[1] Nuti warri amantii irratti jajjaboo taane, dadhabbii warra dadhabootaa baadhachuu dha qabna malee, ifuma gammachiisuuf tattaafachuun nu irra hin jiru.
[2] Nuti hundinuu matuma matatti nama waan gaariin gammachiisuu dhaan amantitti jajjabeeysuu tu nu irra jira.
[3] Barreeyfama Qulqulluu keeysatti, “Arrabni si arrabsan ana irra bu'e” kan jedhuu tu Kiristoos irratti raawwatame malee, inni if hin gammachiifne.
[4] Nuti obsaa fi jajjabina Barreeyfamni Qulqulluun nuuf kanneen abdii akka arkannuuf, wanti Kitaaba keeysatti barreeyfaman hundinuu nu barsiisuuf barreeyfaman.
[5] Rabbi kan obsaa fi jajjabina namaaf kannu, isin warra Kiristoos Yesuus duukaa bu'aa jirtaniif ruuhaa tokkummaa akka qabaattan isin haa dandeeysisu.
[6] Yaada tokkoo fi sagalee takkaan Rabbi, Abbaa Gooftaa keenyaa Yesuus Kiristoos akka galateeyfattan isin haa gargaaru!
[7] Eegasuu akkuma Kiristoos isin simatetti, Rabbiif hamdiin akka galtuuf, isiniis wal simadhaa.
[8] Kiristoos amanamummaa abdii Rabbiin abbootaaf kanne dhugoomsuuf jecha, kaadamaa warra seera dheeyna-qabaa eeganii tahuu isaa tiin isinitti hima.
[9] Kanaas wanni godheef, saboonni qomoo Israa'el hin tahin, ni'imaa isaa tiif jecha Rabbiif ulfina akka kannaniifi. Akkuma Kitaaba keeysatti barreeyfamee jiru, “Kanaaf jecha ani saba qomoo Israa'el hin tahin jiddutti siin galateeyfadha, maqaa kee tiis niin faarfadha” jedha.
[10] Ammaas: “Isiniis sabni qomoo Israa'el hin tahin ummata isaa tiin wajjiin gammadaa!” jedhamee ti jira.
[11] Ammaas kunoo, “Isin sabni qomoo Israa'el hin tahin hundi keeysanuu Gooyticha galateeyfadhaa! Ummanni hundi niis isa haa galateeyfatan!”
[12] Isaayyaas ammaas itti dabalee, “Hidda Issey keeysaa tokko ka'uuf deema, inni warra saba qomoo Israa'el hin tahin bulchuuf ni ka'a; warri saba qomoo Israa'el hin tahin abdii isaanii isa irra ni kaayatu” jedhe.
[13] Humna Ruuhal Qudusiin abditti guddachaa akka deemtan, mee Rabbummaan abdii kannu, isatti amanuu keeysaniin gammachuu hundumaa fi nagayaaniis isin haa guutu!
[14] Yaa obboleeyyan koo! Ani ifii koo tii gaarummaa guutuu akka qabdan, beekumsa hundumaan akka guutamtan, wal gorsuu akka dandeeysan, shakkii takkaan maletti hubadhee tiin jira.
[15] Ammoo, qafxii takka takka irratti, waan tokko tokko isinuma yaadachiisuuf jecha, ni'imaa Rabbi anaaf kanneen, gadi jabeeysee ija-jabinaan isiniif barreeysee tiin jira.
[16] Ani saba qomoo Israa'el hin tahiniif kaadamaa Yesuus Kiristoos tahee, wangeela Oduu Gammachuu Rabbii tajaajilli lubummaa anatti kannamee ti jira; akkasitti saba qomoo Israa'el hin tahin, akka aarsaatti Rabbiif dhiheeysuun koo, Ruuhal Qudusiin ququlleeyfamanii, akka fudhatama arkataniif jechaan tattaafadhee hojjadha.
