[1] Eegasuu as irratti, Abrahaam, akka dhaloota fooniititti, abbaa abaabuu teenyaa laalchisuun maal jenna ree? Inni Rabbi duratti maal arkate?
[2] Abrahaam waan hojjateen, qaceelummaan odoo waan lakkaawamteef taatee, Rabbi duratti yoo tahuu baate illee, waan ittiin dhaadatu ni qaba ture.
[3] Barreeyfamni Qulqulluun maal jedha? “Abrahaam Rabbitti amane, tuniis qaceelummatti lakkaawamteefi” jedha.
[4] Mindaan nama hojjateef baafamu, haqa arkachuun isa irra jirutti lakkaawama malee, akka kannaa bilaashitti hin lakkaawamu.
[5] Namticha akka seerri ajajutti hin hojjanneef, kan ammoo Rabbii warra yakkamoota qaceelotti lakkaawutti amanuuf, amantiin isaa qaceelummatti isaaf lakkaawamti.
[6] Namticha waan seerri ajaju hin hojjatin, kan Rabbi qaceelummaa lakkaaweef, gammachuu akka qabu Daawwid dubbatee ti jira.
[7] “Warri badiin isaanii oomfii godhamteef, diliin isaanii tiis hagoogamteef, eeybifamoo dha!
[8] Namtichi Gooftaan dilii isaa itti hin lakkooyne eeybifamaa dha” jedhe.
[9] Nuti, “Amantiin Abrahaamiif qaceelummatti lakkaawamteef” jenna; barakaan tun warruma dheeyna qabatan qofaafi moo, warra dheeyna hin qabatiniifiis ni taati?
[10] Haala akkamitti qaceelummaan lakkaawamteef? Eega inni dheeyna qabate moo, odoo inni dheeyna hin qabatin dura? Eega inni dheeyna qabate boodaa miti, odoo inni dheeyna hin qabatin dura lakkaawamteef malee.
[11] Abrahaam milikkita dheeyna-qabaa ti fudhate; kuniis sumuda qaceelummaa kan odoo dheeyna hin qabatin amantiin arkatee dha. Kanaaf jecha, qaceelummaan akka isaaniif lakkaawamtuuf inni abbaa warra odoo dheeyna hin qabatin amanan hundumaa ti tahe.
[12] Inni warra dheeyna qabataniifiis abbaa dha; isaanuma warra dheeyna-qabatan qofaaf odoo hin tahin, warra karaa amantii kan abbaan keenya Abrahaam odoo dheeyna hin qabatin irra deeme irra, faana isaa duukaa bu'aniifiis abbaa dha tahe.
[13] Abdiin Abrahaamiif yookiin shanyii isaa tiif kannamte, addunyaa akka dhaaluufi; tuniis Abrahaam seera waan eegeef odoo hin tahin, amantii dhaan qaceelummaa waan arkateef jecha, isaaf kannamte.
[14] Namoonni seera eeguu dhaan dhaala san kan arkatan yoo tahe, amantiin namaa bilaashuma, abdiin Rabbii tiis gatii hin qabdu.
[15] Seerri lola Rabbii ti fida, ammoo odoo seerri waan hin jirre tahe, seera caphsuuniis hin jiru ture.
[16] Kanaaf jecha abdiin ni'imaa irratti irkatte, shanyii isaa hundumaafiis qooda eegamu akka taatuuf, amantii irra dhaabbatte. Kuniis warra seera eeyduu qofaaf odoo hin tahin, ammaas warra akka Abrahaamitti amananiifiis ni eegama; Abrahaam abbaa hunduma keenyaa ti.
[17] Abdiin tun fuula Rabbii dura jirti, “Saboota hedduuf abbaa akka taatuuf, ani si dhaabee tiin jira” kan jedhu barreeyfamee ti jira. Abrahaam ammaas Rabbi kan warra du'an jiraachisu, isa waan hin jirre akka jiraatu godhutti amanee ti jira.
[18] Abrahaam akka yaada namaatti waan abdachuun hin malle abdatee ti amane, “Shanyiin tee akkasitti ni hoddommaatti” akkuma jedhame, abbaa saboota hedduu dhaa akka tahu amane.
[19] Abrahaam dhagni isaa akka du'e, nama bara dhibba guute tahuu isaa, gadaameeysan Saaraa tiis akka waan du'ee tahuu isaa beeku illee ammoo, amantitti hin laafne.
[20] Inni amantitti jabaatee ti Rabbiif durrii ulfinaa dhiheeyse malee, amanuu dhabuu dhaan abdii Rabbi kanneef hin dhabne.
[21] Rabbi waan abdachiise godhuuf ammoo akka dandayu inni guutummaatti hubatee ti jira.
[22] Kanaaf jecha, “Qaceelummatti isaaf lakkaawamteef” jedhame.
[23] Jechi, “Isaaf lakkaawamte” jedhamu, Abrahaam qofaaf hin barreeyfamne.
[24] Nu warra amannuufiis ammaas akka lakkaawamtu barreeyfamee ti jira, nuti Rabbi kan Gooftaa keenya Yesuus warra du'an keeysaa kaasetti ni amanna.
[25] Yesuus badii teenyaaf jecha du'atti dabarfamee ti kanname; qaceelummaa akka arkannuufiis du'aa kaafame.