[1] Song-chú tui Nò-â kóng: “Ngì lâu chhiòn-kâ oi-ngi̍p thai-sòn hi, yîn-vi Ngài fat-hien chhai liá sṳ-thoi chûng, chṳ́-yû ngì chhai Ngài mien-chhièn he chṳn-chhṳ̍t ke ngìn.
[2] Chûng-kau lî-ngì thin-cho chhiang-li ke kok-chúng thung-vu̍t, ngì oi tai chhit kûng chhit mà; kok-chúng mò chhiang-li ke thung-vu̍t, oi tai yit kûng yit mà.
[3] Fî-niâu ya oi tai chhit kûng chhit mà, pûn kì-têu pó-miang liù-chúng chhai chhiòn-thi;
[4] yîn-vi chai-ko chhit-ngit, Ngài oi lo̍k thai-súi si-sṳ̍p ngit-ya, chiông Ngài só chhóng-chho ke yit-chhiet sâng-vu̍t lûng-chúng tui thi-song chhù-me̍t.”
[5] Nò-â chhiu cheu Song-chú só fûn-fu ke hi-cho.
[6] Nò-â liuk-pak se ke sṳ̀, thai-súi fam-lam chhai thi-song.
[7] Nò-â chhiu lâu kiâ pû-ngiòng, lai-é, sîm-khiû chin-ngi̍p thai-sòn sám thai-súi.
[8] Chhiang-li lâu mò chhiang-li ke thung-vu̍t, fî-niâu, lâu thi-song yit-chhiet ke phà-chhùng,
[9] lûng-chúng yit-tui yit-tui, yû-kûng yû-mà, thèn Nò-â ngi̍p thai-sòn, he cheu Song-ti fûn-fu Nò-â ke.
[10] Chhit-ngit heu, thai-súi fam-lam chhai thi-song.
[11] Nò-â liuk-pak se ke-ngièn, ngi-ngie̍t sṳ̍p-chhit ke-ngit, chhṳ̂m-yên só-yû ke thai súi-ngièn lie̍t khôi-lòi, thiên-táng ke súi-mùn ya tá khôi-lòi,
[12] thai-yí lo̍k chhai thi-song si-sṳ̍p ngit-ya.
[13] Chhiu chhai ke-ngit, Nò-â lâu kiâ pû-ngiòng, kiâ lai-é Sám, Hàm, Ngâ-fut, pin sâm-ke sîm-khiû lûng-chúng chin-ngi̍p thai-sòn.
[14] Kì-têu lâu kok-chúng kok-lui ke yâ-chhu, thèu-sâng, thi-song ke phà-chhùng, pin fî-niâu chhiòn-phu chin-ngi̍p thai-sòn.
[15] Yit-chhiet yû sâng-miang, yû hiet-hi ke sâng-vu̍t, lûng-chúng yit-tui yit-tui thèn Nò-â chin-ngi̍p thai-sòn.
[16] Ke-têu ngi̍p-hi ke thung-vu̍t, chhiòn-phu yû-kûng yû-mà, he cheu Song-ti fûn-fu Nò-â ke. Yèn-heu Song-chú thoi Nò-â koân-mùn.
[17] Thi-song cho thai-súi si-sṳ̍p ngit. Súi chong hí-lòi, thai-sòn chhai súi-mien song phò hí-lòi.
[18] Súi chhai thi-song ye̍t-chong ye̍t-kô, thai-sòn chhai súi-mien song phêu-lòi phêu-hi.
[19] Thi-song ke súi ye̍t-lòi ye̍t-thai, chiông thiên-ha yit-chhiet ke kô-sân mu̍t chhai súi-tái.
[20] Thai-súi chhêu-ko sân-táng chhit kûng-chhak, só-yû kô-sân mu̍t chhai súi-tái.
[21] Thi-song só-yû ke thung-vu̍t, chhiu-he fî-niâu, thèu-sâng, yâ-chhu, phà-chhùng, pin só-yû ke ngìn lûng-chúng sí chhiang-chhiang.
[22] Só-yû chhai thi-song phi-khûng yû-hi ke sâng-vu̍t lûng-chúng sí-thet.
[23] Thi-song só-yû ke sâng-vu̍t, tui ngìn to thèu-sâng, phà-chhùng, lâu fî-niâu, lûng-chúng tui thi-song chhù-me̍t; chṳ́-yû liù-hâ Nò-â pin ke-têu lâu kì khiung-ha chhai thai-sòn tú ke.
[24] Thai-súi mu̍t-thet thai-thi yit-pak ńg-sṳ̍p ngit.