[1] Namni hundinuu, warra biyya bulchuuf amrii qabaniif, haa ajajamu! Rabbi biraa yoo taate malee amrii qabaachuun hin dandayamu; warra amrii irra jiraniis taanaan, Rabbumaa tu achi isaan kaaye.
[2] Akana jechuun, namni warra amrii qaban kanaan morku, waan Rabbi ramadee kaayeen morka; warri kanaan morkaniis firdii if irratti fidu.
[3] Nama badii hojjatuuf malee, nama waan gaarii hojjatuuf, bulchaan biyyaa hin sodaachisu. Ati hoo, nama amrii qabu akka hin sodaanne ni barbaaddaa? Eegasuu waan gaarii dalagi! Akkasitti warra amrii qaban biraa galata ni arkatta.
[4] Inni amrii qabu, si gargaaruuf jecha kaadamaa Rabbi biraa siif kanname. Ati waan hamtuu yoo dalayde ammoo, isa sodaadhu! Inni nama badii dalagu irratti adaba Rabbii raawwachuuf malee, habalee itti kannamte san bilaashumatti hin hidhanne.
[5] Eegasuu, namni lola Rabbii jalaa bahuuf qofaaf odoo hin tahin, xalalii ifii isaa tiif jechaa fuu, ajajamuun isa irra jira.
[6] Isinuu tanumaaf jecha gibira baaftu, warri amrii qaban kuniis hogguu tuu tana raawwachuuf ramadamanii kaayamanii ti, Rabbiif dalaguu irra jiru.
[7] Eegaa isaanuma hundumaa fuu, waan isaaniin male baasaafi; kan gibira gaafatuuf gibira, kan qaraxa fuudhuuf qaraxa, kan sodaatamuu qabuuf sodaa, kan kabajamuu qabuufiis kabajaa godhaafi!
[8] Jaalala waliif qabaachuu qofa malee, mugoota biraa if irraa hin qabaatinaa! Namni ollaa isaa jaalatu waan seerri isa irraa barbaadu raawwate.
[9] Ajajni, “Hin ejjin, zinaa hin godhin, hin ajjeesin, hin hatin, waan namaa hin kajeelin” jedha, ajajni warri hafan kaan hundinuu jechuma, “Ollaa kee akka mataa keetitti jaaladhu!” jedhuuni walitti guduunfamu.
[10] Namni jaalala qabu nama irratti hamtuu hin dalagu; kanaaf nama jaalachuun, seeruma hunda raawwachuu jechuu dha.
[11] Wayta dura amanne irra caalaa, amma guyyaan najaataa waan nutti dhihaateef jecha, waytiin tun tan itti hirriibaa dammaquun isin irra jiru tahuu beekaa!
[12] Halkanichi deemee, bariisaan guyyichaa tiis dhihaattee ti jirti, eegasuu koottaa mee hojii dukkanaa if irraa darbinee, meeshaa lolaa kanneen ifa keeysa ittiin hojjatan haa hidhannuu!
[13] Koottaa ammaas naamusaan akka warra ifa guyyaa keeysa jiraatutti malee, shoorarkeeysuun yookiin farshaanuun, zinaa fi ejjummaan yookiin gadi-dhiifamummaan, namaan loluun yookiin hinaaffaan jiraachuun nu irraa haa hafanii.
[14] Gooftaa Yesuus Kiristoos uffadhaa malee, kajeellaa jasada namummaa raawwachuuf itti hin qalbisinaa!