[1] Lióng-ngièn heu, Âi-khi̍p-vòng pot yit-ke mung: Kì khî chhai Nì-lò hò-sùn,
[2] khon-tó chhit-chak chhin-chiâng chhin-phì ke ngiù-mà tui hò-pa sông-lòi, chhai hò-piên sṳ̍t-chhó.
[3] Chiap-tén yu-yû chhit-chak chhin-ché chhin-chheu ke ngiù-mà tui hò-pa sông-lòi, khî chhai hò-sùn ke chhit-chak phì ngiù-mà sùn-thèu.
[4] Liá chhit-chak chhin-ché chhin-chheu ke ngiù-mà chiông ke chhit-chak chhin-chiâng chhin-phì ke ngiù-mà sṳ̍t-thet. Liá-sṳ̀ vòng chhiu siáng ko-lòi.
[5] Kì yu soi-thet, nang-ngoi pot yit-ke mung: Kì khon-tó yû yit-thèu ma̍k-é sâng-chhut chhit-chhon tông-páu tông-siuk ke ma̍k-chhon,
[6] chiap-tén yu sâng-chhut chhit-chhon pûn tûng-fûng chhôi-to châu-châu, phang-thet ke ma̍k-chhon;
[7] liá chhit-chhon phang-thet ke ma̍k-chhon chiông ke chhit-chhon tông-páu tông-siuk ke ma̍k-chhon thûn-thet. Vòng siáng-heu chang tî liá he yit-ke mung.
[8] Thi-ngi chêu-sṳ̀n, vòng ke sîm fàn-chhau, chhiu phai-ngìn seu-si̍p Âi-khi̍p só-yû thiàu-thùng ke lâu sên-siong-kâ lòi, chiông kì ke mung lâu kì-têu kóng, chúng-he mò-ngìn nèn vi kì kié-mung.
[9] Liá-sṳ̀, chiú-chṳn tui vòng kóng: “Kîm-pû-ngit ngài sióng-hí chhṳ-kâ ke ko-sṳt.
[10] Song-pái vòng thai fat-khién, ha-lin chiông ngài lâu san-chóng koân chhai sṳ-ví-chóng fú-nui ke kâm-ngiu̍k.
[11] Yû yit am-pû ngài lióng-sà lûng-chúng pot yit-ke mung, lióng-sà ke mung yi-sṳ mò khiung-yong.
[12] Tông-sṳ̀ yû yit-ke Hî-pak-lòi chhiâng-ngièn lâu ngài-têu khiung-ha koân chhai ke-vi, kì ngièn-lòi he sṳ-ví-chóng ke phu̍k-ngìn. Ngài-têu chiông chhṳ-kâ ke mung lâu kì kóng, kì chhiu thoi ngài-têu kié-mung.
[13] Kiet-kó, sṳ-chhìn chhiòn-phu cheu kì ke kié-sṳt lòi sṳ̍t-hien: Ngài fì-fu̍k ngièn-chṳt, san-chóng sa pûn-ngìn tiau-sí.”
[14] Vòng chhiu phai-ngìn chhòn Yok-sit lòi. Kì-têu kiak-kiak tai kì chhut kâm-ngiu̍k; kì chhiu thi-thèu, hiû-mien, von-sâm, lòi-to vòng mien-chhièn.
[15] Vòng tui kì kóng: “Ngài pot yit-ke mung, mò-ngìn nèn kié-sṳt; ngài thâng-kóng ngì voi kié-mung.”
[16] Yok-sit en vòng kóng: “Ngài mò liá-ke chhòi-thiau, chúng-he Song-ti voi chiông yèn-mân ke kié-sṳt su-pûn vòng.”
[17] Vòng tui Yok-sit kóng: “Ngài pot-mung khon-tó chhṳ-kâ khî chhai Nì-lò hò-sùn.
[18] Yû chhit-chak chhin-chiâng chhin-phì ke ngiù-mà tui hò-pa sông-lòi, chhai hò-piên sṳ̍t-chhó.
[19] Chiap-tén yû chhit-chak chhin-ché chhin-chheu ke ngiù-mà sông-lòi, he ngài chhai Âi-khi̍p chhiùng-lòi m̀-sṳt khon-ko án-chheu ke.
[20] Liá-têu chhin-ché chhin-chheu ke ngiù-mà sṳ̍t-thet ke chhit-chak phì ngiù-mà.
[21] Mò sióng-tó, liá-têu ngiù-mà hàn-he chhin-ché chhin-chheu, khon m̀-chhut kì-têu yû sṳ̍t-thet phì ngiù-mà. Liá-sṳ̀ ngài chhiu siáng ko-lòi.
