[1] Yok-sit min-lin kón-kâ kóng: “Cheu kì-têu ke thèu-sâng só-nèn pà ke, chiông liòng-sṳ̍t chông-mân tak-sà ke thoi-é, yu chiông tak-sà ke chhièn piong-chón thoi-tú.
[2] Ke chui heu-sâng ke, ngì oi chiông ngài ke ngiùn chiú-pî lâu kì ke chhièn piong chhai kì ke thoi-tú.” Kón-kâ chhiu cheu Yok-sit só fûn-fu ke hi-cho.
[3] Thi-ngi ngit tá-chó, liá-têu hiûng-thi tet-tó phî-chún chhiu tai-tén kì-têu ke lì-è lì-khôi.
[4] Kì-têu lì ke-sàng mò kí-yén, Yok-sit chhiu tui kón-kâ kóng: “Ngì kón-kín hi-tûi ke-têu ngìn, tûi-tó ngìn ke sṳ̀ oi mun kì-têu kóng: ‘Ngì-têu cho-má-ke yung-ok po-san nè?
[5] Cho-má-ke thêu ngài chú-ngìn ke ngiùn-pî nè? Ke pî-é he kì lîm-chiú yung ke, ya he kì puk-koa yung ke; ngì-têu fam-tó ngiàm-chhung ke chhui lé!’ ”
[6] Kón-kâ tûi-tó kì-têu ke sṳ̀, chhiu tui kì-têu kóng liá-têu fa.
[7] Kì-têu en kì kóng: “Sîn-sâng! Ngì cho-má-ke kóng liá-chúng fa nè? Ngiâ phu̍k-ngìn fat-sṳ, ngài-têu mò cho án-ngiòng ke sṳ.
[8] Ngì tî, ngài-têu ya chiông song-pái thoi-tú fat-hien ke-têu chhièn, tui Kâ-nàm tai chón-lòi vàn ngì; án-ngiòng, ngài-têu ngióng hàn-voi thêu ngiâ chú-ngìn vuk-hâ ke kîm-ngiùn?
[9] Sîn-sâng! Na-he ngì chhai phu̍k-ngìn tông-chûng, mò-lun chhai má-ngìn ke thoi-tú chhìm-tó chiú-pî, ke-ngìn chhiu kôi-sí; ngài-têu khì-thâ ke ngìn ya kâm-ngien cho ngì ke nù-chhòi.”
[10] Kón-kâ kóng: “Ngài thùng-yi ngì-têu ke fa. Chúng-he ngài chṳ́-yû oi ke thêu-chéu chiú-pî ke ngìn liù hâ-lòi cho ngài ke nù-chhòi; khì-thâ ke ngìn mò chhui, cho-tet chhṳ-yù chón-hi.”
[11] Thai-kâ chhiu kiak-kiak chiông thoi-é nâ hâ-lòi piong chhai thi-song, tak-sà tá-khôi chhṳ-kâ ke thoi-é.
[12] Kón-kâ siòng-se kiám-chhà, tui cho thai-kô ke khôi-sṳ́, sêu-to chui-se ke. Kiet-kó chiú-pî chhai Phien-ngâ-mén ke thoi-tú chhìm-tó.
[13] Ke-têu hiûng-thi fî-sòng pî-sông, chhiu chiông sâm chhá-lan, yu chiông pâu-fu̍k piong chhai lì-è ke poi-nòng, to-chón sàng-tú hi.
[14] Yù-thai lâu khì-thâ ke hiûng-thi to-chón Yok-sit vuk-hâ ke-sṳ̀, Yok-sit hàn chhai ke-vi; kì-têu chhiu chhai kiâ mien-chhièn phu̍k chhai thi-song.
[15] Yok-sit tui kì-têu kóng: “Ngì-têu ngióng-pân cho án-ngiòng ke sṳ? Kám m̀-tî ngài liá-chúng ngìn voi puk-koa, tî ngì-têu ke hàng-thung mâ?”
[16] Yù-thai en kì: “Thai-ngìn â! Ngài-têu hàn-yû má-ke fa hó-kóng nè? Hàn-kám au ya-he hêm yên-vóng mò? Song-ti yí-kîn chhà-chhut ngài-têu ke chhui! Liá-ha m̀ tân-chhiang ke pûn-ngìn sêu-tó yû chiú-pî ke, ngài-têu chhiòn-phu oi cho thai-ngìn ke nù-chhòi lé.”
[17] Yok-sit kóng: “Ngài chhie̍t-tui m̀-voi cho án-ngiòng ke sṳ. Ke nâ-chéu chiú-pî ke chang yin-kôi cho ngài ke nù-phu̍k; khì-thâ ke ngìn khó-yî phìn-phìn ôn-ôn chón ngiâ-pâ ke-vi hi.”
