[1] Kana booddee isaan garba bishaanii gama, gara kutaa Gergeesaa ti dhufan.
[2] Akkuma Yesuus doonii keeysaa baheen, namtichi ruuhaan hamaan keeysa ture tokko, qabroota keeysaa bahee ti isatti dhufe.
[3] Namtichi kun qabroota keeysa gala; nam tokko illeen shanshalataan illee isa hidhuu hin dandeenye.
[4] Inni wayta hedduu shanshalataa fi hasbii harkaa tiin ni hidhama ture, ammoo shanshalata gargar kukkuta, hasbiis ni caccaphsa ture. Kanaaf nam tokko illeen isa adabachiisuu hin dandeenye.
[5] Namtichi kun wayta hundumaa, halkanii fi guyyaas qabroota keeysaa fi gaarran gubbatti bahee ti iyya, ammaas dhagaa dhaaniis if ni fofottoysa ture.
[6] Namtichi kun halaalatti Yesuus hogguu arke, gara isaa fiigee jilbiifatee ti Yesuusiif sagade.
[7] Iyyansa sagalee guddoo dhaan, “Yaa Yesuus Ilma Rabbii Gooytaa! Maal na irraa barbaadda? Hadaraa Rabbii ana hin zaliilin!” jedheeni.
[8] Yesuus “Ati yaa ruuhaa hamaa, namticha kana keeysaa bahi!” isaan jechaa waan tureefi.
[9] Yesuus maqaan, “Maqaan kee eenyu?” jedhee gaafannaan, ruuhaanichi ammoo, “Maqaan kiyya jundii dha, nuti hedduu dha” jedhee ti deebiseef.
[10] Hogguusuma namtichi, ruuhaanota hamoo san, keeysaa akka hin baafneef, jajjabeeysee ti Yesuus kadhate.
[11] Roga gaara dhihoo san jiru tokko irra, kunoo bobbaan booyyee dheedaa ti turan.
[12] Ruuhaanonni hamoon sun ammaas “Booyyee kanneenitti gallaa tii, itti nu ergi!” jedhanii ti Yesuus kadhatan.
[13] Hogguus inni isaaniif hayyame. Ruuhaanonni hamooniis namticha keeysaa bahanii ti booyyee sanitti galan. Bobbaan booyyee sun hanga kuma lamatti shallagamu turan, hallayyaa irraa gadi gara garba bishaanitti konkolaatanii ti bishaaniin karraqaman.
[14] Hogguus warri booyyee eegan orihanii ti, kana warra magaalaa keeysaa tii fi warra biyyaattiis odeeysan. Namoonni ammoo waan tahe kana laaluuf bahan.
[15] Yesuus bira wayta gayan, kunoo namtichi jundii ruuhaa hamaa dhaan qabamee ture sun, huccuu uffatee, qalbiin deebitee kan achi taa'aa jiru arkan; hundi isaanii tiis ni birratan.
[16] Warri duraan achi turanii tana arkaniis, waan namticha ruuhaan hamaan keeysa ture saniif tahee fi ammaas waan booyyettiis tahe, jara dhufan sanitti ni himan.
[17] Hogguus jarri kanneen, Yesuus naannoo isaanii keeysaa akka irraa bahuuf kadhatan.
[18] Yesuusiis achii deemuuf doonii seennaan, namtichi ruuhaa hamaa dhaan qabamee ture sun, “Si wajjii niin deema” jedhee ti isa kadhate.
[19] Yesuus ammoo, “Gara mana kee tii tii fi gara aalii tee tii deemii, waan Gooytaan siif godhe hundumaa, akkamittiis akka si maare isaanitti himi!” isaan jedhe malee, wajjiin deemuu hin hayyamneef.
[20] Namtichi niis achii deemee, kutaa mandaroonni kudhan keeysa jiran keeysa naannawee, waan Yesuus isaaf godhe hundumaa ni odeeyse; namoonni hundi niis ni ajaa'iban.
[21] Yesuus doonii dhaan deebi'ee garba bishaanii gama hogguu ceehe, namoonni hedduun gara isaatti walitti qabaman. Inni niis qarqara bishaanii ti ture.
