[1] Obboleeytii teenya Feebeen, tan gargaartuu waldaya kiristaanaa Kancheriyaa taatee kaadamtu saniin hadaraa isinitti kannadha.
[2] Isiiniis tan Gooftaa waan taateef jecha, simannaa warra kiristaanaaf tahuun isii simaa! Waan barbaachisu hundumaaniis isii gargaaraa! Isiin namoota hedduuf ammaas anuma illee fuu gargaarsa tan gootee dha.
[3] Hojii Kiristoos Yesuus keeysatti warra na wajjiin hirmaatan, Phiriskaa fi Aqiilaaf, nagaya kiyya naaf dhiheeysaa!
[4] Isaan kunoo du'a irraa na eewaluuf jecha, warra morma isaanii tuu kannanii dha. Ani isaan niin galateeyfadha; anuma qofa odoo hin tahin ammaas, waldayoonni kiristaanaa warri saboota qomoo Israa'el hin tahin hundi niis isaan ni galateeyfatu.
[5] Waldicha mana isaanitti walitti qabamuttiis hadaraa, nagaya kiyya anaaf himaa! Ephanexos saahibticha kiyya, warra Asiyaatti Kiristoositti amanan keeysaa angafa kan taheef, nagaya kiyya anaaf dhiheeysaa!
[6] Maariyaam, dubartittii jabaattee isin kaadamtu saniif nagaya kiyya anaaf dhiheeysaa!
[7] Andronikoosii fi Yuniyaas, rahimman kiyya, warra anaa wajjiin hidhamanii turaniif, nagaya kiyya naaf dhiheeysaa! Isaan ergamoota keeysaa warra beekamo, ammaas warra anaan dura Kiristoositti amane.
[8] Amphiliiyaaxos kan Gooftaa keeysaan saahiba kiyya taheefiis nagaya kiyya anaaf himaa!
[9] Urbaanos namticha hojii Kiristoos irratti shariika kiyya taheef, Isxaakis saahiba kiyyaafiis nagaya kiyya naaf dhiheeysaa!
[10] Apheles namticha fitinamee kan Kiristoos tahuun isaa beekame saniifiis nagaya kiyya anaaf dhiheeysaa! Namoota haaskaa Arisxobulos keeysaa dhufanitti nagaya kiyya anaaf himaa!
[11] Herodiyoon namticha fira kiyyaatti nagaya kiyya anaaf himaa! Haaskaa Naarksos keeysaa warra Gooftatti amananiif nagaya kiyya anaaf dhiheeysaa!
[12] Triifeenee fi Triifaasee warra hojii Gooftatti tattaafachaa jiranittiis nagaya kiyya anaaf himaa! Pharsiis jaalatamtuu tan hojii Gooftatti hedduu carraayxeef nagaya kiyya anaaf dhiheeysaa!
[13] Ruufoos kan hojii Gooftatti filatamee fi akkasumatti ammaas haadha isaa tan anaafiis haadha taatetti, nagaya kiyya anaaf himaa!
[14] Asinkriixos, Filegoon, Hermees, Phaaxrobaas, Hermaasii fi kiristaanota isaan bira jiran hundumaaf nagaya kiyya anaaf dhiheeysaa!
[15] Filologoosii fi Yuliyaatti, Neryoosii fi obboleeytii isaatti Olimphaasittiis, kiristaanota warra isaan bira jiran hundumaafiis nagaya kiyya anaaf dhiheeysaa!
[16] Dhungoo qulqulluu obbolummaa tiin wal dhudhungadhaa! Waldayoonni Kiristoos hundinuu nagaya isiniif dhaamu.
[17] Yaa obboleeyyan koo! Warra barsiisa isin fudhattaniin mormuu dhaan, yaada namootaa gargar baasanii, amantii irraa gufachiisan san akka irraa if eeydan cimsee tiin isinitti hima; isaan kanneen irrumaa fagaadhaa!
[18] Warri waan akkasii hojjatan kun garaa isaanii guuttachuuf hojjatu malee, Kiristoos Gooftaa keenyaafii miti; isaan dubbii kijibaa tan gurra namaatti toltu, warra sharrii hin qabnetti odeeysuu dhaan ni gowwoomsu.
[19] Namoonni hundinuu Wangeelaaf ajajamuu keeysan dhagayanii ti jiru; kanaafiis ani waa'ee keeysaniif niin gammada. Waan gaariif hikmaa akka qabaattan, waan hamaaf ammoo yaada nassaba akka qabaattaniin barbaada.
[20] Rabbi Abbaan nagayaa kunoo, dafee Sheeyxaana miila keeysan jalatti ni caccaphsa; ni'imaan Gooftaa keenya Yesuus isiniin wajjiin haa taatu!
[21] Ximotewoos shariikni kiyyaa fi ammaas firoottan kiyya Luukiyosii fi Yaason, Sosiiphaaxrosiis nagaya isiniif dhaamu.
[22] Ani Xerxiwos ergaa tana barreeysuun kan gargaare, nagayaan isin gaafadha.
[23] Gaayos, kan nuu fi namoota waldaya kiristaanaa kanaa hundumaa mana isaatti simatees, nagaya isiniif erga; Erasxos inni horii qabduun mandarichaa, obboleeysi keenya Ku'arxosiis nagaya isiniif dhaamu.
[24] [Ni'imaan Gooftaa keenyaa Yesuus Kiristoos hunduma keeysaniin wajjiin haa taatu! Aammiin!]
[25] Rabbi akka Wangeela kiyyaatti, ammaas Yesuus Kiristoos kan itti lallabametti, akka mullachuu hiccitii bara dheeraa jalqabee odoo hin dubbatamin turtettiis, amantitti isin jabeeysuu ni dandaya.
[26] Amma ammoo hiccitiin sun zaahir baatee ti jirti; akka Rabbi inni bara baraan jiraatu ajajettiis, gara amantitti, gara ajajamuttiis isaan geeysuuf kitaaba nabiyyootaa tiin saboota hundumatti beeysifamee ti jira.
[27] Karaa Yesuus Kiristoosiin Rabbii tokkicha hikmaa qabuuf hamdiin bara baraan haa taatu! Aammiin!