[1] Gaaffiin tiyya, eegasuu Rabbi ummata isaa if irraa achi dhiibee? tan jettuu dha. Kun waan tahuun hin malle! Ani mataan koo tuu nama Israa'eli, asara Abrahaam keeysaa gosa Beniyaami.
[2] Rabbi ummata isaa warra duraan dursee beekumsa isaa tiin filate if irraa achi hin darbine; Eliyaas, ummata Israa'el irratti Rabbi kadhachaa akka ture, waan Kitaabni jedhu ni beeytanii mitii?
[3] Inni kunoo, “Yaa Gooytaa! Isaan nabiyyoota kee ajjeesanii ti jiru; bakkeewwan aarsaa tee tii tiis diiganii ti jiru; ana qofaa tu irraa hafe, isaan lubbuma tiyyaa huu balleeysuu dha barbaadu” jedhe.
[4] Jawaabni Rabbi isaaf deebise ammoo maal ture? “Ani namoota Ba'aaliif jilbiifatanii hin sagadin kuma torba hambifadhee tiin jira” kan jedhu ture.
[5] Zamana ammaa kana keeysattiis, akkasumatti hambaan warra ni'imaan filatamanii haftee ti jirti.
[6] Filatamuun isaanii eega ni'imaa Rabbii tiin taatee fuu, hojii isaanii tiin tahuun waan hin dandayamne; akkana tahuu baannaan ni'imaanuu ni'imaa tahuu hin dandeeysu!
[7] Eegasuu maal tahinna laata? Ummanni Israa'el waan barbaade arkachuu dadhabe; isaan keeysaa hangi filataman arkatanii ti jiru; warri hafan ammoo hadoodanii ti manduusawan.
[8] Akkuma Kitaaba keeysatti barreeyfamee jirutti, “Rabbi ruuhaa isaan muuseeysu itti kanne, hanga arraatti illee ija arkuu hin dandeenyee fi ammaas gurra dhagayuu hin dandeenye qabu”.
[9] Daawwidiis ammaas akkana jedha, “Gabateen isaan irratti nyaatan, furgaasaa fi hillima, gufuu kufiftuu fi adaba isaanii itti haa tahu;
[10] akka isaan hin agarre ijji isaanii cillim haa taatu, duydi isaanii tiis umrii isaanii guutuu haa goollawu” jedha.
[11] Eegasuu gaaffiin tiyya, isaan kufanii hafuuf gufatanii laata? Lakkii, tun waan tahuun hin malle; haa tahu malee, ammoo badii isaan dalaganiini, najaanni saba qomoo Israa'el hin tahiniif dhufe. Kuniis ummata Israa'el hinaafsisuuf jecha godhame.
[12] Balleeysaan isaanii ummata biyya addunyaa eeyba eega badhaafte, ammaas hoonga'uun isaanii tiis saba qomoo Israa'el hin tahiniif eeyba eega arjoomte, eegasuu Israa'el hundinuu deebi'anii arkamuun ammoo hammam takka irra caalchisee eeyba taha!
[13] Ani amma isin warra ummata saba Israa'el hin tahinittiin dubbadha; ani saba qomoo Israa'el hin tahiniif ergamaa waaniin taheef, hujii tiyya tanaaf kabajaa guddoon qaba.
[14] Tanaan rahimman kiyya Yihudoota hinaafsisee, isaan keeysaa muraasa illee yoo tahe najaa baasuufiin carraaqa.
[15] Fudhatama dhabuun isaanii ummata biyya addunyaa tiif araara eega taate, fudhatama arkachuun isaanii ammoo, du'a keeysaa jireenyatti bahu jechuu malee, waan biraa maal tahinna ree?
[16] Qooshaa irraa hangi tokko fuudhamee akka ashiita dura gahutti Rabbiif yoo irraa qodhame, eegasuu qooshaan san hundinuu qulqulluu taati; hiddi muka tokkoo tiis qulqulluu yoo tahe, dameeleen muka sanii tiis qulqullu.
[17] Ammoo dameelee san keeysaa hangi tokko irraa caphnaan, ati kan akka damee ejersa diidaa taate, soora mukni ejersaa sun qabu irraa hirmaachuuf, bakka dameelee caphanii buutee itti fayyifamtee ti jirta.
[18] Dameelee san irratti if hin dhaadatin! Yoo if dhaadatte ammoo, hiddaa tu qabee siin dhaabbata malee, ati hidda akka hin qabin yaadadhu!
