[1] Sà he Chú Song-ti só chhóng-chho ke thung-vu̍t tông-chûng chui káu-koai ke. Sà tui ke ńg-ngìn kóng: “Song-ti kám yû-yáng kóng-ko ngì-têu yit-thin cho-m̀-tet sṳ̍t yèn-chûng só-yû su-táng ke kó-chṳ́?”
[2] Ke ńg-ngìn en-kóng: “Yèn-chûng su-táng ke kó-chṳ́ ngài-têu chhiòn-phu cho-tet sṳ̍t;
[3] chṳ́-yû yèn tûng-ông ke-thèu su-táng ke kó-chṳ́, Song-ti sṳt-kóng: ‘Ngì-têu cho-m̀-tet sṳ̍t, ya m̀-hó miâ, na m̀ thâng-chhiùng, ngì-têu chhiu voi sí.’ ”
[4] Sà tui ńg-ngìn kóng: “Ngì-têu mò yit-thin voi sí,
[5] yîn-vi Song-ti tî ngì-têu nâ-lòi sṳ̍t, muk-chû chhiu voi pien-kîm, ngì-têu voi chhiong Song-ti án-ngiòng hiáu-tet fûn-phe̍t san-ok.”
[6] Ke ńg-ngìn khon-tó ke-thèu su-é ke kó-chṳ́ hó-sṳ̍t, hó-khon, yu voi pûn ngìn tet-tó chṳ-fi, kì chhiu chiông kó-chṳ́ chak hâ-lòi sṳ̍t, ya nâ-pûn kiâ ló-kûng, kiâ ló-kûng ya sṳ̍t.
[7] Kì lióng-sà ke muk-chû chhiu kîm hí-lòi, chang tî chhṳ-kâ he chhak-sṳ̂n lu-thí, chhiu phiên vù-fâ-kó-su ke ya̍p-é lòi-châ sṳ̂n-thí.
[8] Ke-ngit lìm-am-é, ke-ngìn lâu kiâ pû-ngiòng thâng-tó Chú Song-ti chhai yèn-tú hàng ke sâng-yîm, chhiu khong chhai yèn-tú ke su-lìm chûng, m̀-kám kien Chú Song-ti ke mien.
[9] Chú Song-ti ham ke-ngìn, tui kì kóng: “Ngì chhai nai?”
[10] Kì kóng: “Ngài chhai yèn-chûng thâng-tó Ngì ke sâng, yîn-vi ngài chhak-sṳ̂n lu-thí, kiâng-to khong hí-lòi.”
[11] Chú Song-ti kóng: “Má-ngìn lâu ngì kóng ngì chhak-sṳ̂n lu-thí nè? Ngì kám-yû sṳ̍t Ngài fûn-fu ngì cho-m̀-tet sṳ̍t ke-thèu su-táng ke kó-chṳ́?”
[12] Ke-ngìn kóng: “Ngì su-pûn ngài cho-phân ke ńg-ngìn, kì chiông ke su-táng ke kó-chṳ́ pûn ngài, ngài chhiu sṳ̍t.”
[13] Chú Song-ti mun ke ńg-ngìn kóng: “Ngì to-tái cho-má-ke sṳ nè?” Ńg-ngìn kóng: “Sà yín-yu ngài, ngài chhiu sṳ̍t.”
[14] Chú Song-ti tui sà kóng: “Ngì ki-yèn cho liá-sṳ, chhiu yit-thin su chit-fa̍t, voi pí yit-chhiet sên-hiuk lâu yâ-chhu kha chhôi-ko. Ngì oi yung tú-sṳ́ sò, chûng-sṳ̂n sṳ̍t-nài.
[15] Ngài oi sṳ́ ngì lâu ńg-ngìn kiet yên-sù; ngì ke heu-thoi lâu ńg-ngìn ke heu-thoi pí-chhṳ́ yen-hen. Kì oi tá ngì ke thèu; ngì oi ngâu kì ke kiok-châng.”
[16] Chú Song-ti yu tui ke ńg-ngìn kóng: “Ngài oi thai-thai chen-kâ ngì fài-yín ke thung-khú; ngì oi chhai thung-khú chûng kiung chṳ́-ńg. Ngì voi oi-mu ngiâ ló-kûng; ngiâ ló-kûng voi kón ngì.”
[17] Chú Song-ti yu tui Â-tông kóng: “Ngì ki-yèn thâng ngiâ pû-ngiòng ke fa, sṳ̍t Ngài fûn-fu ngì cho-m̀-tet sṳ̍t ke-thèu su-táng ke kó-chṳ́, thú-thi oi yîn-vi ngì lòi-su chu-chú; ngì oi yit-sên-ngìn lò-luk, chang-nèn tui thú-thi tet-tó sṳ̍t-vu̍t.
[18] Thú-thi vi-tó ngì voi sâng net-è lâu chha̍p-chhó, ngì ya oi sṳ̍t yâ-sâng ke chhoi.
[19] Ngì oi hon liù ma̍k-lo̍k chang-yû hó-sṳ̍t, chhṳ̍t-to ngì kûi-thú, yîn-vi ngì he tui nài chhut-lòi ke. Ngì pún-lòi he nài, to-mî oi kûi-thú.”
[20] Â-tông lâu kiâ pû-ngiòng ôn-to Ha-vâ, yîn-vi kì he ngìn-lui ke â-mê.
[21] Chú Song-ti yung chhu-phì cho sâm-fu pûn Â-tông lâu kiâ pû-ngiòng chok.
[22] Chú Song-ti kóng: “Khon â! Ke-ngìn yí-kîn lâu ngài-têu siông-chhiong, voi fûn-phe̍t san-ok; kiâng-pha kì liá-ha yu chhûn-sú chak sâng-miang-su ke kó-chṳ́ sṳ̍t, chhiu yún-yén m̀-voi sí.”
[23] Só-yî Chú Song-ti chiông kì kiuk-chhut Yî-thien-yèn, pûn kì hi kâng-chung — kì pún-lòi he tui thú-thi chhut-lòi ke.
[24] Chú Song-ti kiuk-chéu ke-ngìn, yu chhai Yî-thien-yèn tûng-phién ôn-sat kî-lu-pak lâu si-mien chón-thung fat-fó ke kiam, lòi-chóng sâng-miang-su ke lu.