[1] Kanaafiis amantii dhaan qaceeltota eega taane, Gooftaa keenya Yesuus Kiristoosiin Rabbi biratti nagaya qabna.
[2] Karaa isaa tiin ni'imaa amma irra dhaabbannee jirru tanatti amantii dhaan dhihaachuu arkannee ti jirra; abdii durrii ulfina Rabbii irraa hirmaachuu keenyaaf gammachuu dhaan dhaadanna.
[3] Kana malees ammoo dararamni obsa akka fidu beeynee, dararama nu irra gaheefiis gammachuu dhaan dhaadanna.
[4] Obsi niis fitinamanii bahuu dha fida, fitinamanii bahuuniis abdii dha fida.
[5] Sababa Rabbi jaalala isaa, tan karaa Ruuhal Qudus nuuf kannameen, garaa keenya keeysatti dhangalaaseef jecha, abdiin nu hin mufachiiftu.
[6] Nuti dadhaboota taanee odoo jirruu, wayti herregamte san hogguu geeyse, Kiristoos warra akkuma keenyatti mujrimoota tahan hundumaaf du'e.
[7] Tarii huu namni, nama waan gaarii godhe tokkoof if kannu jiraachuun ni mala taha; ammoo nama qaceelaaf jecha namni du'u waan jiru hin fakkaatu.
[8] Ammoo oduma nuti dilaawoota taanee jirruu, Kiristoos nuuf du'uu isaa tiin, Rabbi hammam takka akka nu jaalate nu agarsiisa.
[9] Kanaaf nuti amma dhiiga isaa tiin qaceelota eega godhamne, hammam caalaa ammaas isumaan lola Rabbii jalaa najaa baafamuuf deemna!
[10] Nuti adawwii Rabbii taanee wayta jirritti, du'a Ilma isaa tiin Rabbitti yoo kan araaramne taate, amma ammoo nuti warri isatti araaramne kun jireenya isaa tiin hammam caalaa najaa bahuuf deemna!
[11] Tana qofaasii miti, Gooftaa keenya Yesuus Kiristoosiin amma araara waan arkanneef jechaas, Rabbi keeysatti gammachuu dhaani dhaadanna.
[12] Akkuma diliin karaa nama tokkoo tiin addunyatti dhuftetti, ammaas duuti niis karaa dilii tiin seentee, akkasumatti Banii Aadam hundinuu waan dilii hojjataniif, duuti niis Banii Aadam hunduma wal geeyse.
[13] Odoo seerri hin kannamin dura illee, diliin addunyuma irra jirti turte; haa tahuu malee, bakka seerri hin jirretti diliin, dilitti hin lakkaawamtu turte.
[14] Haa tahu malee, bara Aadamii jalqabee hanga bara Museetti duuti nama hunduma irratti mootomte; warra seera caphsuu dhaan akka Aadam hin yakkin irratti illee mootee ti jirti, Aadam fakkeenya isa dhufa jiru tokkoo ti ture.
[15] Kannaan Rabbi bilaashitti kanne ammoo, akka balleeysaa sanii tii miti. Namoonni hedduun balleeysaa nama tokkoo tiif jecha yoo du'an illee, ni'imaan Rabbii tii fi kannaan bilaash tan ni'imaa namticha tokko Yesuus Kiristoosiin dhufte, irra caalatti namoota hedduuf bash-bash taate.
[16] Wanti kannaan Rabbii tan bilaash fiddu ammoo, waan akka yakki namticha tokkoo fiddee tii miti. Firdiin balleeysaa namticha tokkoo irratti kannamte yakka murte; kannaan bilaash tan balleeysaa namoota hedduu duukaa dhufte ammoo, tan qaceelummaa namaaf lakkooysiftu taate.
[17] Balleeysaa nama tokkoo tiif jecha, duuti eega karaa namticha tokkoo tiin mootomte, eegasuu, warri ni'imaa bash-bashitti fudhatanii jiran, ammaas kanneen qaceelummaa kannaa bilaashitti arkatan, namticha tokkicha Yesuus Kiristoos keeysaan hammam irra caalatti jireenyatti haa mootaman ree!
[18] Eegasuu, akkuma balleeysaan nama tokkoo nama hundumaa irratti yakka mursiiftetti, akkasumatti ammaas gochi nama qaceelaa tokkoo tiis nama hundumaa qaceelotti lakkooysiftee jireenyatti geeysiti.
[19] Amrii fudhachuu diduu nama tokko irraa ka'ee namni hedduun dilaawoota tahan, akkasumatti amrii fudhachuu nama tokkoo tiiniis namni hedduun qaceelota ni tahu.
[20] Seera dabaluun badii hoddomeeysuufi; bakkuma badiin irratti hoddomaatetti ammoo, ni'imaan Rabbii caalatti hoddomaatte.
[21] Akkuma diliin karaa du'aa tiin mootetti, ni'imaaniis karaa Gooftaa keenyaa Yesuus Kiristoosiin jireenya bara baraatti nu geeysuuf qaceelummaa dhaan ni mooti.