[1] Yî-sat ham Ngâ-kok to mien-chhièn lòi, chuk-fuk kì, yu fûn-fu kì kóng: “Ngì m̀-hó lâu Kâ-nàm ke se-moi-é kiet-fûn.
[2] Ngì oi hi Mî-sok-put-tha̍t-mí-â, to ngiâ chiá-kûng Pí-thú-li ke kâ, tui ngiâ-khiû Lâ-pân ke moi-é tông-chûng thó yit-ke cho pû-ngiòng.
[3] Ngien chhiòn-nèn ke Song-ti su-fuk ngì, pûn ngì kiung tô-tô chṳ́-ńg, sàng-cho chhin-tô mìn-chhu̍k ke chú-siên!
[4] Ngien Kì su-fuk pûn ngì lâu ngì ke chṳ́-sûn, chhiong su-fuk Â-pak-lâ-hón yit-yong. Ngien ngì voi tet-tó ngì liá-ha cho lî-hak só he̍t ke thi-fông, chhiu-he Song-ti su-fuk pûn Â-pak-lâ-hón ke thú-thi.”
[5] Án-ngiòng, Yî-sat ham Ngâ-kok hi Mî-sok-put-tha̍t-mí-â, to kiâ chiá-kûng Â-làn-ngìn Pí-thú-li ke lai-é Lâ-pân ke-vi. Lâ-pân he Li-pak-kâ ke â-kô, Ngâ-kok lâu Yî-so ke mû-khiû.
[6] Yî-so thâng-tó Yî-sat chuk-fuk Ngâ-kok, sung kì to Mî-sok-put-tha̍t-mí-â thó pû-ngiòng, ya tî Yî-sat chuk-fuk kì ke sṳ̀ fûn-fu kì m̀-hó lâu Kâ-nàm ke se-moi-é kiet-fûn,
[7] yu khon-tó Ngâ-kok thâng-chhiùng yà-ôi to Mî-sok-put-tha̍t-mí-â hi.
[8] Yî-so chang-tî kiâ-pâ Yî-sat mò fôn-hí kì tui Kâ-nàm thó ke pû-ngiòng.
[9] Só-yî, kì to Â-pak-lâ-hón ke lai-é Yî-sṳ̍t-mâ-li ke-vi, lâu kiâ moi-é Mâ-ha̍p-lâ kiet-fûn; Mâ-ha̍p-lâ chhiu-he Nì-pai-yok ke ló-moi.
[10] Ngâ-kok lì-khôi Phe̍t-sṳ-pâ, oi hi Ha̍p-làn.
[11] Ngit-thèu lo̍k-sân ke sṳ̀, kì lòi-to yit-ke thi-fông, chhai ke-vi ko-ya; kì pân yit-chak sa̍k-thèu cho chṳ́m-thèu, chhai ke-vi soi-muk.
[12] Kì pot-mung khon-tó yit-kî thôi-é tui thi-song thûng-to thiên-táng, thôi-é táng-kô yû Song-ti ke sṳ́-chá sông-sông hâ-hâ.
[13] Kì yu khon-tó Song-chú khî chhai kì sùn-thèu, tui kì kóng: “Ngài he Song-chú, he ngiâ-kûng Â-pak-lâ-hón ke Song-ti lâu ngiâ-pâ Yî-sat ke Song-ti; Ngài oi chiông ngì liá-ha soi ke thú-thi su-pûn ngì lâu ngì ke heu-thoi.
[14] Kì-têu oi chhiong thi-song ke sâ-é án-tô, hiong tûng-sî nàm-pet fat-chán. Ngài oi yîn-vi ngì lâu ngì ke heu-thoi su-fuk pûn sṳ-kie kok-koet.
[15] Ngài oi lâu ngì khiung-ha; mò-lun ngì to nai-vi, Ngài oi pó-fu ngì, ya oi tai-liâng ngì chón-to liá thi-fông. Ngài chhie̍t-tui m̀-voi lì-khôi ngì, yit-thin voi sṳ̍t-hien tui ngì ke yin-hí.”
[16] Ngâ-kok soi yit-kau siáng, kóng: “Song-chú khok-sṳ̍t chhai liá thi-fông, ngài ngióng m̀-tî!”
[17] Kì chhiu chho̍k-kiâng, yu-kóng: “Liá thi-fông sṳ̀n-sṳn khó-vi, yit-thin he Song-ti ke thien, thûng-to thiên-thìn ke mùn.”
[18] Thi-ngi ngit tá-chó, Ngâ-kok hong hí-lòi, chiông kì cho chṳ́m-thèu ke-chak sa̍k-thèu tun hí-lòi cho ki-ngiam-pî, chhai sa̍k-thèu táng lìm-yù hien-pûn Song-ti.
[19] Kì chiông ke thi-fông ôn-to Pak-thi̍t-li. (Liá-ke sàng yî-chhièn ham-cho Lu-sṳ̂.)
[20] Ngâ-kok hí-ngien kóng: “Na-he Song-ti lâu ngài khiung-ha, chhai lu-thù chûng pó-fu ngài, su-pûn ngài sṳ̍t ke, chok ke,
[21] pûn ngài phìn-ôn chón-to ku-hiông, Song-chú khok-sṳ̍t chhiu-he ngài ke Song-ti.
[22] Liá-chak cho ki-ngiam-pî ke sa̍k-thèu, oi sàng-cho kin-pai Song-ti ke sṳn-só. Ngài oi chiông Ngì su-pûn ngài ke yit-chhiet hien sṳ̍p-fûn chṳ̂-yit pûn Ngì.”