[1] Thai-yok chhai ke-sṳ̀, Yù-thai lì-khôi kì ke-têu hiûng-thi, hi lâu yit-ke Â-thu-làn-ngìn Hî-lâ khiung-ha he̍t.
[2] Yù-thai chhai ke-vi tù-tó Kâ-nàm-ngìn Sû-â ke moi-é, chhiu thó kì cho pû-ngiòng, lâu kì thùng-fòng.
[3] Kiâ pû-ngiòng yû sṳ̂n-hong, kiung yit-ke lai-é; Yù-thai lâu kì ôn-miàng Ngí.
[4] Kì yu yû sṳ̂n-hong, kiung thi-ngi ke lai-é, ôn-miàng Ngò-nàm.
[5] Kì yu kiung thi-sâm ke lai-é, ôn-miàng Sṳ-lâ; Sṳ-lâ chhut-se ke sṳ̀, Yù-thai chhai Kî-sit.
[6] Yù-thai vi kì ke chóng-chṳ́ Ngí thó pû-ngiòng, kì ôn-to Thap-mâ.
[7] Ngí ke hàng-vì sià-ok, tet-chhui Song-chú, Song-chú chhiu chhù-thet kì ke sin-miang.
[8] Yù-thai tui Ngí ke ló-thâi Ngò-nàm kóng: “Ngì hi lâu ngiâ thai-só thùng-fòng, tui kì chhin ngì cho se-suk ke ngi-vu, hó thoi ngiâ-kô liù-chúng.”
[9] Ngò-nàm tî chhiu-son kiung-tó lai-é ya m̀-he su̍k chhṳ-kâ ke, só-yî tak-pái lâu kiâ thai-só thùng-fòng, chhiu thiâu-thiâu siet-chîn chhai thi-nài, m̀ pûn kiâ-kô liù-chúng.
[10] Kì liá-ke hàng-vì tet-chhui Song-chú, Song-chú ya chhù-thet kì ke sin-miang.
[11] Yù-thai tui kiâ sîm-khiû Thap-mâ kóng: “Ngì chón-hi ngoi-kâ sú-koá, tén ngâ lai-é Sṳ-lâ chóng-thai sṳ̀n-ngìn.” Kì kóng liá-fa, yîn-vi kiâng-pha Sṳ-lâ voi chhiong kì lióng-ke â-kô án-ngiòng sí-thet. Thap-mâ chhiu chón ngoi-kâ hi.
[12] Ko yit-chham sṳ̀-kiên, Yù-thai ke pû-ngiòng Sû-â ke moi-é sí-thet. Sông-khì ko-heu, Yù-thai lâu kiâ phèn-yû Â-thu-làn-ngìn Hî-lâ khiung-ha hi Thìn-nâ, to vi kì chién yòng-mô ke-têu ngìn ke-vi.
[13] Yû-ngìn lâu Thap-mâ kóng: “Ngiâ kâ-kôn tú-tú hi Thìn-nâ chién yòng-mô.”
[14] Kì chhiu thot-thet sú-koá ke sâm, yung mien-pha miâng-mien, chhô chhai oi-hi Thìn-nâ lu-song ke Yî-nâ-yin-sàng mùn-héu; yîn-vi kì tî Yù-thai ke mân-chṳ́ Sṳ-lâ yí-kîn chóng-thai sṳ̀n-ngìn, chúng-he hàn-he mò lòi thó kì cho pû-ngiòng.
[15] Yù-thai khon-tó kì, láu-tó he kî-ńg, yîn-vi kì miâng-tén mien.
[16] Yù-thai m̀-tî kì chhiu-he chhṳ-kâ ke sîm-khiû, hàng-to lu-sùn kì ke-vi hi, mun kì: “Lòi â! Ngài lâu ngì soi hó-mò?” Kì kóng: “Ngì lâu ngài soi oi pûn ngài má-ke?”
