[1] Ngâ-kok ki-siu̍k he̍t chhai kiâ-pâ cho lî-hak he̍t-ko ke Kâ-nàm thi-khî.
[2] Yî-ha ki-chai Ngâ-kok chhiòn-kâ ke sṳ. Yok-sit sṳ̍p-chhit se ke sṳ̀ chhiu sòng-sòng thèn kì ke-têu â-kô chhut-hi chóng yòng-è. Kì sòng-sòng pông-chhu kiâ-pâ ke se-chiá Phit-lâ lâu Sit-pha ke-têu lai-é chóng yòng-è; kì ya sòng-sòng lâu kiâ-pâ po-ko ke-têu â-kô só-cho ke fái-sṳ.
[3] Yî-set-lie̍t thi̍t-phe̍t siak Yok-sit yàng-ko siak khì-thâ ke lai-é, yîn-vi Yok-sit he kì ngièn-ló ke sṳ̀ kiung ke; kì cho yit-liâng fâ-set tông-chiâng ke chhòng-sâm pûn Yok-sit.
[4] Yok-sit ke-têu â-kô khon-tó â-pâ thi̍t-phe̍t siak Yok-sit, sîm-tú chhin m̀ kâm-ngien, chhiu yen-hen Yok-sit, lâu kì kóng-fa ke sṳ̀ sòng-sòng ok khià-khià.
[5] Yû yit-pái, Yok-sit pot yit-ke mung, chiông liá-ke mung kóng-pûn ke-têu â-kô thâng; kì-têu chhiu hàn-kha yen-hen kì.
[6] Kì kóng: “Ngài chiông ngài pot ke mung kóng-pûn ngì-têu thâng:
[7] Ngài-têu chhai thièn-tú chat ma̍k-é, ngài chat ke ma̍k-é khî tèn-tèn, ngì-têu chat ke ma̍k-é lûng-chúng vì-tén ngài chat ke ma̍k-é pai.”
[8] Kì ke-têu â-kô mun kì kóng: “Ngì sióng-oi cho-vòng kón ngài-têu he-mò?” Yîn-vi Yok-sit chiông chhṳ-kâ ke mung kóng-pûn ke-têu â-kô thâng, kì-têu chhiu pí thèu-pái hàn-kha yen-hen kì.
[9] Heu-lòi Yok-sit yu pot yit-ke mung, kì hàn-he lâu ke-têu â-kô kóng: “Ngài yu pot yit-ke mung; ngài khon-tó ngit-thèu, ngie̍t-kông lâu sṳ̍p-yit lia̍p sên-é lòi pai ngài.”
[10] Yok-sit ya chiông liá-ke mung lâu kiâ-pâ kóng; kiâ-pâ chhiu chit-phi kì kóng: “Liá chhiong má-ke mung nè? Ngì sióng ngài, ngiâ-mê lâu ngiâ ke-têu â-kô chhiòn-phu oi lòi phu̍k chhai thi-song pai ngì he-mò?”
[11] Yok-sit ke-têu â-kô fî-sòng chhit-tu kì, chúng-he kiâ-pâ yit-chhṳ̍t chiông liá-khien sṳ ki chhai sîm-tú.
[12] Yû yit-ngit, Yok-sit ke-têu â-kô to Sṳ-kiam hi-chóng â-pâ ke yòng-è.
[13] Yî-set-lie̍t tui Yok-sit kóng: “Ngì ke-têu â-kô chhai Sṳ-kiam chóng yòng-è. Lòi â, ngài oi phai ngì to ke-vi hi-khon kì-têu.” Yok-sit en-kóng: “Hó! Ngài lòi-hi!”
[14] Kiâ-pâ fûn-fu kì kóng: “Ngì hi-khon ngì ke-têu â-kô yû phìn-ôn mò? Yòng-khiùn ôn-chhiòn mò? Yèn-heu chón-lòi lâu ngài kóng.” Kiâ-pâ chhiu sung kì lì-khôi Hî-pak-lùn sân-lak. Yok-sit hi-to Sṳ-kiam,
[15] chhai yâ-ngoi mì-lu. Yû yit-ke ngìn tù-tó kì, mun kì: “Ngì chhìm má-ke?”
[16] Kì en-kóng: “Ngài oi chhìm ngâ-kô. Chhiáng ngì lâu ngài kóng, kì-têu chhai nai-vi chóng yòng-è?”
[17] Ke-ngìn kóng: “Kì-têu yí-kîn chéu lé. Ngài thâng-tó kì-têu kóng oi-to Tô-thân hi.” Só-yî Yok-sit hi-kiuk kì ke-têu â-kô, chhai Tô-thân chhìm-tó kì-têu.
[18] Kì-têu yén-yén chhiu khon-tó Yok-sit. Kì hàn-màng hàng-to yî-chhièn, kì-têu chhâm-siòng oi hoi-sí kì.
