[1] Ani Kiristoos keeysaan dhugaa dhaan dubbadha, hin kijibu; xalaliin tiyyaas Ruuhal Qudus wajjiin taatee ti ragaa anaaf baati.
[2] Garaa kiyya keeysaa gadda ulfaataan qaba; ammaas gaddi kuniis kan odoon gargar hin kutin na laaleysuu dha.
[3] Waan isaan gargaaru silaa tahee, bakka obboleeyyan kiyyaa, warra foonii fi dhiiga kiyya tahaniif jecha, ani mataan koo Kiristoos irraa gargar kutamee odoon abaaramee illee niin jaaladhaan ture.
[4] Isaan ummata Israa'eli; ilmummaan, durriin isaa, irbuuwwaniis, seerri kannamuus, Rabbi ibaaduuniis, ammaas warra abdiin adda addaa kannameefi.
[5] Isaan ilmaan abbootii angafoota shanyii Yihudaa ti; akka namummaa isaattiis Kiristoos asara isaanii keeysaa dhalate. Rabbi kan hundumaa gararraa jiru bara baraaf haa galateeyfamu! Aammiin.
[6] Tana jechuun, Qoowlii Rabbii tu bakka hanqate jechuu miti; haa tahu malee, dhalootaan Israa'el warri tahan hundinuu, Israa'el dhugaa tii miti.
[7] Asara Abrahaam namni tahe hundinuu joollee Abrahaami jechuu miti; haa tahu malee, “Yisihaaq keeysaani shanyiin siif lakkaawamti” jedhamee ti jira.
[8] Tana jechuun, asara namummaa foonii tahanii dhalachuun, joollee Rabbii nama hin godhu, ammoo warra abdii Rabbii tiin dhalatee tu, shanyii dhugaatti lakkaawama jechuu dha.
[9] Abdichi niis, “Wayta herregame sanitti deebi'ee niin dhufa, Saaraaniis ilma deeysee ti na eeydi” kan jedhu ture.
[10] Tana qofaa miti, Ribqaan joollee lamaan namticha Yisihaaq jedhamu abbaa keenya tokko irraa ulfooyte.
[11] Joolleen sun odoo hin dhalatin dura, ammaas hamaa fi gaariis odoo hin godhin, akeekni filannaa isaa dhaabbataa haa tahuuf jecha,
[12] “Inni angafni isa quxisuu dha kaadama” jedhamee haadha isaanitti himamee ti ture. Akkana tahuun, filannaan sirna Rabbitti malee, haala gocha namaa tiin akka hin taane beeysisuu fi.
[13] Akkuma Kitaabatti barreeyfamee jiru, “Ani Yaaqoob niin jaaladhe, Esaawu ammoo niin jibbe” jedha.
[14] Eegasuu maal haa jennu ree? Rabbi haqaan hin dalagu jechuu dhaa? LLakkii, kun tahuu hin dandayu
[15] Inni Musee dhaanuu, “Namaan rahamata godhuuf rahamataan godhaafi, namaan garaa laafeef garaan laafaafi” jedha.
[16] Kana waan taheef, akka rahamata Rabbitti malee, akka fedha yookiin tattaafii namaattii miti.
[17] Barreeyfamni Qulqulluun Fara'ooniin, “Ani maqaan kiyya lafa hundumaa irratti akka beekamuuf jechaan, humna tiyya si irratti agarsiisuufiin si kaase” jedhaani.
[18] Eegasuu inni nama fedheef rahamata ni godha, nama fedhees mata-jabeeysa ni godha.
[19] As irratti ati, “Eegasuu Rabbi, maaliif balleeysaa nama irra barbaada ree? Fedhii isaa tiin ammoo eenyuu tu mormuu dandaya?” anaan ni jetta taha.
[20] Ammoo ati yaa namana! Ati eenyu kan Rabbi jala deebifattu? Wanti harka namaa tiin tolfamte takka namticha tolcheen, “Maaliif akkana gootee na tolchite?” ni jettiinii?
[21] Namni suphee irraa waa tolchu tokko, suphee takka irraa, meeshaa faayaa, ammaas suphuma sani irraa meeshaa waan gad-galoof taatu tolchuuf mirga qabaa mitii?
[22] Haala kanaan Rabbiin lola isaa agarsiisuu fi humna isaa tiis beeysisuu yoo barbaade, warra meeshaa lolaa tahanii badiif qophaawan kanneeniif, hedduu dha dandayee obseefi.
[23] Akkasumatti namoota meeshaa rahamataa akka tahaniif, kanneen duraan dursee ulfinaaf qopheeyse irratti, badhaadhummaa ulfina isaa mullisuu dha barbaade.
[24] Nuti warri inni nu yaame; ummata Yihudaa qofa irraa odoon tahin, saboota qomoo Israa'el hin tahin keeysaa hiis yaamamnee ti jirra.
[25] Inni Kitaaba Hose'aa keeysatti, “Warra ummata kiyya hin tahiniin, ummata kiyya jedhee tiin yaama; tan hin jaalataminiis ‘Jaalatamtuu tiyya’ jedhee tiin yaama.
[26] Bakkuma, ‘Isin ummata kiyyaa miti’ jedhamee itti himametti, bakkuma sanitti isaan ‘Ilmaan Rabbii Jiraataa’ jedhamanii ni yaamamu” jedha.
[27] Isaayyaas ammoo waa'ee Israa'eliif: “Lakkooysi joollee Israa'el, akka cirracha bahar qarqaraa yoo hoddomaate illee, isaan keeysaa hambaa isaanii qofaa tu najaa baha.
[28] Gooytaan firdii isaa hatattamaan addunyaa irratti ni raawwata” jedhee ti labsa.
[29] Akkuma Isaayyaas duraan dursee dubbate sanitti, “Gooftaan hundumaa dandayu joollee odoo waan nuuf hin hambisin taatee, silaa nuti akka Sodoom taanee, Gomoraas fakkaannee ti turre” jedhe.
[30] Eegasuu amma maal haa jennu ree? Sabni qomoo Israa'el hin tahin fardii qaceelummaa duukaa odoo hin bu'in, qaceelummaa arkatanii ti jiru; qaceelummaan tuniis tan amantii keeysaan taatee dha.
[31] Ummanni Israa'el kanneen seera qaceelota isaan godhu duukaa bu'uuf tattaafatan illeen, isa raawwachuu bira hin geenye.
[32] Maaliif hanqatan? Isaan amantii keeysaan odoo hin tahin, akka waan qaceelummaan hojii keeysaan arkamtutti waan itti tattaafataniif jechaaf, isa bira gahuu hanqatan; isaan dhagaa gufannaa kan tahe, Kiristoos irratti gufatan.
[33] Akkuma Kitaaba keeysatti barreeyfame, “Kunoo ani dhagaa gufannaa siibaa nama kuffisuus Xiyoon keeysa niin kaaya, namni isatti amanu ammoo hin qaanfatu” jedhe.