[1] Â-pak-làn kiú-sṳ̍p kiú-se ke sṳ̀, Song-chú hiong kì hién-hien, tui kì kóng: “Ngài he chhiòn-nèn ke Song-ti. Ngì oi chhai Ngài mien-chhièn hàng-sṳ, cho yit-ke mò-hó hiàm ke ngìn.
[2] Ngài oi lâu ngì li̍p-yok, pûn ngì yû chhin-tô chṳ́-sûn.”
[3] Â-pak-làn mien phu̍k-to thi-song; Song-ti yu tui kì kóng:
[4] “Ngài lâu ngì li̍p ke yok he án-ngiòng: Ngì oi cho chhin-tô koet-kâ ke â-pâ.
[5] Tui liá-ha khôi-sṳ́, ngì ke miàng m̀-hó chai ôn-to Â-pak-làn, oi ham-cho Â-pak-lâ-hón, yîn-vi Ngài li̍p ngì cho chhin-tô koet-kâ ke â-pâ.
[6] Ngài oi su-pûn ngì chhin-tô chṳ́-sûn; ngì ke chṳ́-sûn voi kien-li̍p chhin-tô koet-kâ, ngì ke heu-thoi voi chhut chhin-tô kiûn-vòng.
[7] “Ngài oi kiên-thin Ngài lâu ngì pin ngì sṳ-sṳ thoi-thoi chṳ́-sûn li̍p ke yok, cho yún-yén ke yok. Ngài oi cho ngì lâu chṳ́-chṳ́ sûn-sûn ke Song-ti.
[8] Ngài oi chiông ngì liá-ha cho lî-hak só he̍t ke thi-fông, chhiu-he Kâ-nàm chhiòn-thi, su-pûn ngì lâu ngì ke heu-thoi, cho yún-yén ke sán-ngia̍p; Ngài ya oi cho kì-têu ke Song-ti.”
[9] Song-ti tui Â-pak-lâ-hón kóng: “Ngì lâu ngì ke heu-thoi ya yit-thin oi sṳ-sṳ thoi-thoi chûn-sú Ngài ke yok.
[10] Ngì-têu tông-chûng ke se-lai-é chhiòn-phu oi-su kot-lî; liá he Ngài lâu ngì pin ngì sṳ-sṳ thoi-thoi ke chṳ́-sûn só-li̍p ke yok, ngì-têu yit-thin oi chûn-sú.
[11] Tui liá-ha khôi-sṳ́, ngì-têu só-yû ke se-lai-é chhiòn-phu oi su kot-lî; liá he Ngài lâu ngì-têu li̍p-yok ke chṳn-kí.
[12] Ngì-têu sṳ-sṳ thoi-thoi ke se-lai-é, mò-lun he chhṳ-kâ kiung ke, ya-he lâu ngoi-koet ngìn mâi-lòi ke nù-phu̍k, chhut-se thi-pat ngit, chhiòn-phu oi su kot-lî.
[13] Ngì-têu vuk-hâ mî-yit ke se-lai-é oi su kot-lî; liù chhai ngiuk-thí song liá-ke ki-ho, péu-sṳ Ngài lâu ngì-têu li̍p yún-yén ke yok.
[14] Nàm-ngìn mò su kot-lî ke oi tui Ngài ke chṳ́-mìn chûng chhù-thet, yîn-vi kì mò chûn-sú Ngài ke yok.”
[15] Song-ti tui Â-pak-lâ-hón kóng: “Ngì m̀-hó chai ham ngiâ pû-ngiòng Sâ-lòi; kì ke miàng oi kói-cho Sâ-lâ.
[16] Ngài oi su-fuk pûn kì, sṳ́ kì vi ngì kiung yit-ke lai-é. Ngài oi su-fuk pûn kì, pûn kì sàng-cho chhin-tô koet-kâ ke â-mê; kì ke heu-thoi voi chhut kiûn-vòng.”
[17] Â-pak-lâ-hón chhiu phuk chhai thi-song thêu-seu, sîm-tú kóng: “Yit-pak se ke ló-ngìn-kâ, kám hàn-voi kiung? Sâ-lâ yí-kîn kiú-sṳ̍p se, kám hàn-voi kiung?”
[18] Â-pak-lâ-hón tui Song-ti kóng: “Ngióng m̀ pûn Yî-sṳ̍t-mâ-li cho ngài ke ki-sṳ̀n ngìn?”
[19] Song-ti kóng: “Cho-m̀-tet! Ngiâ pû-ngiòng Sâ-lâ yit-thin voi vi ngì kiung yit-ke lai-é, ngì oi lâu kì ôn-miàng Yî-sat. Ngài oi lâu kì pin kì ke chṳ́-chṳ́ sûn-sûn kiên-thin Ngài ke yok; liá he yún-yén ke yok.
[20] Yû-koân Yî-sṳ̍t-mâ-li, Ngài ya oi thâng ngì ke yêu-khiù. Ngài oi su-fuk pûn kì, sṳ́ kì chṳ́-sûn chhin-tô, thoi-thoi siông-chhòn. Kì oi kiung sṳ̍p-ngi ke chhu̍k-chóng; Ngài oi pûn kì ke heu-thoi sàng-cho thai-koet.
[21] Chúng-he Ngài oi lâu Yî-sat kiên-thin Ngài ke yok. To màng-ngièn liá sṳ̀-chiet, Sâ-lâ voi kiung Yî-sat.”
[22] Song-ti lâu Â-pak-lâ-hón kóng-vàn liá-têu fa, chhiu lì-khôi kì sṳ̂n-thiên hi lé.
[23] Chhai ke-ngit, Â-pak-lâ-hón chûn-sú Song-ti ke min-lin, vi kì ke lai-é Yî-sṳ̍t-mâ-li lâu vuk-hâ chhut-se só-yû ke nàm-ngìn, pâu-hàm ke-têu mâi-lòi ke nù-phu̍k, chhiòn-phu hàng kot-lî.
[24] Â-pak-lâ-hón su kot-lî ke sṳ̀ kiú-sṳ̍p kiú-se.
[25] Kiâ lai-é Yî-sṳ̍t-mâ-li su kot-lî ke sṳ̀ he sṳ̍p-sâm se.
[26] Chhai ke-ngit, Â-pak-lâ-hón lâu kiâ lai-é Yî-sṳ̍t-mâ-li khiung-ha su kot-lî.
[27] Só-yû ke nàm-ngìn, mò-lun he vuk-hâ chhut-se ke, ya-he tui ngoi-koet ngìn mâi-lòi ke, lûng-chúng lâu kì khiung-ha su kot-lî.