[19] Kì-têu pí-chhṳ́ kóng: “Khon â, ke-chak pot-mung ke ngìn lòi lô!
[20] Lòi â! Ngài-têu chhṳ̀-thet kì, chiông sṳ̂-thí fit-to châu-chiáng tú, kóng kì he pûn yâ-chhu sṳ̍t-thet; khon kì ke mung oi ngióng-pân sṳ̍t-hien ô!”
[21] Lî-phien thâng-tó kì-têu ke yîm-mèu, tông-sióng kiu Yok-sit; kì kóng: “Ngài-têu m̀-hó chhṳ̀ kì,
[22] m̀-hó liù kì ke hiet! Chiông kì fit-lo̍k khóng-yâ ke tún-súi-fut tú chhiu hó! M̀-hó sông-hoi kì!” Lî-phien án-ngiòng kóng he yîn-vi kì oi tui kì-têu ke sú-chûng chiông Yok-sit kiu chhut-lòi, chiông kì sung-chón â-pâ ke-vi hi.
[23] Yok-sit yit-to kiâ-kô ke-vi, kì-têu chhiu khiòng-khiòng thot-thet kì ke-liâng fâ-set ke chhòng-sâm,
[24] chiông kì chok hí-lòi, fit-lo̍k tún-súi-fut tú; ke tún-súi-fut he khûng ke, tî-poi mò súi.
[25] Kì-têu chhô hâ-lòi sṳ̍t-fan ke sṳ̀, ngo-thèu fut-yèn khon-tó yit-khiùn Yî-sṳ̍t-mâ-li-ngìn ke lo̍k-thò sông-chhui tui Kî-lie̍t lòi, oi-hi Âi-khi̍p; kì-têu ke lo̍k-thò chai tông-tô hiông-liau, nen-hiông lâu mu̍t-yo̍k.
[26] Yù-thai tui kì ke-têu hiûng-thi kóng: “Ngài-têu chhṳ̀-sí chhṳ-kâ ke ló-thâi, chiông kì ke hiet khong hí-lòi yû má-ke hó-chhu nè?
[27] Ên-têu lòi chiông kì mai-pûn liá-têu Yî-sṳ̍t-mâ-li-ngìn, án-ngiòng ên-têu m̀-sṳ́ chhut-sú sông-hoi kì; yîn-vi kì hàn-he ên-têu ke ló-thâi, ên-têu ke kut-ngiuk chṳ̂-chhîn.” Kì ke-têu hiûng-thi chhiòn-phu chan-sṳ̀n.
[28] Yû Mí-thien ke sên-lî ngìn kîn-ko ke sṳ̀, kì-têu chhiu tui fut-tú chiông Yok-sit lâi sông-lòi, kóng-thin ngi-sṳ̍p chak ngiùn-pi, chiông kì mai-pûn Yî-sṳ̍t-mâ-li-ngìn; liá-têu ngìn chhiu chiông Yok-sit tai-to Âi-khi̍p hi.
[29] Lî-phien chón-to fut ke sùn-thèu, fat-hien Yok-sit m̀ kien-thet lé, chhiu chhin sông-sîm, chhá-lan kì ke sâm.
[30] Kì chón-to khì-thâ hiûng-thi ke-vi kóng: “Se-ngìn-è m̀ kien-thet lé! Ngài oi ngióng-pân chang-hó nè?”
[31] Kì-têu kiet-thin chhṳ̀ yit-chak sân-yòng-kú, chiông Yok-sit ke-liâng fâ-set ke chhòng-sâm ngiam-têu yòng-hiet,
[32] tai-chón kiâ-pâ ke-vi, kóng: “Ngài-têu chhìm-tó liá-liâng chhòng-sâm; ngin yit-ha, he ngiâ lai-é ke sâm mò?”
[33] Ngâ-kok ngin-chhut, chhiu kóng: “Liá he ngâ lai-é ke chhòng-sâm! Yit-thin he yâ-chhu sṳ̍t-thet kì! Yok-sit pûn yâ-chhu chhá-lan lé!”
[34] Ngâ-kok pî-sông to chhá-lan ngoi-sâm, chok mà-sâm, vi kiâ lai-é ôi-sông chhin-tô ngit.
[35] Kiâ ke-têu chṳ́-ńg chhiòn-phu lòi ôn-ví kì, chúng-he kì m̀ chiap-su ôn-ví. Kì kóng: “Ngài chhiu-he lo̍k yîm-kiên, hàn-voi vi ngâ lai-é pî-sông!” Án-ngiòng, Yok-sit ke â-pâ chhiu yit-chhṳ̍t vi kì ôi-sông.
[36] Thùng-sṳ̀, ke-têu Mí-thien-ngìn chhai Âi-khi̍p chiông Yok-sit mai-pûn Âi-khi̍p-vòng ke yit-ke kôn-yèn — sṳ-ví-chóng Pô-thì-fa̍t.