[1] Pâ-pí-lùn-vòng Am-lâ-fî, Yî-lâ-sat-vòng Â-lio̍k, Yî-làn-vòng Kî-thai-ló-mâ, Kô-yin-vòng Thì-tha̍t liá si-ke vòng lièn-ha̍p,
[2] lâu Só-tô-mâ-vòng Pí-lâ, Ngò-mô-lâ-vòng Pí-sâ, Ap-mâ-vòng Sṳ-na̍p, Sé-pién-vòng San-yî-phe̍t, Pí-lâ-vòng (yu ôn-to Só-ngí-vòng) liá ńg-ke vòng siông-chhṳ̀.
[3] Ńg vòng ke kiûn-chhui chhai Sî-tang sân-lak fi-ha̍p; Sî-tang sân-lak chhiu-he Yàm-hói.
[4] Kì-têu sṳt pûn Kî-thai-ló-mâ kón sṳ̍p-ngi ngièn, to thi sṳ̍p-sâm ngièn kì-têu chhiu chho-fán.
[5] Thi sṳ̍p-si ngièn Kî-thai-ló-mâ lâu kì thùng-mèn-koet ke vòng tai-liâng kiûn-chhui, chhai Â-sṳ̂-thâ-liu̍k-Kâ-nèn tá-yàng Li-fa̍t-yîm-ngìn, chhai Ha̍p-ma̍k tá-yàng Sû-sî-ngìn, chhai Kî-lie̍t-thìn phìn-ngièn tá-yàng Yî-mí-ngìn,
[6] chhai Yî-tûng sân-khî tá-yàng Hò-li-ngìn, yit-chhṳ̍t tá-tó chiap-khiun khóng-yâ ke Yî-le̍t-Pâ-làn.
[7] Yèn-heu kì-têu yu to-chón Ôn-Me̍t-pâ (chhiu-he Kâ-tâi-sṳ̂), cham-liâng Â-mâ-li̍t-ngìn chhiòn-phu ke thú-thi, tá-yàng he̍t chhai Ha̍p-sé-sun-Thâ-mâ ke Â-mô-li-ngìn.
[8] Só-yî, Só-tô-mâ-vòng, Ngò-mô-lâ-vòng, Ap-mâ-vòng, Sé-pién-vòng lâu Pí-lâ-vòng (chhiu-he Só-ngí-vòng) ke kiûn-chhui chhiòn-phu chhut-lòi, chhai Sî-tang sân-lak pài-chhṳn lâu kì-têu siông-chhṳ̀;
[9] chhiu-he lâu Yî-làn-vòng Kî-thai-ló-mâ, Kô-yin-vòng Thì-tha̍t, Pâ-pí-lùn-vòng Am-lâ-fî, Yî-lâ-sat-vòng Â-lio̍k siông-chhṳ̀; án-ngiòng, ńg-ke vòng lâu si-ke vòng siông-chhṳ̀.
[10] Sî-tang sân-lak yû tông-tô sa̍k-yù fut. Só-tô-mâ-vòng lâu Ngò-mô-lâ-vòng tá-sû thò-chéu ke sṳ̀, tiet-lo̍k fut-tú; khì-thâ sâm-ke vòng chéu-to sân-táng hi.
[11] Si-ke vòng chhiu chiông Só-tô-mâ, Ngò-mô-lâ só-yû ke chhòi-sán lâu liòng-sṳ̍t chhióng chhiang-chhiang.
[12] Ke-sṳ̀, Â-pak-làn ke chhṳ̍t-é Lò-tet he̍t chhai Só-tô-mâ; kì-têu ya chiông kì chok-hi, chhióng-chéu kì ke chhòi-sán.
[13] Yû yit-ke thò chhut-lòi ke ngìn lòi lâu Hî-pak-lòi-ngìn Â-pak-làn po-ko. Ke-sṳ̀, Â-pak-làn he̍t chhai Â-mô-li-ngìn Man-li kì ke siong-su fu-khiun. Man-li lâu kì ke hiûng-thi Yî-sṳ̍t-kok pin Â-nâi chhiòn-phu he lâu Â-pak-làn kiet-mèn ke.
[14] Â-pak-làn yit thâng-tó kiâ chhṳ̍t-é pûn-ngìn chok-hi, chhiu seu-si̍p kâ-chhu̍k chûng chîn-lien ke chong-tên sâm-pak yit-sṳ̍p pat-ngìn, hi tûi ke si-ke vòng, yit-chhṳ̍t tûi-to Tan.
[15] Kì chhai ke-vi chiông chong-tên fûn-cho kí-chhui, chhai am-pû-sṳ̀ chin-kûng, tá-to thi̍t-ngìn piang-miang thò-chéu. Kì ki-siu̍k tûi-tó Thai-mâ-sṳ-kiet pet-phién ke Hò-pâ,
[16] chiông pûn-ngìn chhióng-chéu ke chhòi-sán chhiòn-phu chhióng chón-lòi, yu kiu-chón kì ke chhṳ̍t-é Lò-tet lâu kì só-yû ke chhòi-sán, hàn-yû fu-ńg pin khì-thâ ke ngìn.
[17] Â-pak-làn tá-yàng Kî-thai-ló-mâ pin lâu kì thùng-mèn ke vòng chón-lòi ke sṳ̀, Só-tô-mâ-vòng to Sâ-mì sân-lak (chhiu-he Vòng sân-lak) ngiàng-chiap kì.
[18] Chṳ-kô Song-ti ke chi-sṳ̂ Sat-lâng-vòng Ma̍k-kî-sé-tet ya tai-tén piáng lâu chiú chhut-lòi ngiàng-chiap Â-pak-làn,
[19] chuk-fuk kì, kóng: “Ngien Chṳ-kô ke Song-ti, thiên-thi ke chhóng-chho chá, su-fuk pûn Â-pak-làn!
[20] Ngien sṳ́ ngì tá-yàng thi̍t-ngìn ke Chṳ-kô Song-ti tet-tó siung-chan!” Â-pak-làn chiông chhióng chón-lòi ke chan-li-phín chûng nâ-chhut sṳ̍p-fûn chṳ̂-yit sung-pûn Ma̍k-kî-sé-tet.
[21] Só-tô-mâ-vòng tui Â-pak-làn kóng: “Chiông ngài ke ngìn-mìn vàn pûn ngài, chan-li-phín ngì cho ngì nâ-hi!”
[22] Â-pak-làn tui Só-tô-mâ-vòng kóng: “Ngài tui Song-chú — Chṳ-kô ke Song-ti, thiên-thi ke chhóng-chho chá fat-sṳ:
[23] Ngài chhie̍t-tui m̀ nâ ngì ke tûng-sî, chhiu-he yit-thiàu sien, yit-thiàu hài-tai ngài ya mò-oi, miên-tet ngì heu-lòi kóng: ‘Ngài pûn Â-pak-làn fat-chhòi.’
[24] Ngài ke phu̍k-ngìn só-sṳ̍t ke, son-he yí-kîn vàn ngài, khì-thâ ke tûng-sî ngài mò-oi; chúng-he lâu ngài khiung-ha lòi ke Â-nâi, Yî-sṳ̍t-kok lâu Man-li só yin-kôi tet ke, pûn-pûn kì-têu.”