[1] Â-pak-làn ke pû-ngiòng Sâ-lòi mò kiung chṳ́-ńg pûn kì. Sâ-lòi yû yit-ke sṳ́-ńg ôn-to Ha-kap, he Âi-khi̍p-ngìn.
[2] Sâ-lòi tui Â-pak-làn kóng: “Song-chú sṳ́ ngài m̀-voi kiung. Chhiáng ngì lâu ngài ke sṳ́-ńg thùng-fòng, mò thin-chho̍k kì voi thoi ngài kiung yit-ke lai-é.” Â-pak-làn chhiu thâng Sâ-lòi ke fa.
[3] Só-yî, Â-pak-làn ke pû-ngiòng Sâ-lòi chhiu chiông sṳ́-ńg Âi-khi̍p-ngìn Ha-kap kâu-pûn kiâ ló-kûng cho se-chiá. (Liá-khien sṳ he Â-pak-làn chhai Kâ-nàm he̍t sṳ̍p-ngièn yî-heu chang fat-sên ke.)
[4] Â-pak-làn lâu Ha-kap thùng-fòng, kì chhiu-yû sṳ̂n-hong. Kì yit-tî chhṳ-kâ yû-sṳ̂n, chhiu kiêu-ngau hí-lòi, khon m̀-hí thèu-kâ-ngiòng.
[5] Sâ-lòi tui Â-pak-làn mài-yen kóng: “Ngài pûn-ngìn khî-fu, he ngì m̀-chho̍k. Ngài chiông ngài ke sṳ́-ńg piong chhai ngì ke fài-chûng; kì yit-tî chhṳ-kâ yû sṳ̂n-hong, chhiu khon m̀-hí ngài. Ngien Song-chú chhai ngì lâu ngài chûng-kiên chú-chhṳ̀ kûng-tho.”
[6] Â-pak-làn en kì kóng: “Kì he ngì ke sṳ́-ńg, he ngì kón ke, ngì cho-tet sùi-yi tui-thai kì!” Sâ-lòi chhiu khú-thu̍k Ha-kap; Ha-kap ngiûn m̀-he̍t chhiu thêu-chéu.
[7] Song-chú ke thiên-sṳ́ chhai khóng-yâ, oi hi Sû-ngí lu-song ke chhièn-súi sùn tù-tó Ha-kap,
[8] tui kì kóng: “Sâ-lòi ke sṳ́-ńg Ha-kap â, ngì tui nai-vi lòi? Oi hi nai-vi?” Kì en-kóng: “Ngài tui thèu-kâ-ngiòng Sâ-lòi ke-vi thêu-chéu chhut-lòi.”
[9] Song-chú ke thiên-sṳ́ kóng: “Ngì oi chón-hi thèu-kâ-ngiòng ke-vi, vàn-chhiòn sun-chhiùng kì.”
[10] Song-chú ke thiên-sṳ́ yu kóng: “Ngài oi sṳ́ ngì ke chṳ́-sûn khi̍t-tô, tô-to mò ngìn son tet chhut-lòi.”
[11] Song-chú ke thiên-sṳ́ yu kóng: “Ngì yí-kîn yû sṳ̂n-hong, voi kiung yit-ke lai-é; ngì oi lâu kì ôn-to Yî-sṳ̍t-mâ-li, yîn-vi Song-chú thâng-tó ngì ke khú-chhìn.
[12] Ngì ke lai-é chiông-lòi voi chhiong yit-chak yâ-lì; kì oi kûng-tá ngìn, ngìn ya oi kûng-tá kì. Kì oi lâu chhîn-chhu̍k kiet yên-sù, tân-thu̍k sên-fa̍t.”
[13] Ha-kap chhiu kóng: “Ngài chṳn-kîn chhai liá-vi khon-tó ke khon-ku ngài ke Song-ti mâ? Ngài ngióng-pân hàn-yû miang!” Só-yî kì chiông ke lâu kì kóng-fa ke Song-chú ham-cho “Ngì he khon-ku ngìn ke Song-ti”.
[14] Yîn-vi án-ngiòng, ngìn ham ke-héu chiáng cho Pí-ngí-Lâ-hói-Lòi. Liá-héu chiáng he chhai Kâ-tâi-sṳ̂ lâu Pâ-lie̍t chûng-kiên.
[15] Ha-kap vi Â-pak-làn kiung yit-ke lai-é; Â-pak-làn lâu kì ôn-miàng ham-cho Yî-sṳ̍t-mâ-li.
[16] Ha-kap vi Â-pak-làn kiung Yî-sṳ̍t-mâ-li ke sṳ̀, Â-pak-làn pat-sṳ̍p liuk-se.