[17] Kì en-kóng: “Ngài tui yòng-khiùn chûng nâ yit-chak se sân-yòng pûn ngì.” Thap-mâ kóng: “Sung sân-yòng yî-chhièn, ngì oi liù tûng-sî pûn ngài cho tí-ap.”
[18] Kì mun: “Ngì oi ngài má-ke tûng-sî cho tí-ap?” Thap-mâ kóng: “Ngì ke yin-é, lièn yin-tai-é, lâu ngiâ sú-chhóng.” Yù-thai chhiu chiông liá-têu tûng-sî kâu-pûn kì, lâu kì khiung-ha soi; Thap-mâ chhiu yû sṳ̂n-hong lé.
[19] Thap-mâ chón ngoi-kâ hi, nâ-thet miâng-mien ke mien-pha, cheu-sòng chok sú-koá ke sâm.
[20] Yù-thai thok kiâ phèn-yû Hî-lâ sung yit-chak se sân-yòng hi pûn ke fu-ngìn-kâ, oi su̍k-chón cho tí-ap ke tûng-sî, chúng-he Hî-lâ chhìm m̀-tó kì.
[21] Hî-lâ mun Yî-nâ-yin thi-fông ke ngìn: “Yî-chhièn chhai liá lu-sùn ke kiûng-meu kî-ńg nai-vi hi lé?” Kì-têu en-kóng: “Liá thi-fông chhiùng-lòi m̀-sṳt yû kiûng-meu kî-ńg.”
[22] Hî-lâ chón-to Yù-thai ke-vi, tui kì kóng: “Ngài chhìm m̀-tó kì. Tông-thi ke ngìn me kóng, liá-vi chhiùng-lòi m̀-sṳt yû kiûng-meu kî-ńg.”
[23] Yù-thai kóng: “Ke-têu tûng-sî pûn kì son lé, miên-tet ngài-têu pûn-ngìn seu. Ngài yû-yi sung kì liá-chak se sân-yòng, chúng-he ngì sa chhìm m̀-tó kì.”
[24] Thai-yok ko sâm-chak ngie̍t, yû-ngìn lâu Yù-thai kóng: “Ngiâ sîm-khiû Thap-mâ fam kiên-yìm, yí-kîn yû sṳ̂n-hong lé.” Yù-thai fat-khién kóng: “Lâi chhut-lòi, sêu pûn kì sí!”
[25] Thap-mâ pûn-ngìn lâi chhut-lòi ke sṳ̀, thok-ngìn lâu kiâ kâ-kôn kóng: “Ngài he tui liá-têu tûng-sî ke chú-ngìn yû sṳ̂n-hong; ngì ngin yit-ha liá yin-é, yin-tai-é, lâu sú-chhóng; liá-têu tûng-sî he má-ngìn ke?”
[26] Yù-thai ngin-tó liá-têu tûng-sî, chhiu kóng: “Kì pí ngài kha-chho̍k. Ngài mò chhin-tó ngi-vu; ngài pún-lòi yin-kôi ham ngài ke mân-chṳ́ Sṳ-lâ lâu kì kiet-fûn.” Ke-sṳ̀ yî-heu, Yù-thai m̀-sṳt chai lâu kì thùng-fòng.
[27] Thap-mâ oi kiung ke sṳ̀, chang-tî kì só-fài ke he sûng-pâu-thôi.
[28] Kì kiung ke sṳ̀, yit-ke ô-nga-é chhûn-chhut yit-chak sú lòi; sán-phò chiông liá-chak sú thak yit-thiàu fùng-sien, kóng: “Liá-ke he siên chhut-se ke.”
[29] Chúng-he ô-nga ke sú yu kiû chón-hi, kiâ-kô sa siên kiung chhut-lòi; sán-phò kóng: “Ngì chhiu-he án-ngiòng chhióng-tén chhut-lòi ke!” Chhiu lâu kì ôn-miàng Fap-le̍t-sṳ̂.
[30] Chiap-tén kiâ ló-thâi kiung chhut-lòi, sú-hong thak-tén fùng-sien, chhiu lâu kì ôn-miàng Chhia-lâ.