[22] Hogguus, warra geggeeysituu mana sagadaa keeysaa tokko, kan maqaan isaa Yaayiros jedhamu dhufee, Yesuus arkee ti, miila isaa jalatti kufee,
[23] “Intalti tiyya dhukkubsattee du'utti jirti, akka isiin fayyitee jiraattuuf hadaraa koottuu tii, harka kee isii irra kaahi!” jedhee ti gadi jabeeysee isa kadhate.
[24] Inni niis isa wajjiin deeme; namoonni hedduuniis, irratti wal dhiibaa jala yaa'aa ti turan.
[25] Dubartiin bara kudha lamaaf dhiiyni irraa yaa'aa ture takkaas achi turte.
[26] Isiin ogeeysota qorichaa biratti hedduu cinqamtee, waan qabdu hundumaas kanuma irratti fixxe; haa tahu malee, wayyaawuu irra daranuu itti hammaachaa ti deeme.
[27] Isiin waa'ee Yesuus hogguu dhageeyse, namoota san jidduun, duuyda isaa duubaan dhuftee ti uffata isaa tuuyxe.
[28] Isiin, garaa isii keeysatti, “Uffatuma Yesuus qofa silaa tuqee, niin aafihama” jettee dubbattee ti turte.
[29] Hogguusuma dhiiyni isii irraa yaa'aa ture sun ni cite; isiiniis qaama isii keeysatti, dhukkuba isii san irraa akka aafihamte itti dhagayame.
[30] Yesuus hogguma humniti isa keeysaa bahuu, if irratti hubate, namoota keeysa garagalee ti, “Eenyuu tu uffata kiyya tuqe?” jedhee gaafate.
[31] Barattoonni isaa ammoo, “Dilli namaa si irratti wal dhiibaa akka jiru oduma agartuu, akkamitti ‘Eenyuu tu na tuqe?’ jettee gaafattaa?” jedhaniini.
[32] Yesuus ammoo, ammuma illee namuma akkana godhe san arkuuf, naannoo isaa ti toohate.
[33] Hogguu tana dubartittiin waan isiif godhame hubattee, sodaachaa, hollachaa dhuftee, miila Yesuus jalatti if darbitee, waan tahe hundumaa isatti himte.
[34] Yesuus ammoo, “Yaa intala too, amantiin tee si fayyiftee, nagayaan deemi, uzrii tee ti irraa hiis tan fayyite tahi!” isiin jedhe.
[35] Odoo Yesuus tana dubbachaa jiruu, namoonni mana Yaayiros, geggeeysituu mana sagadaa sanii irraa dhufanii ti, “Intalti tee duutee, asii achi maal irraa barsiisaa lafaasifta?” jedhaniin.
[36] Yesuus ammoo, oduu isaanii, hum-tokkotti illee odoo hin lakkaawin, geggeeysituu mana sagadaa saniin, “Hin sodaatinii, amani qofa!” jedheeni.
[37] Yesuus hogguus, Phexiroos, Yaaqoobii fi Yohannis obboleeysa Yaaqoob qofa malee, namni biraa akka isa wajjiin deemu hin hayyamne.
[38] Gara mana geggeeysituu mana sagadaa sanii hogguu dhufan, Yesuus ummata shoorarkaawee, booyaa ammaas iyyutti jiru arke.
[39] Inni mana hogguu seene, “Maaliif shoorarkooytanii boochu? Intalti hirriibatti jirti malee, hin duune” isaaniin jedhe.
[40] Ummanni niis isatti koflan. Inni ammoo hunduma isaanii gadi yaasee ti, abbaa intalaa tii fi haadha isii, warra isaa wajjiin turaniis fudhee, bakka intalti jirtu ol seene.
[41] Harka isii tiis qabee, “Xaaliitaa quumii!” jedheeni; ma'aanaan isaa, “Intalo! Ka'iin! siin jedha” jechuu dha.
[42] Intalti niis hogguma san kaatee ti, asii fi achi deddeemte; isiiniis intala bara kudha lamaa ti turte. Hogguus isaaniis hedduu ajaa'ibanii ti if wallaalan.
[43] Yesuus ammoo waan tahe kana nam tokko illeen beekuu hin hin qabu jedhee ti jabeeysee isaan ajaje, ammaas “Waan nyaattu itti kannaa!” jedhee ti isaanitti hime.