[1] Ani Phaawulos fedhii Rabbii tiin ergamaa Kiristoos Yesuus tahuuf kaniin yaamame, Sostenees obboleeysa Ruuhaanii wajjiin,
[2] gara waldaya Rabbii tan magaalaa Qorontoos jirtuu, gara warra karaa Kiristoos Yesuus qulqulleeyfamanii, warra kanneen bakka adda addaatti maqaa Yesuus Kiristoos Gooftaa hunduma keenyaa yaammatan hundumaa wajjiin, qulqulloota tahuuf yaamamanitti tana barreeysuu kiyya.
[3] Rabbi Abbaan keenya, Gooftaan keenya Yesuus Kiristoosiis ni'imaa fi nagayaas isiniif haa kannu!
[4] Ni'imaan Rabbii Kiristoos Yesuusiin waan isiniif kannamteef jecha, ani wayta hundumaa sababa keeysaniif Rabbii kiyya niin galateeyfadha.
[5] Isin karuma hundaanuu waan dubbattanii fi beekumsa hundaan Kiristoosiin taajirtanii ti jirtu.
[6] Kuniis wanni nuti Kiristoosiif ragaa baaneef isin keeysatti hundeeyfamee ti jira.
[7] Kanaaf, lammaffaa mullachuu Gooftaa keenyaa Yesuus Kiristoosii odoo eeggachaa jirtanii, kannaa Ruuhaa keeysaa takka illeen isinitti hin irrattu.
[8] Guyyaa Gooftaa keenyaa Yesuus Kiristoos sanitti akka isin warra yakka hin qabne taataniif, Gooftaan hanga dhumaatti isin ni jajjabeeysa.
[9] Rabbi, kan gara tokkummaa Ilma isaa Yesuus Kiristoos Gooftaa keenyaatti isin yaame, amanamaa dha.
[10] Yaa obboleeyyan koo, isin hundinuu waan dubbattan irratti akka walii galtan, yaadaa fi akeekaaniis sirritti tokkooytanii gargar bahuun maleetti akka jiraattan, maqaa Gooftaa keenya Yesuus Kiristoosiiniin gorsa isiniif dhiheeysa.
[11] Yaa obboleeyyan koo, wal dhabbiin akka isin jidduu jirtu, namoonni warra Klo'ee anatti himanii ti jiru.
[12] Wal-dhabbiiniin ani baanuus, isin keeysaa tokko, “Ani kan Phaawulos!” kaan, “Ani kan Apholos!” kaan, “Ani kan Keefaa ti!” kaan ammoo, “Ani kan Kiristoos!” jechuu keeysani.
[13] Kiristoosii tu gargar hiramee? Phaawulos tu isiniif jecha fannifame moo? Yookiin maqaa Phaawulositti cuuphamtanii?
[14] Kiriisphoosii fi Gaayos malee isin keeysaa nama biraa tokko illee bagaan hin cuuphin!
[15] Akkana taanaan namni tokko illeenuu, “Maqaa Phaawulositti cuuphamtan” isiniin jechuu hin dandayu.
[16] Haa tahu malee ammaas, Isxifaanaasii fi haaskaa isaa tiis cuuphee tiin jira; jarreen kana malee, kan biraa kaniin cuuphe hin yaadadhu.
[17] Kiristoos wangeela akkaan lallabuuf na erge malee, akkaan cuuphuuf ana hin ergine; ani hikmaa hayyummaa namaa tiin hin lallabne; kuniis Kiristoos fannoo irratti sablatee du'uun isaa gatii akka hin dhabneefi.
[18] Waa'ee fannifamuu Kiristoos dubbachuun, warra karaa badiidhaa irra jiraniif gowwummaa dha; nu warra najaa-bahuu irra jirruuf ammoo, inni humna Rabbii ti.
[19] Barreeyfamni Qulqulluun, “Hikmaa warra beeytotaa niin balleeysa, hubanna warra hubattootaa bakkaahiin darba” jedha.
[20] Namni beekaan eeysa jira? Barsiisaan seeraa tiis eeysa jira? Falaasafaan bara ammaa tiis eeysa jira? Rabbi hikmaa biyya addunyaa tana, gowwummaa godhee ti jiraa mitii?
[21] Namoonni biyya addunyaa dhaa, beekumsa isaanii tiin, Rabbi hikmaa isaa keeysatti beekuu dadhabnaan, gowwummaa barsiisa nuti lallabnuu tiin warra amanan najaa baasuun Rabbi gammachiise.
[22] Yihudoonni milikkitoota mu'ujizaa ti gaafatu, Giriigonni ammoo beekumsa barbaadu.
[23] Nuti ammoo, Kiristoosuma fannifame lallabna; kun ammoo warra Yihudootaatti gufuu dha, saboota kaan birattiis ammaas gowwummaa dha.
[24] Nu warra Rabbiin yaameef ammoo, Yihudoota taanuus yookiin warra Giriigii, Kiristoos humna Rabbii ti, hikmaa Rabbii tiis.
[25] Gowwummaan Rabbii tu beekumsa namaa irra caala, dadhabbiin Rabbii tiis jabina nama irra caalti.
[26] Yaa obboleeyyan koo! Isin wayta yaamamtan, namoota akkam akka taatan mee laalaa! Akka yaada namaatti hedduun keeysan warra beekumsa qabdanii miti; hedduun keeysan warra dhagayama qabdanii miti; hedduun keeysaniis shanyii warra gurguddaa keeysaa hii miti.
[27] Rabbi ammoo namoota bebbeekoo qaanfachiisuuf, waan biiyti addunyaa gowwatti lakkooytu filate; Rabbi warra abbaa irree qaanfachiisuuf waan biiyti addunyaa dadhabatti lakkooytu filate.
[28] Rabbi waan ni jira jedhamu dhabamsiisuuf, waan ni jira hin jedhamne, tan addunyaa biratti jibiritti lakkaawamtuu fi waan tuffatamaa dha filate.
[29] Akkana waan taheef jecha, namni tokko illeenuu fuula Rabbii duratti if hin dhaadatin.
[30] Yesuus Kiristoos keeysa jiraachuun keeysaniis waanuma Rabbi biraa tahe; Rabbi Kiristoos hikmaa keenya nuuf godhe; qaceelummaan, qulqullummaa fi naja-baasoo kan nuuf tahees isuma.
[31] Kanaaf jecha, “Namni if dhaadatu gocha Gooftaa Yesuusiin haa dhaadatu!” kan jedhu Kitaaba keeysatti barreeyfamee ti jira.