[1] Eegasuu yaa obboleeyyan koo, ni'imaa Rabbii tiif jecha namummaa qaama keeysanii, akka aarsaa jiraataatti, qulqulluu fi ammaas Rabbi duratti akka fudhatama qabu gootanii, akka dhiheeysitaniin isin gaafadha; kuniis, ibaadaa Ruuhaanii teeysani.
[2] Armaa achi, haala addunyaa dabartuu tanaa, fakkeenya godhattanii duukaa hin bu'inaa! Qalbii haarayoomtu teeysaniin falka jijjiiramaa, hogguus fedhiin Rabbii maal akka taate, waan gaarii, fudhatamaa fi ammaas qulqulluu tahees, xiinxaltanii mirkaniin adda baafachuu dandeeysu.
[3] Ni'imaa anaaf kannamteen, isin keeysaa nam tokko illeenuu yaadaan if irra hin dhawin jedhee tiin isinitti hima; ammoo namuu tuu adduma addaan akkuma amantii isaaf kannamtetti if laaluun akka isa irra jirtutti haa yaaduu!
[4] Nuti akka qaama tokko kan dhagni isaa hedduu ti; dhagni qaamaa hundinuu ammoo hojii adda addaa ti qabu.
[5] Akkasumatti ammaas nutiis nama hedduu taanu illee, Kiristoos keeysatti qaama tokko; ammaas nuti dhaqna qaama walii ti.
[6] Akkuma ni'imaa Rabbii tan nuuf kannamtetti, kannaa adda addaa ti qabna; kannaan nama tokkoo raajii dubbachuu yoo tahe, akka amantichaan wal qiimutti itti haa kaadamuu.
[7] Kannaan isaa hojii dhaan nama tajaajiluu yoo tahe, haa tajaajiluu! Barsiisuu yoo tahe, akka gaaritti haa barsiisuu!
[8] Kannaan isaa, nama gorsuu yoo tahe, gorsutti haa jabaatuu! Inni namaaf waa kannu, garaa qulqulluun haa arjoomu! Inni taligaa bulchaa qabu fardeeyfatee haa geggeeysu! Namni namaaf hujii keeyraataa godhuus gammachuun haa dalaguu!
[9] Jaalalti teeysan jaalala dhugaa haa taatu, waan hamtuu jibbaa, waan gaaritti jabaadhaa maxxanaa!
[10] Jaalala obbolummaa tiin qaceellotti wal jaaladhaa; wal kabajuu keeysan irratti walitti qotaa godhaa!
[11] Hojii irratti hin dhibaawinaa! Ruuhaa finiinaa qabaadhaa! Gooftichaafiis if kannaa kaadamaa!
[12] Abdii qabdanitti gammadaa; rakkina obsaa; Rabbi kadhachuttiis jabaadhaa!
[13] Amantoota rakkatan gargaaruu keeysaa qooda qabaadhaa! Keeysummoota simachuu fardeeyfadhaa baradhaa!
[14] Warra isinitti roorrisan isin reeban eeybisaa, isaan eeybisaa malee hin abaarinaa!
[15] Warra gammadanii wajjiin gammadaa; warra booyanii wajjiiniis booyaa!
[16] Wal tahaa wajjiin jiraadhaa; isin ol if hin fuffuudhinaa, warra gadi qabamoo wajjiin jiraachuu baraa! Nu malee beekaan hin jiru hin jedhinaa!
[17] Namni sharrii yoo isin irratti hojjate, deebiftanii sharrii isa irratti hin hojjatinaa! Akkasii mannaa, waan fuula nama hundumaa duratti fudhatamaa tahe godhuuf yaadaa!
[18] Nama hundumaa wajjiin nagayaan jiraachuuf jecha, gama keeysaniin waan dandayamu hundumaa godhaa!
[19] Yaa saahibban koo! Hijaa bahuu hin baddinaa, lola Rabbii tiif bakka dhiisaa malee. Kitaaba keeysatti Rabbi Gooytaan, “Hijaa baasuun tiyya, ani hojii namaa matuma isaa irrattiin deebisa” jedhee dubbatee ti jira.
[20] Bakka takkatti ammaas, “Adawwiin tee yoo beeloyte nyaachisi, yoo dheebottees obaasi! Kana godhuu kee tiin, sheenawee akka inni if qaanfatu isa goota” jedhamee barreeyfamee ti jira.
[21] Waan gaarii dhaan sharrii moohi malee, sharriin si hin moohatin!