-chhùng, lâu hói-tú ke ǹg-lui, chhiòn-phu voi kiâng ngì-têu; Ngài oi chiông liá-têu kâu chhai ngì-têu sú-chûng.
[3] Yî-chhièn, Ngài chiông chhiâng-chhoi su-pûn ngì-têu cho sṳ̍t-vu̍t; liá-ha Ngài ya chiông liá-têu thung-vu̍t su-pûn ngì-têu cho sṳ̍t-vu̍t.
[4] Chúng-he, ngì-têu cho-m̀-tet sṳ̍t tai-hiet ke ngiuk, yîn-vi sâng-miang chhai hiet tî-poi.
[5] Mò-lun he ngìn ya-he yâ-chhu, na-he liù ngìn ke hiet, hoi-ngìn ke miang, Ngài yit-thin chûi-thó hiet-chai; chhiu-he hoi chhṳ-kâ ke hiûng-thi, ya cheu-yong lun-chhui.
[6] Liù ngìn-hiet ke, phe̍t-ngìn ya oi liù kì ke hiet, yîn-vi Song-ti chho-ngìn, he cheu Kì chhṳ-kâ ke hìn-siong chho ke.
[7] Ngì-têu oi kiung tô-tô chṳ́-ńg, thai-thai hîn-vong, phien-mân sṳ-kie.”
[8] Song-ti tui Nò-â lâu kì ke-têu lai-é kóng:
[9] “Ngài liá-ha oi lâu ngì-têu pin ngì-têu ke chṳ́-sûn li̍p-yok;
[10] ya oi lâu thi-song só-yû ke sâng-vu̍t, chhiu-he ke-têu thùng ngì-têu khiung-ha chhut thai-sòn ke fî-niâu, thèu-sâng, pin yâ-chhu li̍p-yok.
[11] Ngài yin-hí ngì-têu: fàm-yû hiet-ngiuk ke, mò-chai pûn thai-súi me̍t-thet, m̀-voi chai yû thai-súi lòi fí-me̍t thai-thi.”
[12] Song-ti yu kóng: “Liá chhiu-he Ngài lâu ngì-têu pin ke-têu thùng ngì-têu khiung-ha kok-yong ke sâng-vu̍t, sṳ-sṳ thoi-thoi li̍p-yok ke ki-ho.
[13] Ngài oi chiông Ngài ke thiên-kiûng piong chhai yùn ke tông-chûng, sàng-cho Ngài lâu thai-thi li̍p-yok ke ki-ho.
[14] Tông Ngài chhai thiên-khûng phû-sông yùn, thiên-kiûng chhai yùn-chûng chhut-hien ke sṳ̀,
[15] Ngài chhiu-voi ki-ngiam Ngài lâu ngì-têu pin kok-yong yû hiet-ngiuk ke sâng-vu̍t só-li̍p ke yok; chhiu mò-chai cho thai-súi lòi fí-me̍t só-yû ke sâng-vu̍t.
[16] Tông Ngài khon-tó thiên-kiûng chhai yùn-chûng chhut-hien ke sṳ̀, Ngài chhiu voi ki-ngiam Ngài lâu thi-song kok-yong yû hiet-ngiuk ke sâng-vu̍t só-li̍p yún-yén ke yok.”
[17] Song-ti tui Nò-â kóng: “Liá chhiu-he Ngài lâu thi-song só-yû ke sâng-vu̍t li̍p-yok ke ki-ho.”
[18] Nò-â ke lai-é chhiòn-phu tui thai-sòn chhut-lòi, kì-têu he: Sám, Hàm lâu Ngâ-fut. (Hàm he Kâ-nàm ke â-pâ.)
[19] Fûn-san chhai chhiòn sṳ-kiên ke ngìn-lui, chhiu-he Nò-â liá sâm-ke lai-é ke chṳ́-sûn.
[20] Nò-â he kâng-chung ngìn, ya he chui-siên chung phù-thò-yèn ke ngìn.
[21] Kì sṳ̍t phù-thò-chiú, lîm-to chui-chui, thot-kông sâm-fu, soi chhai chong-phùng tú.
[22] Hàm (Kâ-nàm ke â-pâ) khon-tó kiâ-pâ tá chhak-pok, chhiu chhut-hi lâu kì lióng-ke hiûng-thi kóng.
[23] Sám lâu Ngâ-fut nâ yit-liâng chhòng-sâm kâ chhai lióng-sà ke kiên-thèu hong, to-thui hàng-ngi̍p chong-phùng, hi-châ â-pâ ke sṳ̂n-thí. Yîn-vi kì-têu mien hiong-ngoi, chhiu mò khon-tó â-pâ thot-kông ke sṳ̂n-thí.
[24] Nò-â chhîn-siáng heu, tî kiâ mân-chṳ́ tui kì só-cho ke sṳ,
[25] chhiu kóng: “Kâ-nàm yin-tông su chu-chú! Kì oi cho kiâ hiûng-thi nù-phu̍k ke nù-phu̍k.”
[26] Yu kóng: “Oi siung-chan Song-chú, Sám ke Song-ti! Kâ-nàm oi-cho Sám ke nù-phu̍k.
[27] Ngien Song-ti pûn Ngâ-fut hîn-vong, sṳ́ kì he̍t chhai Sám ke chong-phùng tú; yu ngien Kâ-nàm cho kì ke nù-phu̍k.”
[28] Thai-súi yî-heu, Nò-â hàn chhai-sṳ sâm-pak ńg-sṳ̍p ngièn.
[29] Nò-â sṳ̍t-to kiú-pak ńg-sṳ̍p se chang ko-sṳ̂n.