[22] Ngài yu pot yit-ke mung, khon-tó yû yit-thèu ma̍k-é, sâng-chhut chhit-chhon tông-páu tông-siuk ke ma̍k-chhon.
[23] Chiap-tén yu sâng-chhut chhit-chhon pûn tûng-fûng chhôi-to châu-châu, phang-thet ke ma̍k-chhon.
[24] Liá-têu phang-thet ke ma̍k-chhon chiông ke chhit-chhon páu-mân ke ma̍k-chhon thûn-thet. Ngài chiông liá-têu mung lâu thiàu-thùng ke kóng, chúng-he mò-ngìn nèn vi ngài kié-mung.”
[25] Yok-sit tui vòng kóng: “Khì-sṳ̍t liá lióng-ke mung khó-yî cho yit-ke mung lòi kié-sṳt, yi-sṳ lûng-chúng khiung-yong. Song-ti yí-kîn chiông chhṳ-kâ oi-cho ke sṳ siên lâu vòng kóng.
[26] Ke chhit-chak phì ngiù-mà thoi-péu chhit-ngièn, ke chhit-chhon páu-mân ke ma̍k-chhon ya thoi-péu chhit-ngièn, yi-sṳ lûng-chúng khiung-yong.
[27] Chiap-tén sông-lòi ke chhit-chak chhin-ché chhin-chheu ke ngiù-mà thoi-péu chhit-ngièn, ke chhit-chhon pûn tûng-fûng chhôi-to châu-châu, phang-thet ke ma̍k-chhon ya thoi-péu chhit-ngièn, lûng-chúng thoi-péu chhit-ngièn kî-fông.
[28] Chhiu-chhiong ngài thèu-siên tui vòng só kóng ke, Song-ti yí-kîn chiông chhṳ-kâ oi-cho ke sṳ yi-siên chṳ́-sṳ vòng lé.
[29] Âi-khi̍p chhiòn-thi voi-yû chhit-ngièn ke thai fûng-sû,
[30] chiap-tén yû chhit-ngièn kî-fông. Liá kî-fông voi fí-fái Âi-khi̍p chhiòn-thi, sṳ́ ngìn vàn-chhiòn m̀ ki-tet hó ngièn-tûng ke yong-siong;
[31] kî-fông ngiàm-chhung to fî-sòng tet-ngìn-kiâng, ngìn voi kám-kok m̀-chhut yî-chhièn sṳt yû fûng-sû.
[32] Vòng lièn-siu̍k pot liá lióng-ke mung, thoi-péu liá he Song-ti kiet-thin ke kie-va̍k, chhin-kiak chhiu-voi sṳ̍t-hien lé.
[33] “Só-yî, ngài kien-ngi vòng sién yit-ke yû chṳ-fi, yû ngién-kông ke ngìn, phai kì chhṳ-lî Âi-khi̍p chhiòn-koet,
[34] pin chṳ́-phai khì-thâ kôn-yèn, chhai chhit-ngièn fûng-sû khì-kiên, chṳ̂n-sû Âi-khi̍p chhiòn-koet nùng-sán-vu̍t ke ńg-fûn chṳ̂-yit.
[35] Min-lin kì-têu chhai chiông-oi lòi ke fûng-ngièn khì-kiên sû-si̍p ńg-kuk, chhai kok-sàng chit-chhùn liòng-sṳ̍t, phai-ngìn kón-lî.
[36] Chhai chiap-tén chiông-oi lòi ke chhit-ngièn kî-fông, liá-têu tún-liòng cho-tet kiûng-yin Âi-khi̍p ngìn-mìn, sṳ́ koet-kâ m̀-voi pûn kî-fông me̍t-thet.”
[37] Vòng lâu kì yit-chhiet kôn-yèn lûng-chúng chan-sṳ̀n liá-ke kie-va̍k.
[38] Vòng chhiu tui kì ke kôn-yèn kóng: “Ngài-têu chhìm m̀-tó pí Yok-sit kha lî-sióng ke ngìn-sién lé, yîn-vi kì tî-poi yû Song-ti ke Lìn!”
[39] Vòng tui Yok-sit kóng: “Song-ti ki-yèn chiông liá yit-chhiet chṳ́-sṳ ngì, ngì yit-thin pí phe̍t-ngìn kien-yû chṳ-fi, kien-yû ngién-kông.
