[1] Song-ti tui Ngâ-kok kóng: “Ngì oi to Pak-thi̍t-li hi, he̍t chhai ke-vi. Ngì oi chhai ke-vi vi Ngài hí yit-chho chi-thàn. Ngài chhiu-he ngì thò-phit ngiâ-kô Yî-so ke sṳ̀, hiong ngì hién-hien ke Song-ti.”
[2] Ngâ-kok chhiu tui kì ke kâ-chhu̍k lâu só-yû thèn kì khiung-ha hi ke ngìn kóng: “Oi chiông ngì-têu tai-lòi ke-têu ngoi-chhu̍k sṳ̀n-siong te̍p-thet; oi kiet-chhiang chhṳ-kâ, von chhiang-li ke sâm-fu.
[3] Ngài-têu oi lì-khôi liá-vi hi Pak-thi̍t-li; ngài oi chhai ke só-chhai vi Song-ti hí yit-chho chi-thàn, yîn-vi ngài tù-tó khun-nàn ke sṳ̀, Song-ti pông-chhu ngài; ngài liù-long ke sṳ̀, Kì lâu ngài khiung-ha.”
[4] Kì-têu chhiu chiông só-yû ke ngoi-chhu̍k sṳ̀n-siong lâu chhṳ-kâ só tai ke ngí-vàn kâu-pûn Ngâ-kok; Ngâ-kok chiông liá-têu tûng-sî mài chhai Sṳ-kiam fu-khiun ke siong-su hâ.
[5] Ngâ-kok lâu kì ke-têu lai-é chhut-fat ke sṳ̀, Song-ti pûn si chû-vì sàng-chṳ́n ke ngìn fî-sòng chho̍k-kiâng, m̀-kám tûi kì-têu.
[6] Ngâ-kok lâu kûi-kâ ngìn lòi-to Kâ-nàm-thi ke Lu-sṳ̂, chhiu-he Pak-thi̍t-li ke só-chhai.
[7] Kì chhai ke-vi hí yit-chho chi-thàn, chiông ke thi-fông ôn-to Yî-le̍t-Pak-thi̍t-li, yîn-vi kì thò-phit kiâ-kô ke sṳ̀, Song-ti chhai ke-vi chhîn-chhṳ hiong kì hién-hien.
[8] Li-pak-kâ ke nen-ôi Tí-pô-lâ sí-thet, mài chhai Pak-thi̍t-li nàm-phu ke siong-su hâ, só-yî ke-thèu su-é ôn-to “ôi-sông ke siong-su”.
[9] Ngâ-kok tui Mî-sok-put-tha̍t-mí-â chón-lòi yî-heu, Song-ti chai yit-pái hiong kì hién-hien, su-fuk pûn kì.
[10] Song-ti tui kì kóng: “Ngì ke miàng he Ngâ-kok, chúng-he chhiùng-kîm yî-heu ngì oi ôn-to Yî-set-lie̍t.” Án-ngiòng, Song-ti chhiu lâu kì kói miàng ôn-to Yî-set-lie̍t.
[11] Song-ti tui kì kóng: “Ngài he chhiòn-nèn ke Song-ti; Ngài oi pûn ngì kiung tô-tô chṳ́-ńg. Tông-tô koet-kâ oi tui ngì ke chṳ́-sûn hîn-hí; ngì oi cho chhin-tô kiûn-vòng ke chú-siên.
[12] Ngài oi chiông Ngài su-pûn Â-pak-lâ-hón lâu Yî-sat ke thú-thi su-pûn ngì lâu ngì ke heu-thoi.”
[13] Liá-têu fa kóng-so̍t, Song-ti chhiu lì-khôi kì.
[14] Ngâ-kok chhai Song-ti tui kì kóng-fa ke thi-fông tun yit-chak sa̍k-thèu cho ki-ngiam-pî, chhai ke táng-kô lìm-chiú lâu kám-lám-yù.
[15] Ngâ-kok chiông ke thi-fông ôn-to Pak-thi̍t-li, yîn-vi Song-ti chhai ke-vi lâu kì kóng-fa.
[16] Ngâ-kok lâu kì ke kâ-chhu̍k tui Pak-thi̍t-li chhut-fat. Kì-têu lòi-to lì Yî-fap-thâ hàn-yû yit-chham lu ke thi-fông, Lùi-kiet sán-khì to lé, chhin nàn-sán.
[17] Thung-to ngiûn m̀-he̍t ke sṳ̀, sán-phò lâu kì kóng: “M̀-sṳ́ kiâng, ngì yu kiung yit-ke lai-é.”
[18] Tông Lùi-kiet voi thôn-hi ke sṳ̀-chiet, kì lâu ô-nga-é ôn-miàng Phien-Ngò-nì; chúng-he Ngâ-kok lâu kì ôn-to Phien-ngâ-mén.
[19] Lùi-kiet sí-thet, mài chhai oi-hi Yî-fap-thâ ke lu-sùn; Yî-fap-thâ chhiu-he Pak-li-hèn.
[20] Ngâ-kok chhai kì ke fùn-mu tun yit-te pî-sa̍k, chhṳ̍t-to kîm-pû-ngit Lùi-kiet ke mu-pî hàn-chhôi.
[21] Yî-set-lie̍t ki-siu̍k kì ke lu-chhàng, chhai Yî-tet-thap ke nàm-phién tap chong-phùng.
[22] Yî-set-lie̍t hàn he̍t chhai ke thi-khî ke sṳ̀, kì ke chóng-chṳ́ Lî-phien lâu kiâ-pâ ke se-chiá Phit-lâ soi-muk. Yî-set-lie̍t ya thâng-tó liá-khien sṳ. Ngâ-kok yû sṳ̍p-ngi ke lai-é.
[23] Li-â kiung ke lai-é yû: Ngâ-kok ke chóng-chṳ́ Lî-phien, hàn-yû Sî-mién, Li-vi, Yù-thai, Yî-sat-kâ, Sî-pu-lùn.
[24] Lùi-kiet kiung ke lai-é yû: Yok-sit, Phien-ngâ-mén.
[25] Lùi-kiet ke sṳ́-ńg Phit-lâ kiung ke lai-é yû: Tan, Nâ-fut-thâ-li.
[26] Li-â ke sṳ́-ńg Sit-pha kiung ke lai-é yû: Kâ-tet, Â-sat. Ngâ-kok liá-têu lai-é chhiòn-phu he chhai Mî-sok-put-tha̍t-mí-â chhut-se ke.
[27] Ngâ-kok lòi-to Man-li, to kiâ-pâ Yî-sat ke-vi; Man-li chhiu-he Hî-pak-lùn, he Â-pak-lâ-hón lâu Yî-sat he̍t-ko ke thi-fông.
[28] Yî-sat hióng-su yit-pak pat-sṳ̍p se.
[29] Kì sṳ̍t-to chhin-tô se, chhin-ló, chang thôn-hi sí-thet, chón-to kiâ chú-chûng ke-vi hi. Kì ke lai-é Yî-so lâu Ngâ-kok chiông kì mài-chong.