[1] Yesuus bakka sanii ka'ee deemee ti, gara magaalaa kutaa inni itti dhalatee ti dhufe; barattoonni isaa tiis, isa duukaa dha deeman.
[2] Guyyaa Sanbataa mana sagadaa keeysatti barsiisuu dha jalqabe. Warri isa dhagayan hedduun ajaa'ibanii, “Waan tana hundumaa namtichi kun eeysumaa arkate? Hikmuma akkamii tu isaaf kanname? Hojii baasaa tan akkam akkamii tu harka isaa tiin hojjataman?
[3] Namni kun, najjaarticha ilma Maariyaam, ammaas obboleeysa Yaaqoob, Yosees, Yihudaa tii fi Simoonii mitii? Obboleeyyan isaa dubarranii tiis as nu wajji jiraatuu mitii?” jedhanii ti isa didan.
[4] Yesuus ammoo, “Nabiyyiin tokko, isaa, aalii isaa jidduttii fi, mana isaa keeysatti yoo taate malee bakka biraatti kabajaa hin dhabu” isaaniin jedhe.
[5] Namoota muraasa dhukkubsatoo irra, harka isaa kaayee isaanuma qofa fayyisuu malee, hojii baasaa jajjabduu achitti hojjachuu hin dandeenye.
[6] Amanti-dhablummaa isaanii ammoo hedduu dha dinqifate. Kana booddee inni gandeen keeysa deemee ti barsiise.
[7] Hogguus Yesuus warra kudha lamaan ifitti yaamee, ruuhaanota hamoo irratti amrii isaaniif kannee ti, lama lamaan isaan erge.
[8] Karaa f ammoo ulee malee, waan biraa takka illee, biddeena, korojoo fi, ammaas maallaqaas akka hin guduunfanne isaan ajaje.
[9] Kophee akka kaayatan, qamisa lama ammoo wal gubbaan akka hin uffanne isaanitti hime.
[10] Akkasumatti ammaas, “Mana tokko eega seentan, hanga magaalaa san gadi lakkiftanii deemtanitti achuma keeysa turaa;
[11] haa tahu malee, bakka takkatti yoo isin fudhachuu baatan, yookiin yoo isin dhaggeeyfachuu didaniis, akka ragaa isaanitti bahuuf jecha, hogguu bakka sanii deemtan, dhukkee miila keeysanii if irraa achitti dhadhawadhaa!” isaaniin jedhe.
[12] Akkasitti warri kudha lamaan bahanii, namoonni akka toowbaa galaniif lallaban.
[13] Isaaniis ruuhaanota hamoo hedduu dha baasan, warra dhukkubsachaa turaniis hedduu dha dhadhaan muudanii, isaan fayyisan.
[14] Maqaan Yesuus ballinaan waan beekamee tureef, Herodis mootichi niis waa'ee isaa ni dhagaye. Warri tokko tokko, “Yohannis Cuuphaa tu du'aa ka'e, kanaaf humniti quduraa gurguddoon akkanaa isaan hojjatamaa jiru” jedhan.
[15] Warri kaan, “Inni Eliyaasi” jedhan; amma illee warri biraa “Nabiyyuma tokko, kan akka nabiyyoota warra durii ti” jedhan.
[16] Herodis waa'ee isaa hogguu dhagaye, “Yohannisuma kaniin ani mataa isaa mursiisee tu du'aa kaafame” jedhe.
[17] Herodis, Herodiyaas niitii obboleeysa isaa Filiphoos waan fuudheef jecha, nama itti ergee Yohannis qabsiisee hiisisee ti ture.
[18] Yohannis Herodisiin, “Niitii obboleeysa kee tii duraa fudhachuun kee seeraa miti” jedheeni.
[19] Herodiyaas Yohannisitti hijooytee, isa ajjeesuu ni barbaaddi turte, ammoo hin dandeenye.
[20] Yohannis nama qaceelaa fi qulqulluu tahuu isaa Herodis beekee, isa sodaachaa waan tureef, isa nagayaan ni eegsisa ture. Hogguu Yohannis dhaggeeyfatu, hedduu dha battisa ture; tahu illee isa dhaggeeyfachuu ni fedha ture.
[21] Hogguu Herodis, yaadannoo guyyaa dhaloota isaa ilaalchisee, shuumoota bulchaa isaa tii fi ajajoota warra loltuu, ammaas warra kutaa Galiilaa keeysaa beekamaniif, azuumaa godhe irratti, Herodiyaas carraa gaarii dha arkatte.
[22] Intalti Herodiyaas ol galtee hogguu sirbite, Herodisii fi keeysummoota isaa tiis ni gammachiifte. Mootichi hogguus intalattii dhaan, “Waanuma barbaadde na gaafadhu, aniis siif niin kanna!” jedheeni.
[23] Ammaas, “Waanuma ati na gaafattu hanga walakkaa mootummaa tiyyatti siifiin kanna” jedhee ti kakuu dhaan wa'ada galeef.
[24] As irratti intalattiin gadi baatee ti, “Maal haa gaafadhu?” jettee haadha isii dhaa gaafannaan; haati, “Mataa Yohannis Cuuphaa” jettee ti deebifteef.
[25] Akkasitti intalti hogguusuma jerjeraan gara mootichaatti ol deebitee ti, “Ammumaan tana akka ati, mataa Yohannis Cuuphaa safii irratti anaaf kannituun barbaada” jetteeni.
[26] As irratti mootichi hedduu dha nahe; ammoo sababa inni keeysummoota isaa duratti, kakuu dhaan wa'ada isiif gale jecha, waan abdachiise san dhoorkuu hin barbaanne.
