[1] Án-ngiòng, thiên-thi van-vu̍t lûng-chúng chho-chhè lé.
[2] Thi-chhit ngit Song-ti vàn-sṳ̀n yit-chhiet ke kûng-chok, chhiu thìn-kûng hiet-khun.
[3] Song-ti su-fuk pûn thi-chhit ngit, chiông liá-ngit fûn-phe̍t vì-sṳn, yîn-vi Kì chhai liá-ngit vàn-sṳ̀n yit-chhiet chhóng-chho ke kûng-chok, chhiu thìn-kûng hiet-khun.
[4] Liá chhiu-he thiên-thi chhóng-chho ke lòi-li̍t. Chú Song-ti chhóng-chho thiên-thi ke sṳ̀-chiet,
[5] thi hàn-màng yû chhó-muk, chhoi hàn-màng sâng chhut-lòi, yîn-vi Chú Song-ti hàn-màng lo̍k-yí chhai thi-song, ya màng yû-ngìn kâng-chung;
[6] chúng-he yû súi tui thi-hâ yúng-chhut, chṳ̂-yun chhiòn-thi.
[7] Heu-lòi Chú Song-ti yung thi-song ke nài chho ngìn, chiông sâng-miang ke hi phùn-ngi̍p kì ke phi-khûng, kì chhiu sàng-cho yû sâng-miang ke ngìn.
[8] Chú Song-ti chhai tûng-fông sat-li̍p Yî-thien-yèn, chiông Kì chhóng-chho ke ngìn piong chhai ke-vi.
[9] Chú Song-ti pûn thi sâng-chhut kok-chúng chiâng ke su-muk, kiet-chhut hó-sṳ̍t ke kó-chṳ́. Chhai yèn tûng-ông yû yit-thèu sâng-miang-su, ya yû yit-thèu nèn sṳ́-ngìn fûn-phe̍t san-ok ke su-é.
[10] Yû yit-thiàu thai-hò tui Yî-thien liù-chhut, chṳ̂-yun ke-yèn, tui Yî-thien fûn-cho si-thiàu hò-pa.
[11] Thi-yit thiàu ôn-to Pí-sun-hò, liù-ko Ha̍p-fî-lâ chhiòn-thi, chhai ke-vi yû kîm-é.
[12] Ke-vi ke kîm-é chhin-sùn, ke-vi yu-yû kô-kui ke hiông-liau lâu pó-sa̍k.
[13] Thi-ngi thiàu ôn-to Kî-hiun-hò, liù-ko Kú-sṳ̍t chhiòn-thi.
[14] Thi-sâm thiàu ôn-to Tí-kiet-lî-sṳ̂-hò, liù-ko Â-sut tûng-phu. Thi-si thiàu ôn-to Yu-fat-lâ-tí-hò.
[15] Chú Song-ti chiông ke-ngìn piong chhai Yî-thien-yèn, ham kì hi kâng-chung, khon-sú ke-yèn.
[16] Chú Song-ti fûn-fu ke-ngìn kóng: “Yèn-tú kok-chúng su-táng ke kó-chṳ́, ngì chhiòn-phu cho-tet sṳ̍t,
[17] chúng-he, ke-thèu nèn sṳ́-ngìn fûn-phe̍t san-ok ke su-é só-kiet ke kó-chṳ́, ngì yit-thin cho-m̀-tet sṳ̍t; yîn-vi ngì sṳ̍t ke sṳ̀ yit-thin voi sí!”
[18] Heu-lòi, Chú Song-ti kóng: “Ke-ngìn kû-tân sên-fa̍t m̀-hó, Ngài oi vi kì chho yit-ke tên-tui ke phân lòi pông-chhu kì.”
[19] Chú Song-ti yung nài chho thi-song kok-chúng ke chéu-chhu, lâu khûng-chûng kok-chúng ke fî-niâu, chhiòn-phu tai-to ke-ngìn mien-chhièn, khon kì ngióng-pân ôn-miàng. Ke-ngìn ngióng-pân ôn kok-chúng thung-vu̍t, ke chhiu-he kì ke miàng.
[20] Ke-ngìn chhiu lâu só-yû ke thèu-sâng, khûng-chûng ke fî-niâu, yâ-thi ke chéu-chhu ôn-miàng; chúng-he ke-ngìn chhìm m̀-tó tên-tui ke phân hó pông-chhu kì.
[21] Chú Song-ti pûn ke-ngìn tông hó-soi. Kì soi-thet ke sṳ̀, Chú Song-ti nâ-chhut kì ke yit-kî yám-pâi-kut, yèn-heu chiông ngiuk ha̍p chón-hi.
[22] Chú Song-ti chhiu yung ke-ngìn sṳ̂n-song só nâ-chhut ke-kî yám-pâi-kut chho yit-ke ńg-ngìn, chiông kì tai-to ke-ngìn mien-chhièn.
[23] Ke-ngìn kóng: “Liá chang he ngài kut-chûng ke kut, ngiuk-chûng ke ngiuk; kì oi ham-cho ‘ńg-ngìn’, yîn-vi kì he tui ‘nàm-ngìn’ sṳ̂n-song nâ chhut-lòi ke.”
[24] Yîn-vi án-ngiòng, nàm-ngìn oi lì-khôi kì ke yà-ôi, lâu pû-ngiòng kiet-ha̍p, lióng-sà sàng-cho yit-thí.
[25] Ke-ngìn lâu kiâ pû-ngiòng lióng-sà chhak-sṳ̂n lu-thí, chúng-he kì-têu pin-mò khon-cho kien-seu.