[1] Kanaafiis ati yaa namana kan nama biraatti firdii gootu, waan itti sababattee jalaa baatuun hin qabdu! Atummaan kan namatti firdii gootu kun, waanuma namtichi sun godhe waan gootuuf jecha, atiis firduma isatti faraddeeeni if irrattiis firdii goota
[2] Nuti ammoo firdiin Rabbii, tan isiin warra waan akkasii hojjatan irratti dhuftu, firdii haqaa akka taate ni beeyna.
[3] Ati yaa namana, kan warra waan akkasii hojjatanitti firdii gootu, ifii kee tii ammoo waanuma san hogguu gootu, firdii Rabbii jalaa dheeysitee waan baatu sitti fakkaataa?
[4] Yookiin hoddomina gaarummaa isaa, obsa isaa, siif dandayuu isaa ni tuffattaa? Gaarummaan Rabbii gara toowbaatti akka si geeysu siif hin galuu ree?
[5] Mata-jabina kee tii fi qalbii toowbaa diddu tee tiin, ati lola guyyaa lolaa tiif, kan firdiin Rabbii tan haqaa itti mullattuuf if irratti ol tuulta.
[6] Rabbi nama hundumaa fuu adda addaan akkuma hojii isaatti ni kannaaf.
[7] Warra obsaan waan gaarii hojjachaa, durrii ulfinaa, kabajaa tii fi jireenya hin badnees barbaadaniif Rabbi jireenya bara baraa ni kannaafi.
[8] Namoota ifittoo tahaniif, warra dhugaa didanii haqa malee bulan san, lolaa fi dallansuu tu isaan eeggata.
[9] Warra hamaa hojjatan hundumaaf dararamaa fi rakkinaa tu isaan eeggata; kuniis duraan dursee warra Yihudootaa irratti, ammaas saboota qomoo Israa'el hin tahin irratti dhufa.
[10] Durriin ulfinaa, kabajaa fi nagayni warra gaarii hojjatan hundumaaf ni kannamu; kuniis duraan dursee warra Yihudootaaf, ammaas saboota qomoo Israa'el hin tahiniifiis ni kannama.
[11] Rabbi nama wal hin caalchisu.
[12] Warri seera odoo hin qabaatin yakkan hundinuu, seeraan maleetti karraqamu; warri seera jalatti yakkan hundinuu, seerichaan isaanitti faradama.
[13] Rabbi duratti qaceeloon warra seera dhagayan odoo hin tahin, waraa waan seerri ajaju godhuu tu warra qaceelotti lakkaawamu.
[14] Saboonni qomoo Israa'el hin tahin warri seericha hin qabne, uumama isaanii tiin waan seerichi gaafatu yoo hojjatan, seericha qabaachuu baatan illee, isaan ifumaa fuu seera tahu.
[15] Isaan, hojiin seerichi ajaju qalbii isaanii keeysatti akka barreeyfamee jiru ni agarsiisu; xalaliin isaanii tiis akkasumatti ragaa baati, yaadni qalbii isaanii tiis isaan kasasa, niis ni falamaafi.
[16] Akka Oduu Gammachuu ani barsiisutti, kuniis guyyaa Rabbi Yesuus Kiristoosiin dhooysaa namootaa zaahir baasee firdii godhutti beekamuuf taa'a.
[17] Ati ammoo, “Ani Yihudii dha” ifiin jettee, seeratti irkattee Rabbiini dhaadatta.
[18] Fedhii Rabbii tiis ni beeyta; seerichaaniis waan barsiifamteef jecha, waan caalu gargar baaftee ti himta.
[19] Balloota jaamoo karaa agarsiisaa tahuu keetii fi, ammaas warra dukkana keeysa jiraniifiis ibsaa akka taate if irratti amantaa qabda.
[20] Seericha keeysattiis beekumsaa fi dhugaa kan bifa kitaabaatti qophaawe waan arkatteef, gowwoota ni gorsita, wallaalotaas ni barsiifta.
[21] Duuba ati kan warra biraatuu qaraasiftu, ammoo if hin qaraasiftuu? “Hin hatin!” jettee oduma lallabduu, ati ammoo ni hattaa mitii?
[22] “Hin ejjin! Zinaa hin godhin!” jetta, ati ammoo zinuma san gootaa mitii? Ati waaqayyolii tolfamoo kan jibbitu, galma manneen sagadaa ni saamtaa mitii?
[23] Seera Rabbii qabaachuu kee tiin kan if dhaadattu, seericha caphsuu dhaan ammoo maqaa Rabbii ni sakkabdaa mitii?
[24] Akkuma Kitaaba keeysatti barreeyfamee jiru, “Sababa keeysaniif jecha maqaan Rabbii saboota saba Israa'el hin tahin jiddutti ni arrabfama” jedha.
[25] Waan Seerri ajaju hundumaa yoo goote, dheeyna-qabaan siif faayda qaba; seera nama caphsu yoo taate ammoo, dheeyna qabamuun kee tuu akka nama dheeyna hin qabaminii ti si godha.
[26] Namni dheeyna hin qabatin ammoo, waan seerri gaafatu yoo eege, dheeyna qabachuu dhabuun isaa akka dheeyna-qabaatti hin lakkaawamuufii ree?
[27] Eegasuu, namni akkuma uumametti odoo dheeyna hin qabatin jiraatee, waan seerri ajaju raawwatu, sitti firdi godha; ati seericha barreeyfame odoo qabduu, oduma dheeyna qabattuu tiis seera ni caphsita.
[28] Namni dhaloota qaamaa tiin Yihudii dhugaa hin tahu; dheeyna-qabaan foonii tiis dheeyna-qabaa dhugaa hin taatu.
[29] Namni keeysa namummaa isaa tiin Yihudii tahe ammoo, Yihudii dhugaa ti; dheeyna-qabaan tan qalbii tu dheeyna-qabaa dhugaa ti; kuniis hojii seericha barreeyfamee odoo hin tahin, hojii ruuhaa ti. Namni akkasii kuniis Rabbi biratti malee, namoota biratti hin beekamu.