[1] Fariisonninii fi barsiisonni seeraa hangi tokko, kanneen Yerusaaleem irraa dhufan, Yesuus biratti walitti qabaman.
[2] Isaan kuniis barattoota Yesuus keeysaa hangi tokko harka xurii tiin, jechuun akka seera isaanitti odoo if hin xaaharin, akka biddeena nyaatan arkan.
[3] Fariisonninii fi Yihudoonni hundinuu, seera aadaa abboowwan isaanii waan eeganiif jecha, harka isaanii bishaaniin odoo xuluph hin godhin hin nyaatan.
[4] Hogguu lafa magaalaa tii galaniis if xaaharan malee, hin nyaatan turan. Ammaas kana malees seerran aadaa abboowwan isaanii, kanneen isaan eegan hedduu tu jira; waan akka geebbanii, quluu fi makrajaa tiis [siree illee] ni xaaharu turan.
[5] Kanaaf Fariisonninii fi barsiisonni seeraa, “Barattoonni kee akka seera aadaa abbootatti jiraachuu dhiisanii, maaliif harka xurii tiin biddeena nyaatu?” jedhanii ti Yesuus gaafatan.
[6] As irratti Yesuus deebisee, “Nabi Isaayyaas waa'ee teeysan, waa'ee warra fakkeeysitootaa laalchisuun raajiin inni dubbate sirrii dha; Rabbi akkana jedha, ‘Ummanni kun afaan isaa tiin ulfina anaaf kanna, garaan isaa ammoo hedduu dha ana irraa fagoo dha.
[7] Ana ibaaduun isaanii bilaashuma, isaan ajaja namaa ti akka heera kiyyaatti barsiisu’.
[8] Isin heera Rabbii gadi dhiiftanii ti, seera aadaa abboowwani ti qabattan” isaaniin jedhe.
[9] Yesuus itti furee, “Aadaa abboowwan keeysanii eeguuf jettanii heera Rabbii diiguuf heelaa gaarii dha qabdan.
[10] Museenuu, ‘Abbaa kee tii fi haadha tee tiif ulfina kanni!’ bakka biraatti ammoo, ‘Abbaa isaa tii fi haadha isaa kan arrabsu haa ajjeefamu!’ jedhee ti jira.
[11] Isin ammoo, namni abbaa isaa tii fi haadha isaa gargaaruun irra ture tokko isaaniin, ‘Wanti na biraa isiniif kannamee ittiin fayyadamuu turtan sun, amma kunoo qurbaana tahee ti jira’, akkana jechuuniis ‘Rabbiif qodhamee ti jira’ yoo jedhe ‘Gaarii godhe’ jettu.
[12] Haala kanaan inni deebi'ee abbaa isaa tii fi haadha isaa tiif waa takka illee akka hin goone gootu.
[13] Kana kan fakkaatan waan hedduu godhuu dhaan, seera aadaa abboowwan keeysanii kan waliif dabarsitaniin, Qoowlii Rabbii bakka dhoorkitu” isaaniin jedhe.
[14] Yesuus ammaas namoota ifitti yaamee ti, “Dubbiin tun isiniif haa galtuu, mee hundi keeysanuu na caqasaa!
[15] Wanni alaa namatti galee, nama najisuu dandayu, tokko illeen hin jiru; ammoo, waan yaada garaa namaa keeysaa bahuu tu nama najisa malee.
[16] [Gurra dhagayuun namni qabu haa dhagayu!]” isaaniin jedhe.
[17] Hogguu Yesuus namoota dhiisee mana seene booda, barattoonni isaa ma'anaa fakkeenya sanii ti isa gaafatan.
[18] Inni hogguus, “Isiniis akkuma warra kaanii hammanuma manduusoo dhaa? Wanni alaa namatti galu hundinuu, nama najisuu akka hin dandeenye isiniif hin galuu?
[19] Inni qalbii namaatti odoo hin tahin, qochumatti galee ti, booddee achumaan qaama isaa keeysaa ala baha” isaaniin jedhe. Akkanatti nyaanni hundinuu xaahara akka tahe ibse.
[20] Yesuus itti furee, “Waan qalbii namaa keeysaa bahuu tu nama najisa.
[21] Yaadni hamaan hundinuu, keeysa qalbii namaa irraa baha; isaaniis, zinaa, hanna, nama ajjeechaa,
[22] ejjummaa, bolola, sharrii, histii, naamus-dhabuu, ija kajeellaa, maqaa-balleeysuu, if tuulummaa, dagattummaa.
[23] Wanni hamoon kanneen hundinuu, qalbii namaa keeysaa bahanii ti nama najisu” jedhe.
[24] Yesuus ammaas achii deemee ti naannoo magaalaa Xiiroosii fi Siidoon dhaqee ti, mana tokko seene. Hogguus namni tokko illeen achi jiraachuu isaa akka hin beeyne barbaadee ti ture; haa tahu malee, dhooyfamuun isaaf hin dandayamne.
[25] Hogguusuma dubartiin takka, tan intalti isii ruuhaa hamaa dhaan qabamte, waa'ee isaa dhageeysee ti, dhuftee miila isaa irratti kufte.
[26] Dubartiin sun nama kutaa Fiinqee Sooriyaa taatee, afaan Giriigii ti dubbatti turte; isii tu ruuhaa hamaa intala isii keeysaa akka baasuuf Yesuus kadhatte.
[27] Hogguus inni, “Dura, joolleen nyaatanii haa quufanii, biddeena joollee dhaa fuudhanii sarootaaf darbuun sirrii miti” isiin jedhe.
[28] Isiin ammoo deebiftee, “Yaa Gooftaa, bar saroonni niis, hambaa gabatee joollee irraa bubu'u nyaatu” jetteeni.
[29] Yesuus ammoo, “Sababa akkana jettee dubbatteef jecha, nagayaan karaa kee bu'i, ruuhaan hamaaniis intala tee keeysaa bahee ti jira” isii dhaan jedhe.
[30] Hogguu isiin manaatti deebite, intala isii tan ruuhaan hamaan keeysaa bahee, siree irra ciiftu agarte.
[31] Kana booddee Yesuus kutaa Xiiroosii ka'ee ti, karaa Sidoon kutaa mandaroota kurnanii keeysa dabree, Garba Bishaan Galiilaa ti dhaqe.
[32] Jarreen tokko hogguus, namticha dhegelaa-didaa tokko gara Yesuus fidanii ti, akka inni harka isaa irra kaayuuf kadhatan.
[33] Inni namticha san namoota keeysaa kophaatti achi baasee ti, quba isaa gurra isaa keeysa kaayee, itti tufee ti arraba namtichaa tuqe.
[34] Samii ol laalaa, hafuura dheeraa baafatee ti, “Efaataah” isaan jedhe; akkana jechuuniis “Banami!” jechuu dha.
[35] Hogguusuma gurri isaa banamee arrabni isaa tiis hiikamee, sirritti dubbachuu jalqabe.
[36] Yesuus ammoo waan tana nama tokkotti illee hin himin isaan jedhe; isaan ammoo hammuma inni hin himinaa, isaaniin jedhu takka, isaan ammoo daranuu labsan!
[37] Ummanni hogguus hizaaba malee dha baaseeyfatee, “Inni waan hundumaa akka gaarii dha godhe; dhegelaan akka dhagayan, didaan akka dubbatan godha” jedhan.