[19] Ati ammoo, “Akkaan ani bakka isaaniititti fayyifamuuf jecha, dameeleen sun irraa caccaphan” ni jettaa huu taha.
[20] Dhuga baanta; isaan amantii-dhabuu isaanii tiif irraa caccaphan. Ati ammoo amantii-qabaachuu kee tiin jabaattee dhaabbatta; kanaafiis naamusaan if eeggadhu malee, hin dhaytaawin.
[21] Rabbi, dameelee kanneen somayyoo mukaa irraa mayranii fuu kan hin hilin yoo tahe, siifiis waa kan hiluu miti.
[22] Kanaaf jecha, gaarummaa fi shiddaa Rabbi qabuus hubadhu! Warra kufan irratti shiddaa hamtuu dha qaba, siif ammoo gaarummaa dha qaba; kuniis ati gaarummaa isaa keeysatti jabaattee yoo jiraatte qofa; kanaa achi atiis ammaas somayyoo irraa ni muramta.
[23] Ammaas jarri kaan illeen amantii-dhabuu isaanii irratti yoo rincicuu baatan, bakka isaanitti deebifamanii ni fayyifamu; Rabbi ammaas isaan deebisee irratti fayyisuuf dandayyii ni qaba.
[24] Atuu damee ejersa diidaa irraa muramte taatee, somayyoo ejersa qe'ee kan aslii uumama kee ti irraa adda tahetti eega ayyifamte, irrattuu dameeleen ejersa sanii deebi'anii somayyoo isaanii irratti fayyifamuun hangam takka irra sablata!
[25] Yaa obboleeyyan koo, beekaan numa jettanii akka hin dhaytooyne, hiccitii dhugaa tana akka beeytaniin barbaada! Hiccitiin tuniis, mata-jabinni ummata Israa'el keeysaa hanga tokko irratti dhufuu isaa ti, kuniis wanni taheef, hanga sabni qomoo Israa'el hin tahin adadni guutuun isaanii ummata isaatti dabalamu qofaafi malee, mata-jabinni kun isaan irratti hin hafu.
[26] Ammaas haaluma kanatti ummanni Israa'eliis guutumatti naja baha jechu; Barreeyfamni Qulqulluun, “Naja-baasoon, Xiyoon irraa dhufa, Rabbi-dhablummaas, shanyii Yaaqoob keeysaa ni dhabamsiisa”
[27] Akkasumatti ammaas, “Waytaan ani dilii isaan irraa dhiqu irbuu tiyya tanaan isaaniif dhaaba” jedha.
[28] Oduu Gammachuu tuffachuu isaanii tiin, Yihudoonni sababa keeysaniif jecha akka diina Rabbitti laalamu; haa tahu malee ammoo, akkaataa haala filatamuu laalchisuun, sababii abbootii isaanii tiif jecha, isaan warra Rabbi biratti jaalatamu.
[29] Kannaan Rabbii tii fi ammaas waamichi isaa tiis hin jijjiiraman.
[30] Isin kanaan dura Rabbiif ajajamuu diddanii ti turtan; amma ammoo Yihudoonni ajajamuu waan didaniif jecha, araarri Rabbii isiniif kanname.
[31] Akkasumatti ammaas araara isin fudhattaniif jecha, isaan warri amma Rabbiif ajajamuu didaniis, akkuma keeysanitti araara akka arkataniifi.
[32] Rabbi Banii Aadam hundumaaf araara kannuuf jecha, nama hunda ajaja-didduu jalatti oggolchiisee ti jira.
[33] Badhaadhummaan araara Rabbii hangam takka ballaa dha! Hikmaan isaa tii fi beekumsi isaa tiis hangam gadi fagaatu! Akkaataa inni itti murtoo godhu, namni xiinxalee bira hin gahu! Karaa isaa tiis namni faana dhawee hin hubatu!
[34] Kitaaba keeysatti illee: “Eenyuu tu yaada garaa Rabbii beeka? Yookiin eenyuu tu isaaf gorsa kanne?
[35] Eenyuu tu duraan isaaf waa liqeeysee beeka? Eenyuu tu mugoota deebisee isa kafalchiisa?” kan jedhu barreeyfamee ti jira.
[36] Waa hallee huu Rabbiin uumaman; wanti hundinuu isuma irraa hi; isuma keeysaaniisi, ammaas isumaafi. Durriin ulfinaa bara baraaf isaaf haa taatu! Aammiin!