[1] Eegasuu maal haa jennu? Ni'imaan Rabbii akka hoddomaattuuf jecha, dilitti jiraachuu itti haa furruu ree?
[2] Kun gonkumaa tahuu hin qabu! Nuti warri dilii jalaa duune, asii achi akkamitti dilii jala jiraanna?
[3] Yookiin nuti warri Kiristoos Yesuusitti tokkaawuuf cuuphamne hundinuu, du'a isaattiis hirmaachuuf akka cuuphamne ni wallaaltanii?
[4] Nuti cuuphamuu dhaan du'a isaatti hirmaannee isaa wajjiin awwaalamnee ti jirra; Kiristoos durrii ulfina Abbaa tiin warra du'an keeysaa akkuma kaafametti, nutiis ammaas jireenya haarayaan ni jiraanna.
[5] Du'a akka isaatti warra hirmaate yoo taane, akkasumatti ammaas du'aa ka'uu akka isaattiis akka hirmaannu mirkana.
[6] Nuti kanaa achi deebinee gabroota dilii akka hin taaneef, eenyummaan keenya inni moofaan isaa wajjiin akka fannifame ni beeyna; kuniis jasadni dilii akka dhabamuufi.
[7] Namni du'e tokko humna dilii jalaa bilisa bahe.
[8] Kiristoosii wajjiin warra du'e yoo taane, Kiristoosii wajjiin ammaas akka jiraannu ni amanna.
[9] Kiristoos warra du'an keeysaa eega ka'e booddee, lamadaa deebi'ee akka hin duune, duuti niis asii achi isa irratti amrii akka hin qabne ni beeyna.
[10] Duuti inni du'e, waa'ee dilii tiif jecha, tan irra hin deebifamne waytuma takka qofa du'e; jireenyi inni jiraatu ammoo tan Rabbiif jiraatuu dha.
[11] Isiniis ammaas akkasumatti akka warra dilii jalaa du'anii, karaa Yesuus Kiristoosiin Rabbiif jiraatan godhaa tii if lakkaawaa!
[12] Kanaaf jecha, diliin jasada keeysan kan du'u kana irratti mootomtee, kajeellaa isaa hundumaaf akka isin oggolchiiftu itti hin dhiisinaa!
[13] Nafa qaama keeysanii meeshaa jallinaa godhuuf amrii dilii jala hin galchinaa! Ammoo akka namoota du'a keeysaa bahanii jireenya arkatanitti, Rabbiif if kannitanii, dhagna qaama keeysanii tiis, meeshaa qaceelinaa godhuuf harka Rabbii jala galchaa!
[14] Isin seera jala warra jiraattan odoo hin tahin, ni'imaa Rabbii jala waan jiraattaniif jecha, diliin isin irratti gooftummaa hin qabaattu.
[15] Eegasuu maali? Nuti warra seera jala hin jiraanne, kan ammoo ni'imaa Rabbii jala jirru waan taaneef jecha, dilii hojjachuu dha qabnaa ree? Kun gonkumaa hin tahu.
[16] Waanuma tahe takka if irratti gooftaa godhattanii harka isaa jala yoo if galchitan, isin waanuma saniif gabra akka taatan hin beeytanii? Diliif oggollaan du'atti deemtu, Rabbiif ajajamnaan ammoo karaa qaceelinatti isin qaceelcha.
[17] Duuba Rabbiif galanni haa gahuu! Isin dur, gabroota dilii taatanii warra turtan taatan illeen, amma ammoo kunoo barsiisa kan akka itti kannamtanii saniif, garaa guutuu dhaan ajajamtanii ti jirtu.
[18] Dilii jalaa bilisa baatanii, kaadamaa qaceelinaa tiis taatanii ti jirtu.
[19] Tana keeysa hubachuun waan isin dhibduuf jechaan, akkaatuma namni itti dubbatuttiin isinitti haasawa; akkuma kanaan dura dhagna qaama keeysanii najisummaa fi seera malee jiraachuu jala galchitan sanitti, ammaas haaluma sanitti akka qulqulleeyfamuuf jecha, dhagna qaama keeysanii qaceelina jala galchaa!
[20] Gabroota dilii wayta turtan, qaceelinaaf ajajamuu jalaa baatanii ti turtan.
[21] Duuba hojiin teeysan tan wayta sanii sun, firii akkami kannite? Firii isiin kannite sanitti amma itti qaanfachaa ti jirtu; kanneen hundinuu booddee du'atti nama geeysu.
[22] Amma ammoo dilii jalaa bilisa baatanii, kaadamtoota Rabbii taatanii ti jirtu, faaydaan teeysaniis qulqullummaa dha taha, aakirri isii tiis, jireenya abadi isiniif taha.
[23] Mindaan dilii dhaa du'a; kannaan Rabbii tan Yesuus Kiristoos, Gooftaa keenya keeysaan bilaashitti kannamtu ammoo, jireenya bara baraa ti.