[1] Eegaa mee Yihudiin hireen namaan caaluun tami qaba? Yookiin dheeyna-qabuun faaydaa tami qaba?
[2] Karaa hundumaanuu faaydaa hedduu dha qaba; faaydaan duraa, Qoowliin Rabbii Yihudootatti hadaraa kannamuu isii ti.
[3] Isaan keeysaa hangi tokko, yoo amantaa hin qaban tahe hoo, amantaa dhabuun isaanii ammoo amanamummaa Rabbii ni hambisaa ree?
[4] Kun waan tahuun malee miti; namni hundinuu sobduu tahee, Rabbummaan dhugaa haa tahu. Barreeyfamni Qulqulluun akka mullisutti, “Ati qoowluma tee tiin qaceelotti akka siif lakkaawamu, firdiiniis akka irra aantu” jedhee ti jira.
[5] Haa tahuu ammoo, jallinni keenya qaceelummaa Rabbii kan mullisu yoo tahe, nuti maal haa jennu? Rabbi balaa nu irratti fiduu isaa tiif jallaa dha ni jedhamaa? Kana illee akkuma yaada namaattiin dubbadha.
[6] Kun waan tahuun malee miti! Silaa akkana tahee ammoo, Rabbiinuu akkamitti addunyatti farada ree?
[7] Ammoo kijibaa tahuun kiyya, dhugaa Rabbii yoo caalatti mullattee ulfina kannisiiftuuf taate, maaliif ammumaa huu akka dilaawwaatti yakki anatti murama ree?
[8] Eegasuu ammoo waan gaarii arkamsiisuuf jecha, hamaa ni hojjanna haa jennuu ree? Warri “Inni akkas jedha” jechaa hanjamuun maqaa na balleeysaa jiran kanneen irratti, akkasitti yakki jiguun ammoo qaceelaa dha.
[9] Eegasuu nuti Yihudoonni warra kaan irra waan caaluun maal qabna ree? Lakkii, karaa tokko illeenuu hin qabnu; ani kunoo kanaan dura, Yihudoonninii fi saboonni biraa hundi niis humna dilii jala akka jiran mullisee tiin jira.
[10] Barreeyfamni Qulqulluun, “Namni qaceelaan hin jiru, lakkii, tokko illeen hin jiru.
[11] Namni tokko illeen hin hubatu, namni tokko illeeniis Rabbi hin barbaadu;
[12] Banii Aadam hundinuu karaa Rabbii irraa maqanii ti jiru, walumaa galatti faayda-malii tahanii ti jiru; namni gaarii hojjatuus tokko illeen hin jiru.
[13] Laagaan isaanii akka qabrii banamtee ti, arraba isaanii tiin ni gowwoomsu; summiin jawwee hidhii isaanii jala jirti.
[14] Afaan isaanii abaarsaa fi dubbii hadhooytuun guutama.
[15] Miilli isaanii dhiiga dhangalaasutti jerjera.
[16] Karaa isaan irra dabran irra diigamaa fi hiraartu jira.
[17] Isaan karaa nagayaa tiis hin beekan;
[18] sodaan Rabbii tiis ija isaanii dura hin jirtu” jedha.
[19] Ammaas wanni seerri jedhuus, warruma Seera jala jiranitti akka dubbatu nuti ni beeyna; kuniis nama hundumaa afaan qabachiisuuf, guutummaa addunyaa tiis firdii Rabbii jala galchuuf dubbata.
[20] Eegasuu Banii Aadam keeysaa tokko illeenuu, waan seerri nama irraa barbaadu godhuu dhaan Rabbi duratti qaceelaa hin tahu. Seerri, diliin maal akka taate, kan nama hubachiisuu dha.
[21] Amma ammoo karaa seeraa tiin odoo hin tahin, karaan namni ittiin qaceelaa tahu Rabbi biraa mullatee ti jira; seerrinii fi nabiyyoonni karaa kanaaf ragaa bahanii ti jiru.
[22] Qaceelummaan Rabbi biraa taate tun tan karaa amantii ti; kuniis Yesuus Kiristoositti warra amanan hundumaafi; as irrattii Yihudii fi saboota biraa jiddutti garaagarummaan hin jiru.
[23] Hundinuu yakkanii ti jiru, ulfinni Rabbii tiis isaan irraa irratee ti jira.
[24] Isaanuu kunoo, ni'imaa Rabbii tan karaa furmaata Yesuus Kiristoos tola isaaniif kannamteen, qaceelota ni tahu.
[25] Inni dhiiga isaa dhangalaasee du'uu dhaan, warra isatti amananiif aarsaa araaraa haa tahuuf, Rabbi isa dhaabe. Rabbi ifiif qaceelummaa isaa mullisuuf kana godhe; obsa Rabbummaa isaa tiiniis dilii namoonni dur hojjatan irra dabree tiifi jira.
[26] Bara ammaa kanattiis Rabbi qaceelummaa isaa agarsiisuuf, inni ifiif qaceelaa tahuu fi, nama Yesuusitti amanuus qaceelatti lakkaawuuf godhuu isaa miraniin mullisee ti jira.
[27] Dhaadachuun eeysa jira ree? Waan ittiin dhaadannu tokko illee hin qabnu. Seera maalii tiin dhabna? Akka ajaja seeraatti hojjachuu dhaanii? Lakkii, akka ajaja amantitti jiraachuu dhaani malee.
[28] Namni waan seerri ajaju hojjachuu dhaan odoo hin tahin, amanuu qofaan Rabbi duratti qaceelaa akka tahu gadi jabeeysinee ti barsiifna.
[29] Rabbi, Rabbuma warra Yihudootaa qofaa? Kan saboota qomoo Israa'el hin tahiniisii mitii? Eeyye, inni Rabbii saba qomoo Israa'el hin tahinii tiisi.
[30] Rabbi tokkicha eega tahe, ummata warra dheeyna qabatan amantii isaanii tiin, ummata warra dheeyna hin qabatiniis amantuma isaanii tiin qaceelota isaan godhata.
[31] Akkana taanaan, ammoo amantii dhaan seera diigna jechuu dhaa? Miti, seera jabeeysinee ti gadi dhaabna malee.