[18] Yù-thai hàng-khiûn, tui Yok-sit kóng: “Thai-ngìn â! Khiù ngì thâng ngài kóng, m̀-hó tui ngiâ phu̍k-ngìn fat-khién. Tui ngài lòi-kóng, ngì he chhiong vòng khiung-yong.
[19] Thai-ngìn sṳt mun-ko phu̍k-ngìn kóng: ‘Ngì-têu yû â-pâ ya-he khì-thâ hiûng-thi mò?’
[20] Ngài-têu en thai-ngìn kóng: ‘Ngài-têu yû yit-vi ngièn-ló ke â-pâ, hàn-yû yit-ke mân ló-thâi, he ngâ-pâ ngièn-ló ke sṳ̀ kiung ke. Liá mân ló-thâi ke chhîn â-kô yí-kîn ko-sṳ̂n lé; kì he kì-têu khiung-ôi tân-tân liù hâ-lòi ke lai-é, só-yî â-pâ tông-siak kì.’
[21] Ngì tui phu̍k-ngìn kóng: ‘Chiông kì tai-lòi liá-vi, pûn ngài chhîn-ngién khon-tó kì.’
[22] Ngài-têu en thai-ngìn kóng: ‘Liá-ke se-ngìn-è cho-m̀-tet lì-khôi kiâ-pâ; na-he lì-khôi, kiâ-pâ yit-thin voi sí-thet.’
[23] Chúng-he ngì tui phu̍k-ngìn kóng: ‘Mò ngiâ mân ló-thâi khiung-ha lòi, m̀-sṳ́ sióng-oi kien ngài ke mien!’
[24] “Ngài-têu chón-to ngiâ phu̍k-ngìn — ngâ-pâ ke-vi, chhiu chiông thai-ngìn ke fa lâu kì kóng.
[25] Heu-lòi, kì oi ngài-têu chai-lòi tha̍k-liòng.
[26] Ngài-têu tui kì kóng: ‘Ngài-têu m̀-kám hi. Mân ló-thâi na lâu ngài-têu khiung-ha hi, ngài-têu chhiu kám-hi; mân ló-thâi mò lâu ngài-têu khiung-ha hi, ngài-têu cho-m̀-tet kien ke-ngìn ke mien.’
[27] Ngì ke phu̍k-ngìn — ngâ-pâ tui ngài-têu kóng: ‘Ngì-têu tî ngâ pû-ngiòng Lùi-kiet chṳ́-yû lâu ngài kiung lióng-ke lai-é,
[28] khì-chûng yit-ke yí-kîn lì-khôi ngài hi lé. Kì lì-khôi yî-heu, ngài mò-chai khon-tó kì; kì yit-thin he pûn yâ-chhu sṳ̍t-thet lé!
[29] Liá-ha ngì-têu oi lièn liá se ke ya tai-chéu. Na-he kì chhai lu-hong tù-tó má-ke yi-ngoi, ngì-têu chhiu voi hoi ngài liá-ke mân-thèu pha̍k-mô ke ló-ngìn-kâ, pî-pî chhám-chhám lo̍k yîm-kiên hi.’ ”
[30] Yù-thai ki-siu̍k kóng: “Ngâ-pâ ke miang lâu liá se-ngìn-è ke miang siông-lièn. Na-he ngài-têu mò tai liá se-ngìn-è chón-hi, ngiâ phu̍k-ngìn — ngâ-pâ mò khon-tó liá se-ngìn-è, kì yit-thin voi mò-miang! Ngài-têu chhiu voi hoi ngiâ phu̍k-ngìn — ngài-têu ke â-pâ mân-thèu pha̍k-mô, pî-pî chhám-chhám lo̍k yîm-kiên hi!
[32] M̀ tân-chhiang án-ngiòng, ngài yû hiong ngâ-pâ pó-chṳn, lâu kì kóng: ‘Na-he ngài mò chiông mân ló-thâi tai chón-lòi pûn â-pâ, ngài kâm-ngien yit-sên-ngìn tâm-tông liá-chhui.’
[33] Thai-ngìn â, liá-ha khiù ngì pûn ngài liù hâ-lòi, thoi liá se-ngìn-è cho ngì ke nù-chhòi. Chhiáng pûn kì lâu ke-têu â-kô khiung-ha chón-hi.
[34] Na-he liá se-ngìn-è mò lâu ngài khiung-ha chón-hi, ngài oi ngióng-pân chón-hi kien ngâ-pâ nè? Ngài m̀ phan-tet khon-tó châi-fo lìm-to ngâ-pâ â!”