[1] Eegasuu amma warra Yesuus Kiristoositti amananii jiraatan irratti yakki muramu tokko illeen hin jiru.
[2] Seerri Ruuhaa kan karaa Yesuus Kiristoos nama jiraachisu, seera dilii kan du'atti nama geeysu jalaa na baasee ti jira.
[3] Sababa jasada namaa tiif jecha, seerri hojii isaa hojjachuu waan dadhabeef, Rabbi Ilma isaa bifa jasada dilaawaatti aarsaa diliif dhihaatu godhee ti ergee; akkasitti inni dilii jasada dilaawaa keeysatti itti farade.
[4] Haqni seerri nu gaafatu, nuti warra akka fedha ruuhaatti malee, akka fedha jasadaatti hin jiraanne keeysatti, akka raawwatamuuf Rabbiin kana godhe.
[5] Warri akka fedha jasadaatti jiraatan, yaada isaanii fedha jasadaa irratti bu'uranii ti jiru; warri akka fedha ruuhaatti jiraatan ammoo, waan ruuhaa ti yaadu.
[6] Yaadni fedha jasadaa du'a fida; yaadni fedha ruuhaa ammoo, jireenyaa fi nagaya kanna.
[7] Akka fedha jasadaatti yaaduun adawwii Rabbii ti nama godha; yaadni akkasii seera Rabbii tiif if hin oggolchu, isaaf ajajamuus hin dandayu.
[8] Warri akka fedha jasadaatti jiraatan, Rabbi gammachiisuu hin dandayan.
[9] Ruuhaan Rabbii yoo dhugumaan isin keeysa jiraate, isin akka fedha ruuhaatti malee akka fedha jasadaatti hin jiraattan; namni ruuhaa Kiristoos if keeysaa hin qabne, kan Kiristoosii miti.
[10] Kiristoos ammoo isin keeysa yoo jiraate, jasadni keeysan sababa dilii tiif jecha du'aa yoo tahe illee, sababa qaceelummaa tiif Ruuhaan isiniif jireenya taha.
[11] Ruuhaan Rabbii, kan Yesuus warra du'an keeysaa kaase, isin keeysa yoo jiraate, inni Kiristoos warra du'an keeysaa kaase, ruuhaa isaa kan isin keeysa jiraatuun, jasada keeysan kan du'uus ammaas ni jiraachisa.
[12] Eegasuu yaa obboleeyyan koo, dirqama raawwachuun nu irra jiru jala yoo jiraanne illee, akka fedha jasadaatti jiraachuuf isaaf ajajamuun nu irra hin jiru.
[13] Akka fedha jasadaatti yoo jiraattan, du'uun keeysan beekamaa dha, ruuhaan hojii namummaa teeysan tan jasadaa yoo ajjeeftan ammoo ni jiraattu.
[14] Warri Ruuhaa Rabbii tiin geggeeyfaman hundinuu ilmaan Rabbii ti.
[15] Ruuhaan isin fudhattan ruuhaa ilmaan isin godhu malee, ruuhaa gabrummaa kan sodaa jalatti isin deebisuu miti; ruuhaa kanaaniis, “Yaa Abbaa” jennee ti Rabbi yaammanna.
[16] Nuti joollee Rabbii akka taane, Ruuhaan Rabbii, ruuhaa keenyaan wajjiin ragaa dha baha.
[17] Nuti joollee Rabbii eega taane, warra eeyba dhaallu taana; warra Rabbi dhaalu, Kiristoos wajjiiniis warra dhaalu. Yoo nuti dararama isaa wajjiin hirmaanne, durrii ulfina isaattiis ni hirmaanna.
[18] Dararamni keenya kan ammaa kun, ulfina nuuf mullifamuuf taa'u wajjiin walitti qixxeeysuu, waan hin mallettiin lakkaawa.
[19] Uumamni hundinuu, mullifamuu joollee Rabbii, hawwii hedduun eeggachaa ti jiru.
[20] Uumamni waan gatii hin qabne akka tahu godhamee ti jira; akkana tahuu, ifii isaa tii filatee odoo hin tahin, ammoo isuma isa uumee tu akkas isa godhe; haa tahu malee, akkas tahuun isaa abdii qaba ture.