[17] Kanaaf jecha, Yesuus Kiristoos keeysaan, hojiin Rabbiif hojjadhu tanaan dhaadadhuuf, ani sababa gahaan qaba.
[18] Kiristoos saba qomoo Israa'el hin tahin Rabbiif ajajamoo godhuuf jecha, waanuma inni anuma keeysaan raawwate dubbachuu qofaafiin ija jabaadha; kanaas qoowlii dubbatamtee fi dalagaa dhaan raawwate.
[19] Inni, humna milikkitootaa tii fi mu'ujizaa hedduun, ammaas humna Ruuhal Qudusiin kana raawwate. Akkasittiin Yerusaaleem irraa jalqabee irra naannawuu dhaan hanga Iliiriquumitti, wangeela Kiristoos guutumattiin lallabe.
[20] Ani ammoo bu'ura namni biraa jalqabe irratti akkaan hin hojjanneef jechaan, bakka maqaan Kiristoos itti hin dhagayaminitti malee, Oduu Gammachuu akkaan hin lallabne, murtoo godhee tiin jira.
[21] Akkuma Kitaaba keeysatti barreeyfame, “Isaan warri takkaa waa'een isaa isaanitti hin himamin ni arku; isaan warri takkaa waa'ee isaa hin dhagayiniis ni hubatu” jedha.
[22] Akkaan isin bira hin dhufne, wannummaan hedduu na ittisaa turee huu sababuma kana.
[23] Amma ammoo naannawa kanneen keeysatti hojjachuuf, bakka hafte takka illee waaniin hin qabnee fi, ammaas dhufee isin arkuu dhaafiis, amata hedduu hawwaa waniin tureef jechaasi.
[24] Akeekni kiyya, waytaan Isphaaniyaa dhaquuf achiin dabru isin arkee, hanga takka isin wajjiin gammadee, karaa kiyya irra akka na buuftaniin abdadha.
[25] Amma ammoo kiristaanota achi jiraniif gargaarsa geeysuuf jechaan gara Yerusaaleem deemuu kiyya.
[26] Warri Maqedooniyaa tii fi Akaayyaa dhaa, miskiinota amantoota Yerusaaleem jiran jiddutti arkamaniif, gammachuu dhaan waan tokkummaa isaanii mullisu arjoomanii ti jiru.
[27] Isaan warri qomoo Israa'el hin tahin kun, fedhuma isaanii tiin kana godhan; godhuuniis karaa tokkoon isaanuma irraa eegama ture; eega warri Yihudootaa eeyba Ruuhaa Rabbi irraa arkatan saba qomoo Israa'el hin tahin wajjiin hirmaatan, sabni qomoo Israa'el hin tahiniis waan jireenya foonii tiif arkataniin warra Yihudootaa gargaaruun isaan irra jira.
[28] Ani hojii tana raawwadhee, horii isaaniif walitti qabame saniis amanamummaa dhaan eegee ergaan itti kanne booda, karaa keeysan dabree Isphaaniyaa dhaquufiin deema.
[29] Waytaan gara keeysan dhufu, guutummaa eeyba Kiristoosiin akkaan dhufu niin beeka.
[30] Yaa obboleeyyan koo, Gooftaa keenya Yesuus Kiristoosiin, jaalala Ruuhal Qudus nuuf kanneeniis, isin anaa wajjiin fardeeyfattanii Rabbi akka anaaf maganfattaniifiin isin kadhadha.
[31] Warra Kiristoositti hin amanne kanneen biyya Yihudaa keeysa jiran jalaa akka ana eewalu, ammaas gargaarsaan Yerusaaleem geeysu kanaas kiristaanonni gammachuun akka fudhataniis, Rabbi naaf kadhadhaa!
[32] Ani akkasitti fedhii Rabbii yoo tahe gammachuun isin bira dhufee, ammaas isin wajjiin wal qunnamuu dhaan, yaada akka wal baanuun barbaada.
[33] Rabbi Abbaan nagayaa, hunduma keeysaniin wajji haa tahu! Aammiin!