[40] Ngài oi phai ngì chhṳ-lî ngài ke koet; ngài ke ngìn-mìn chhiòn-phu oi fu̍k-chhiùng ngì ke min-lin. Chhai pún-koet, chṳ́-yû ngài ke khièn-li̍t chhêu-ko ngì.
[41] Liá-ha ngài min-lin ngì cho Âi-khi̍p ke chái-siong.”
[42] Vòng chiông chhṳ-kâ sú-chṳ́ tai ke yin-é nâ-lòi tai chhai Yok-sit ke sú-chṳ́, yu chiông song-tén mà-sâ cho ke ngoi-sâm kâ chhai Yok-sit sṳ̂n-song, chai chiông kîm pha̍t-lien koa chhai Yok-sit ke kiáng-hong.
[43] Kì yu pûn Yok-sit chhô vòng-sṳt ke thi-ngi liòng chhâ, yû kín-ví khôi-lu, thai-sâng hêm: “Khúi hâ-lòi!” Án-ngiòng, Yok-sit su-phai cho chái-siong, chhṳ-lî Âi-khi̍p chhiòn-koet.
[44] Vòng tui Yok-sit kóng: “Ngài he vòng, chúng-he chhai Âi-khi̍p chhiòn-thi, na-he mò ngì ke min-lin, má-ngìn tû cho-m̀-tet sùi-phien hàng-thung.”
[45] Vòng su Yok-sit yit-ke Âi-khi̍p-miàng, ôn-to Sat-fat-nâ-thi̍t-Pâ-nui-â, yu chiông Hî-li-pô-lî-sàng ke chi-sṳ̂ Pô-thì-fî-lâ ke moi-é Â-sî-na̍p pûn kì cho pû-ngiòng. Án-ngiòng, Yok-sit chhiu chhṳ-lî Âi-khi̍p chhiòn-thi.
[46] Yok-sit sâm-sṳ̍p se ke sṳ̀ khôi-sṳ́ vi Âi-khi̍p-vòng kûng-chok; kì lì-khôi vòng-kiûng, to Âi-khi̍p kok-thi sùn-chhà.
[47] Chhai chhit-ke fûng-ngièn khì-kiên, ńg-kuk fûng-tên.
[48] Yok-sit sû-si̍p ńg-kuk, chhai kok sàng-chṳ́n hí chhông-khu, chit-chhùn tui chû-vì kok-thi sû-si̍p lòi ke liòng-sṳ̍t.
[49] Kì thai-liong sû-si̍p ńg-kuk, chhiong hói-sùn ke sâ-é tô-to mò phan-fap son.
[50] Chhai fông-ngièn màng-to yî-chhièn, Yok-sit ke pû-ngiòng chhiu-he Hî-li-pô-lî-sàng ke chi-sṳ̂ Pô-thì-fî-lâ ke moi-é Â-sî-na̍p lâu kì kiung lióng-ke lai-é.
[51] Yok-sit kóng: “Song-ti sṳ́ ngài m̀ ki-tet yit-chhiet ke khú-nan, lâu ngâ-pâ chhiòn-kâ ngìn.” Só-yî kì lâu chóng-chṳ́ ôn-miàng Mâ-nâ-sî.
[52] Kì yu kóng: “Song-ti sṳ́ ngài chhai su-khú ke thi-fông hîn-vong.” Só-yî kì lâu thi-ngi ke lai-é ôn-miàng Yî-fap-lièn.
[53] Âi-khi̍p-ngìn hióng-su ke fûng-ngièn kiet-suk lé,
[54] chhiu-chhiong Yok-sit ke yi-ngièn, chhit-ke fông-ngièn chiap-tén chhiu-lòi. Tak só-chhai yû kî-fông, tân-tân Âi-khi̍p chhiòn-koet yû liòng-sṳ̍t.
[55] Heu-lòi Âi-khi̍p ngìn-mìn ya mò liòng-sṳ̍t lé, kì-têu tui vòng khiù-liòng. Vòng chhiu min-lin kì-têu hi-kien Yok-sit, yit-chhiet thâng kì ke ôn-phài.
[56] Kî-fông ye̍t-lòi ye̍t ngiàm-chhung, chhiòn-koet tû khiung-yong; só-yî Yok-sit tá-khôi só-yû chhông-khu, chiông chhùn-liòng mai-pûn Âi-khi̍p-ngìn.
[57] Chû-vì kok-koet ke ngìn ya-lòi hiong Yok-sit tha̍k-liòng, yîn-vi thiên-ha tak só-chhai yû kî-fông, chhìn-khóng fî-sòng ngiàm-chhung.