[21] Uumamni mataan isaa tuu, dirqama tortoruu jalaa bilisa ni baha; kuniis gara ulfina bilisummaa joollee Rabbitti isa geeysa.
[22] Uumamni hundinuu hanga ammaatti akka ittanuu fi akka cimiimfatu ni beeyna.
[23] Uumama qofa odoo hin tahin, nuti warri angafa firii Ruuhaa Rabbii qabnuus, ilmummaatti guddifachifamuu fi, furamuu jasadaa keenyaa hawwii dhaan hogguu eeggannu, garaa keenya keeysatti ni gururiina.
[24] Nuti abdii dhaan fayyine; abdiin ijatti mullattu ammoo abdii miti; namni waan duruun fudhatee harkaa qabu ni abdataa?
[25] Wanta ijaan hin agarre yoo abdanne ammoo obsaan eegganna.
[26] Ruuhaaniis ammaas akkuma kanatti dadhabbii teenya nu gargaara; nuti akkamitti kadhachuun akka nu irra jiru hin beeynu; ruuhaan ammoo aadmaya isaa tiin, haala namni jechaan mullisuu hin dandeenyeen nuuf maganfata.
[27] Ruuhaan akka fedhii Rabbitti warra isaaf qulqullaawaniif ni maganfata; Rabbi kan garaa namaa xiinxalu ammoo, yaada Ruuhaa ni beeka.
[28] Rabbi warra isa jaalataniif, kanneen akka akeeka isaattiis yaamamaniif, waan hundumaa huu gaaritti, akka isaaniif jijjiiru ni beeyna.
[29] Warra duraan dursee beekumsa isaa tiin filate, Ilma isaa kan obboleeyyan hedduu jiddutti angafa tahuuf taa'utti akka fakkeeyfamaniif isaan herregee ti jira.
[30] Warra duraan herregees ammaas ni yaame; warra yaamees ammaas qaceelota isaan godhe; warra qaceelota godhees ammaas ulfinaan isaan gahee ti jira.
[31] Waan kanneen akkamitti ilaalla? Yoo Rabbi nu wajjiin dhaabbate, eenyuu tu nu irratti ka'uu dandaya?
[32] Rabbi kan Ilma isaa, odoo hin mararfatin hunduma keenyaaf jecha dabarsee kanne, waanuma hundumaa ammaas Ilma isaa wajjiin bilaashumatti nuuf hin kannuu ree?
[33] Rabbi, kan nama akka balleeysaa hin qabnetti lakkaawe eega tahee fuu, warra Rabbi filate eenyuu tu kasasuu dandaya ree?
[34] Yesuus Kiristoosi kan du'ee, du'a keeysaa hiis kaafame; inni gara harka mirga Rabbitti arkamee ti, mirkaniin Rabbi nuuf maganfachuu irra jiraa, eenyu ree kan yakka muru?
[35] Jaalala Kiristoos irraa eenyuu tu gargar nu baasa? Rakkina yookiin cinqii dha, reebamuu dha, beela yookiin daaruu dha, gaaga'amaa yookiin habaleen gargar nu baasuu dandayuu ree?
[36] “Sababa kee tiif jecha nuti guyyuu ni ajjeefamna, akka hoolota qalamuuf yaafamanitti lakkaawamnee ti jirra” kan jedhu Kitaaba keeysatti barreeyfamee ti jira.
[37] Waan nu irra gayan kanneen hundumaa irratti ammoo, karaa isa nu jaalate keeysaan, moohuu irra caalaa dha arkanna.
[38] Du'a taatee jireenyi, maleeykoota yookiin warri bantii samii keeysatti amrii qaban, wanni amma jiruu fi kanneen dhufaa jiruus hundinuu, humniti takka illeen jaalala Rabbii ti irraa gargar akka nu hin baafne, ani niin beeka.
[39] Ol fageenyinii fi gadi fageenyi niis, uumama keeysaa wanni biraa tokko illeenuu, jaalala Rabbii tan karaa Gooftaa keenyaa Kiristoos Yesuusiin nuuf dhufte irraa, dandayee akka gargar nu hin baafne ani mirkaneeyfadhe.