[1] Ngâ-kok ngo-thèu khon, chhiu khon-tó Yî-so tai-tén si-pak ngìn chhièn-lòi; só-yî kì chiông chṳ́-ńg fûn-khôi, kâu-pûn Li-â, Lùi-kiet, lâu lióng-ke se-chiá.
[2] Kì ham lióng-ke se-chiá lâu kì-têu ke chṳ́-ńg hàng chhai thèu-chhièn, Li-â lâu kì ke chṳ́-ńg thèn-tén, Lùi-kiet lâu Yok-sit chhai chhin heu-poi.
[3] Ngâ-kok chhîn-sṳ̂n hàng-to kì-têu chui thèu-chhièn; kì lièn-lièn chhit-pái phu̍k chhai thi-song, hàng-to kiâ-kô mien-chhièn.
[4] Yî-so chéu ko-lòi ngiàng-chiap kì, chiông kì nám-tén lòi-chîm kì; lióng-sà chhiu kieu chhut-lòi.
[5] Yî-so ngo-thèu khon-tó fu-ńg lâu se-ngìn-è, chhiu mun kì: “Ngì liá-têu ngìn he má-ngìn?” Ngâ-kok en-kóng: “Liá-têu se-ngìn-è lûng-chúng he Song-ti sṳ̂-ên su-pûn ngiâ phu̍k-ngìn ke.”
[6] Ngâ-kok lióng-ke se-chiá tai-tén kì-têu ke chṳ́-ńg hàng chhièn-lòi khúi Yî-so,
[7] chiap-tén he Li-â lâu kì ke chṳ́-ńg, chui-heu Yok-sit lâu Lùi-kiet ya hàng-chhièn lòi-khúi kì.
[8] Yî-so yu-mun: “Ngài chui-siên tù-tó ke-khiùn thèu-sâng he oi cho-má-ke?” Ngâ-kok kóng: “He oi sung-pûn ngâ chú ke tén-lu.”
[9] Yî-so kóng: “Ló-thâi! Ngài má-ke tû-yû; ngì chhṳ-kâ liù-tén chhiu-hó lé!”
[10] Ngâ-kok kóng: “Mo̍k án-ngiòng â! Ngì na-he fôn-hí khon-tó ngài, chhiáng sû-hâ ngài ke lî-vu̍t. Ngì án chhîn-chhiet chiap-na̍p ngài, ngài khon-tó ngì ke mien, chhiu-chhiong khon-tó Song-ti ke mien yit-yong.
[11] Chhiáng ngì chiap-su ngài tai-lòi ke lî-vu̍t; yîn-vi Song-ti yit-chhṳ̍t yung chhṳ̀-oi khoán-thai ngài, su-pûn ngài yit-chhiet só sî-yeu ke.” Ngâ-kok chai-sâm chhiáng Yî-so chiap-su lî-vu̍t, kì chang sû hâ-lòi.
[12] Yî-so kóng: “Ên-têu khiung-ha lòi-hi! Ngài chhai ngì thèu-chhièn tai-lu.”
[13] Ngâ-kok en-kóng: “Ngâ chú tî ngài liá-têu se-ngìn-è hàn-se, ngài yu oi cheu-ku ke-têu hàn sṳ̍t-nen ke se ngiù-è, se yòng-è. Na-he chai kiuk kì-têu hàng yit-ngit lu, kiâng-pha ngiù-yòng chhiòn-phu voi sí-thet.
[14] Chhiáng ngâ chú siên-hàng! Ngiâ phu̍k-ngìn voi chhai heu-poi thèn-tén, cheu ngiù-yòng lâu se-ngìn-è ke li̍t-liong man-man hàng, chhṳ̍t-to Yî-tûng ngì ke-vi hi.”
[15] Yî-so kóng: “Na-he án-ngiòng, ngài chhiu liù kí-sà lòi pó-fu ngì.” Chúng-he Ngâ-kok kóng: “M̀-sṳ́ án-ngiòng; ngâ chú án chhîn-chhiet tui-thai ngài, ngài chhiu sîm-mân yi-chiuk.”
[16] Án-ngiòng, Yî-so ke-ngit chhiu siên hàng-chón Yî-tûng hi.
[17] Chúng-he Ngâ-kok hi-to Sû-kot, chhai ke-vi vi chhṳ-kâ hí vuk-è, yu vi thèu-sâng tap liàu-è; só-yî ke thi-fông ôn-to Sû-kot.
[18] Ngâ-kok tui Mî-sok-put-tha̍t-mí-â yit-lu phìn-ôn chón-to Kâ-nàm-thi ke Sṳ-kiam-sàng, chhai sàng-ngoi tap chong-phùng.
[19] Kì tap chong-phùng ke-te thi, he yung yit-pak chak ngiùn-pi hiong Sṳ-kiam ke â-pâ, Ha̍p-mat ke heu-thoi mâi ke.
[20] Kì chhai ke-vi hí yit-chho chi-thàn, miàng ôn-to Yî-li-Yî-lò-yî-Yî-set-lie̍t.