[1] Jidduu san hogguu ummanni hedduun ammaas deebi'anii walitti qabaman, waan nyaatan dhabnaan, Yesuus barattoota isaa yaamee ti, akkana isaaniin jedhe,
[2] “Ummanni kun guyyaa sadeen kana anaa wajjiin ture, waan nyaatuus humaa waan hin qabneef jecha hunduma isaanii tiif natti dhagayama.
[3] Akkuma beelawanitti gara mana isaanitti yoon isaan erge, karaa irratti ni kukkufu; isaan keeysaa warri lafa fagoo dhaa dhufaniis ni jiru” jedheeni.
[4] Barattoonni isaa ammoo deebisanii, “Eeysumaahi nam tokko illeen, namoota kanneen hundumaaf, lafa umnaa tana keeysaa, biddeena isaaniif gahu fidee nyaachisuu dandaya?” jedhaniin.
[5] As irratti inni, “Biddeena meeqa asii qabdu?” jedhee isaan gaafannaan, isaan ammoo, “Biddeena torba qabna” jedhaniin.
[6] Hogguus lafuma san tattaa'aa jedhee ti orma ajaje. Biddeena torban san fuudhee Rabbiif galata galchee, kukkutee namootaaf akka dhiheeysaniif jecha, barattoota isaatti kakkanne; isaaniis namoota saniif ni dhiheeysan.
[7] Kalluuna xixiqqaa muraasaas ni qabu turan; Yesuus isaaniis eeybisee ti namootaaf akka hiraniif barattootatti hime.
[8] Ummanni sun nyaatee ti quufe; hambaa irraa hafees, safii gurguddoo torba guutuu dha walitti qaban.
[9] Kana booddee inni namoota san gadi dhiise; namoonni sun hanga kuma afurii ti turan.
[10] Hogguusuma barattoota isaa tiin wajji doonii seenee, gara kutaa Daalmaanutaa deeme.
[11] Hogguus Fariisonni dhufanii ti Yesuusiin morkutti ka'an; isa fitinuufiis milikkita samii irraa akka isaan agarsiisuuf gaafatan.
[12] Inni ammoo hafuura dheeraa baafatee ti, “Dhaloonni ammaa kun maaliif milikkita gaafata? Ani dhugumaan isiniin jedha, milikkinni dhaloota kanaaf kannamu hin jiru” jedhe.
[13] Kana booddee isaan dhiisee, doonii seenee ti gama ceehe.
[14] Barattoonni hogguu amnaaf karaa bu'an, biddeena tokkicha doonii keeysaa if biraa qaban malee, biddeena biraa fuudhuu irraanfatanii ti turan.
[15] Yesuus isaan akeekkachiise, “Hubadhaa! Rushii warra Fariisotaa tii fi tan Herodis irraa if eeggadhaa!” jedheeni.
[16] Isaan ammoo, “Waan nuti biddeena hin qabneef akkana jedhuu isaa ti” jedhanii ti waliin dudubbatan.
[17] Inni tana hubachuu dhaan, “Maaliif waa'ee biddeena dhabuu keeysanitti hiiytanii dudubbattu? Isin amma illee isinitti hin mullatuu yookiin hin hubattanii? Qalbiin teeysan isin qaaccooytee?
[18] Ija oduma qabdanii hin agartanii? Gurraas oduma qabdanii hin dhageeysanii? Hin yaadattaniisii?
[19] Hogguun ani biddeena shanan namoota kuma shaniif kukkute, hambaa isaa safii meeqa guutuu dha fuutan?” isaaniin jedhe; isaan ammoo, “Kudha lama” jedhaniin.
[20] Itti furee ammaas, “Hogguun ani biddeena torban namoota kuma afuriif kukkutees, hambaa isaa safii gurguddoo meeqa guuttanii ti fuutan?” jedheeni; hogguus isaan, “Torba” isaan jedhan.
[21] Eegasuu, “Isin amma illee hin hubattanii?” isaaniin jedhe.
[22] Kana booddee Beetesayidaa dha dhufan. Achittiis jarreen tokko namticha jaamaa tokko gara Yesuus fidanii ti, akka inni harkaan isa tuqu kadhatan.
[23] As irratti inni namticha jaamaa san harka qabee ti ganda keeysaa diidatti achi baasee, ija namtichaatti tuttufee, harka isaa tiis irra kaayee, “Waa takka illee arkuu dandeeysaa?” jedhee ti gaafate.
[24] Namtichi ol laalee, “Namoota niin arka, ammoo muka deddeemu natti fakkaatu” jedheeni.
[25] Inni ammaas harka isaa ija namtichaa irra kaaye, hogguus ijji namtichaa fayyitee, zaahiritti laalee, waan hundumaa akka gaaritti arke.
[26] Kana booddee Yesuus, “Ganduma illee deebitee hin seeninii!” gara mana kee tii deemi, jedhee ti isa erge.
[27] Kana booddee Yesuus barattoota isaa wajjiin bahee ti, gara gandeen naannawa magaalaa Qiisaariyaa Filiphoos dhaqe. Karaa irrattiis, “Namoonni eenyu anaan jedhu?” jedhee ti barattoota isaa gaafate.
[28] Isaan hogguus, “Yohannis Cuuphaa dha siin jedhu, kaan ammoo nabi Eliyaasi siin jedhu, kaaniis nabiyyoota keeysaa tokko siin jedhu” jedhanii ti deebisaniif.
[29] Inni ammaas, “Isin hoo, eenyu anaan jettu?” jedhee ti isaan gaafate. Hogguus Phexiroos deebisee, “Ati Masiihicha” jedheeni.
[30] Hogguus inni waa'ee isaa nama tokkotti illee akka hin himne cimsee ti isaan dinniine.
[31] Yesuus ammaas, “Ilmi Namaa, manguddootaa fi luboota warra angafootaan, barsiisota seeraa tiiniis hedduu dararamuu fi raawwatee tuffatamuun, ammaas ajjeefamuun isa irra jira; guyyaa sadih booddee ammoo du'a keeysaa ni ka'a” jedhee ti isaan barsiisuu jalqabe.
[32] Inni dubbii tana zaahiritti dubbate; Phexiroos ammoo moggatti isa achi baasee ti, “Tana hanqu!” jedhee ti isa oofutti ka'e.
[33] Inni ammoo if irra garagalee barattoota isaa tiis laalee ti, Phexiroosiin, “Na duubatti deebi'i yaa Sheeyxaana! Ati tan namootaa malee, tan Rabbii hin yaaddu” jedhee ti loleeni.
[34] Inni ummata danuu barattoota isaa wajjiin ifitti yaamee ti, “Nam tokkoo illeen ana duukaa bu'uu yoo barbaade, if kaaduu dha qaba; fannoo isaa tiis ol fuudhee baadhatee, ana duukaa haa bu'u!
[35] Namtichi lubbuu isaa jiraachisuu barbaadu, lubbuun isaa duraa ni fudhatamti; namticha anaa fi Wangeelaaf jecha lubbuu isaa kannu ammoo, isii ni jiraachifata.
[36] Guutummaa addunyaa tuu qabaatee, namtichi lubbuu isaa yoo dhabe, faaydaan isaa maali?
[37] Yookiin, bakka gatii lubbuu isaa tiif namni maaluma kannuu dandaya?
[38] Nama, dhaloota gantuu fi dilaawaa kana keeysatti, anattii fi qoowlii tiyyatti qaanfatetti, Ilmi Namaa tiis ulfina Abbaa isaa tiin, maleeykoota qulqulloota wajjiin hogguu dhufu, isatti ni qaanfata” jedhe.