[1] Yaa obboleeyyan koo, isin warra seera hubattanittiin dubbadha; seerri hanga namni lubbuun jiru qofa nama irratti gooftummaa akka qabu hin beeytanii?
[2] Fakkeenyaaf dubartiin heerumte takka, hanga jaarsi isii lubbuun jiru qofa seeraan itti hidhamtee ti jirti; jaarsi isii eega du'e booda ammoo, seera isiin jaarsa isii sanittiin hidhamteen irraa hiikamuu isii ti.
[3] Eegasuu haala kanatti jaarsi isii oduma lubbuun jiruu, dhiira biraa tiin wajjiin yoo galte, ejjituu dha jedhamti; jaarsi isii eega du'e booda ammoo, isiin seera san irraa waan hiikamteef jecha, dhiira biraa yoo heerumte ejjituu hin jedhamtu.
[4] Akkasumatti yaa obboleeyyan koo, isin warri dhagna qaama Kiristoos taatan, seera isin hidhe jalaa du'uun hiikamtanii ti jirtu. Kana waan taheef eegasuu kan nama biraa ti taatu; inni niis isuma warra du'an keeysaa kaafamee dha; akeekni isaa tiis hundi keenyaa huu Rabbiif firii haa goonuufi.
[5] Wayta nuti jasadaan ugguramnee turre, hawwiin dilooytuun seeraan kakaafamtee ti dhagna qaama keenyaa keeysatti hojjataa ti turte; akkasitti firii du'aaf godhanne.
[6] Amma ammoo, seera moofaa kan dur barreeyfame jalatti odoo hin tahin, jireenya ruuhaa haaraya keeysatti akka kaadamnuuf jecha, seera nu gabroomfate jalaa duunee, irra hiis hiikamnee ti jirra.
[7] Duuba maal haa jennu? Seerri matummaan isaa tu dilii dha jechuu dhaa? Gonkumaa akkana hin jedhamu! Haa tahu malee, odoo seerri jiraachuu baatee, ani maalummaa dilii hin beekuun ture; odoo seerri, “Waan namaa hin kajeelin!” jechuu baate, kajeellaan maal akka taate hin beekuun ture.
[8] Diliin ammoo ajajaan carraa arkattee ti kajeellaa adda addaa na keeysa kakkaafte; bakka seerri hin jirretti diliin duutuu dha.
[9] Bakka seerri hin jirretti ani jiraachaa tiin ture; hogguu ajajni dhufe ammoo, diliin ni bayfatte.
[10] Hogguus ani niin du'e; ajajni gara jireenyatti nama geeysuuf ture, du'aatti kan na geeysu tahe.
[11] Diliin ajajaan carraa arkattee ti na gowwoomsite, ajajuma keeysaaniis na ajjeefte.
[12] Tahu illee, seerri qulqulluu dha, ajajni niis qulqulluu, qaceelaa fi gaarii dhaasi.
[13] Eegasuu waanuma gaarii tu du'a anatti fide jechuu dhaa ree? Kun waan tahuun malee miti. Ammoo diliin dilummatti akka beekamtuuf, waanuma gaarii tahe keeysaan du'a anatti fidde; kuniis ajaja keeysaan diliin imalmaanaa malee akka dilooytuufi.
[14] Seerri ruuhaanii akka tahe, nuti ni beeyna, ani ammoo nama jasadaa kan dilii jalatti gabrummaaf dabarfamee kannamee dha.
[15] Ani waanumaan dalaguu huu hin beeku; waaniin silaa dalaguu barbaadu, hin dalagu, waaniin jibbuun dalaga malee.
[16] Ani waaniin dalaguu hin feene, kaniin dalagu yooniin tahe, seerri gaarii tahuu isaa niin fudhadha.
[17] Akkana taanaan, anaa miti kan kana hojjatu, ammoo dilii na keeysa jirtuu tu tana hojjata malee.
[18] Wanni gaariin takka illeen, ana keeysa yookiin namummaa kiyya kan jasadaa keeysa akka hin jirre niin beeka; ani waan gaarii dalaguu odumaan jaaladhuu, san dalaguu hin dandayu.
[19] Wanniniin ani dalagu, waan gaarii taniin ani dalaguu fedhu miti; waan hamtuu tanumaan ani hin feeneen irra deddeebi'ee isuma dalaga.
[20] Eegasuu, ani waaniin dalaguu hin feene, kaniin dalaguu yoon tahe, kan dalagu ana tahuun haftee, dilii ana keeysa jirtuu tu tana dalaga jechuu dha.
[21] Seera haala akkanaa tu natti calaqqisa; kunoo waytumaan waan gaarii dalaguu barbaadu, waan hamtuu tu na afaan bu'a.
[22] Ani, keeysa namummaa koo tii tiin, seera Rabbitti niin gammada.
[23] Haa tahu malee, seera biraa ammoo dhagna qaama kiyyaa keeysatti kan hojjatuu tu natti mullata; kuniis seera sammuun tiyya fudhatte wajjiin wal lola; lola kanaaniis seera dilii, kan dhagna qaama kiyyaa keeysatti hojjachaa jiru jalatti na oggolchiisa.
[24] Ani nama gadi-galoo akkami, jasada du'aa kana harkaa eenyuutu dirmatee na baasa?
[25] Karaa Gooftaa keenya Yesuus Kiristoosiin, dirmaatee du'aa harkaa waan nu baaseef, Rabbiif galanni haa tahu! Akka haala jireenya ammaatti, ani ifii kiyyaa yaada kiyyaan seera Rabbii tiif niin oggola; namummaa jasada kiyyaa tiin ammoo, seera dilii tiifiin oggola.