[1] Namoota amantitti dadhaboo tahan ifitti qabaa! Isaan ifitti qabuun keeysan ammoo, yaada isaan fudhataniin falamuuf hin tahin.
[2] Namni waa gargar baasee hubate tokko, waan hundumaa nyaachuu akka dandayu ni amana; inni gargar baasee hubachuu dadhabe ammoo, kudra-mudraa qofa nyaata.
[3] Namtichi soora hundumaa nyaatu, nama soora hundumaa hin nyaanne hin tuffatin; namtichi soora hundumaa hin nyaannees nama nyaatu irratti hin faradin! Rabbi isa ifitti simatee ti jira.
[4] Ati eenyu, kaadamaa nama biraatitti kan firdii gootu? Inni yoo dhaabbatees, yoo kufees gooftaa isaa tiifi; haa tahu malee, Gooftaan isa jabeeysuu waan dandayuuf inni dhaabbachu dandaya.
[5] Namni guyyaa tokko guyyoota kaan irra caalchisu ni jira; inni kaan ammoo guyyoota hundumaa wal qixxetti ilaala. As irratti namayyuu akkuma xalalii isaatitti haa murteeyfatu!
[6] Namtichi guyyaa tokko guyyaa kaan irra caalchisee kabaju gooftaa isaa tiifi; inni soora hundumaa nyaatu, Rabbi waan galateeyfatuuf jecha, ulfina Gooftaa isaa tiif nyaata. Inni soora hundumaa hin nyaannees, kabajaa Gooftaa isaa tiif kannuuf jecha nyaachuu dhiisuun, Rabbiif galata galcha.
[7] Nu keeysaa tokko illeen akeeka mataa isaa tiif jecha hin jiraatu; ammaas tokko illeenuu akeeka mataa isaa tiif hin du'u.
[8] Yoo jiraanne, akeeka Gooftaa tiin jiraanna, yoo duunees akeeka Gooftichaa tiin duuna; eegasuu, jiraannuus duunuus nuti warruma Gooftichaa ti.
[9] Kiristoos du'ee, deebi'ee jiraachuun isaa, inni Gooftaa warra du'anii tii fi kan warra jiranii tiis tahuu dhaafi.
[10] Eegasuu ati maaliif obboleeysa kee ti irratti firdii goota? Yookiin ati maaliif obboleeysa kee tuffatta? Hundi keenyaa huu bar arshii firdii Rabbii dura dhaabbachuuf teenyaa!
[11] Kitaaba keeysatti, “‘Ani jiraataa dha! Jilbi hundinuu anaafi jilbiiffata, arrabni hundi niis Rabbiif hamdii galchuuf taa'u’ jedha Gooytaan” kan jedhu barreeyfamee ti jira.
[12] Eegaa hundi keenyaa huu matuma matatti, waan dalayneef gabaasa Rabbitti dhiheeysuuf teenya.
[13] Eegasuu mee wali irratti firdii godhuu irraa if haa qusannuu; ammoo gufuu obboleeysa keeysan dura keeysanii, karaa Rabbi irraa akka gonkumaa isa hin gufachiifne murteeyfadhaa.
[14] Ani amantiin, Gooftaa Yesuus keeysa jiraadhee, wanni takka illeenuu uumama isii irra najisa akka hin tahin, hubadhee tiin jira; haa tahu malee namticha wanti tun najisa jedhee amaneef, isaaf najisuma taati.
[15] Nyaanni ati nyaattu xalalii obboleeysa kee tii yoo miidhe, jaalalaan jiraachuun tee tuu hafte; wanni ati nyaattuus, namticha Kiristoos du'eef tokko, turaab godhuuf sababa akka itti tahu hin godhin.
[16] Haala kanatti wanni gaariin teeysan, maqaa hamaan akka kaafamtu itti hin dhiisinaa!
[17] Mootummaan Rabbii, Ruuhal Qudusiin qaceelummaa, nagayaa fi gammachuu kannamu malee, waan nyaataa fi dhugaatii irratti rarra'uu miti.
[18] Namni haala kanatti Kiristoos kaadamu Rabbi ni gammachiisa, namoota birattiis ni fudhatama.
[19] Kanaaf jecha, koottaa mee waan nagaya fiduu fi jireenya walii wajjii jajjabeeysu haa goonuu!
[20] Nyaataaf jettee hojii Rabbii hin diigin; soorri hundinuu xaahara; tahu illee ammoo, nyaata nama biraa gufachiisu nyaachuun dogongora.
[21] Eegasuu foon nyaachuu dhabuun, daadhii inabaa dhuguu dhabuun, yookiin waanuma obboleeysa kee gufachiisu takka illee godhuu dhabuun gaarii dha.
[22] Waan kanneen laalchisuun amantiin ati qabdu sii fi Rabbi jiddutti haa haftuu! Namtichi waan hubatee fudhate takka irratti deebi'ee ifitti firdii hin goone, nama gammachuu qabu.
[23] Namtichi shakkaa nyaatu ammoo, amantii dhaan waan hin fudhatiniif jecha firdii itti godhama; wanni amantii dhaan hin dalagamin hundinuu dilii.