[27] Akkasitti mootichi hatattamaan loltuu waardiyyaa tokkoo ergee, mataa Yohannis akka fiduuf ajaje; namtichi niis dhaqee ti mana hidhaa keeysatti mataa Yohannis irraa mure.
[28] Akkasitti safii irratti mataa isaa fidee ti intalaaf kanne; intalti niis haadha isii tiif kannite.
[29] Barattoonni Yohannis tana hogguu dhagayan, dhufanii ti reefka isaa fuudhanii, qabrii keeysa dagalchan.
[30] Ergamoonni eegasii Yesuus biratti deebi'anii ti, waan hojjatanii fi waan barsiisan hundumaa isatti himan.
[31] Hogguus namoonni hedduun, achi gahaa ammaas deemaa waan turaniif jecha, nyaataaf illee wayta dhabnaan, inni isaaniin, “Isin qoftiin koottaa, lafa umnaa dheeynee, xiqqo fatraa arkadhaa!” jedheeni.
[32] Hogguus isaan kophaa isaanii doonii seenuu dhaan, gara lafa umnaa takka dhaqan.
[33] Hogguus namoonni hedduun deemuu isaan arkanii, isaan tahuu hubannaan, mandaroota hundumaa keeysaa miilaan fiiganii ti, isaan dura bakka san gahan.
[34] Yesuus hogguu doonii keeysaa bishaan qarqaratti bahe, namoota hedduu san arke. Isaan akka hoolota tiksituu hin qabnee waan turaniif jecha isaaniif garaa laafe, waan hedduus isaan barsiisuu jalqabe.
[35] Hogguu guyyaan dhihaaf golgolaawe, barattoonni isaa gara isaa dhufanii ti, “Tun lafa umnaa ti, za'aaniis ammaas deemtee ti jirtii;
[36] gara manneenii fi gandeen nutti dhihaatan kanneen dhaqanii, waan nyaatan akka bitataniif jara kana gadi dhiisi!” jedhaniini.
[37] Inni ammoo deebisee, “Isinummaan waan isaan nyaatan kannaaf!” jedheeni. Isaan ammoo, “Deemnee qarshii dhibba lamaan biddeena binnee isaan haa nyaachifnuu ree?” jedhaniin.
[38] As irratti inni, “Biddeena meeqa qabdan? Mee deemaa tii laalaa!” isaaniin jedhe. Isaaniis meeqa akka qaban eega baran booda, “Biddeena shanii fi kalluuna lama qabna” jedhaniini.
[39] Hogguus inni, orma hunda, murna murnaan coqorsa citaa irra akka teeysisaniif ajaje.
[40] Akkasitti isaaniis dhibba dhibbaan, shantam shantamiiniis, murna murnaan tattaa'an.
[41] Biddeena shananii fi kalluuna lamaan fuudhee ti, gara samii ol laalaa eeybise. Biddeena san kukkutee namootaaf akka dhiheeysaniif barattoota isaatti kakkanne; kalluuna lamaaniis hunduma isaanii tiif hirsiise.
[42] Isaan hundinuu nyaatanii ti quufan.
[43] Barattoonni niis hambaa biddeenaa tii fi tan kalluunaa, safii kudha lama guutuu dha fuudhan.
[44] Warri biddeena san nyaatan dhiirtummaan qoftiin, kuma shan turan.
[45] Hogguusuma Yesuus hanga ifiif ummata san gadi dhiisuu, barattoonni isaa doonii seenanii, dafanii isa dura Beetesayidatti gama akka ceehan godhe.
[46] Eega ummatatti nagaya dhaammate booda, inni kadhata gochuuf gaaratti ol bahe.
[47] Hogguu golgolaawe, doonittiin garba bishaanii walakkaa dha turte; Yesuus ammoo kophaa dha lafa irra ture.
[48] Barattoonni isaa doonii dhaan odoo deemaa jiranii, bubbeen isaan afaan gara galtee bubbisuu irraa kan ka'e, rakkachaa akka turan arke. Waarii booda iyyansa lukkuu lammaffaatti, jechuun gara bariisaa, bishaan gubbaa deemaa isaanitti dhufe; inni isaan cinaan dabruuf yaade.
[49] Bishaan gubbaa odoo inni deemuu hogguu arkan, ruuhaaniyyii seehanii ti baaragaan iyyan.
[50] Hundi isaanii tiis waan isa arkaniif ni birratan. Inni ammoo hogguusuma, “Abshir! Bar anaa, hin sodaatinaa” jedhee ti isaanitti dubbate.
[51] Inni isaan wajjiin doonii keeysa seene; bubbeeniis qax jettee ti dhaabbatte. Isaaniis waanuma jedhan wallaalan.
[52] Isaan, waan inni biddeena saniin hojjate illee hubachuu hin dandeenye; qalbiin isaanii tiis amma illee akkuma dhagaatti jabaatti.
[53] Hogguu gama ceehan, Genesaarexitti lafa bahanii ti, qarqara bishaanitti doonii isaanii hidhatan.
[54] Hogguma isaan doonii keeysaa bahan, namoonni Yesuus tahuu isaa hubatan.
[55] Naannawa san hunduma keeysaa, asii fi achi fiigaa, bakka inni gahe jechuu dhagayan hundumatti, namoota dhukkubsatoo siree dhaan fuudhanii itti fidu turan.
[56] Gandeen, mandarootaa fi baadiyyaa inni dhaqe hundumatti, dhukkubsattoota lafa magaalaa keeysa cicciibsanii, akka isaan xarzuma huccuu isaa illee tuqaniif, isa ni kadhatu turan; hangi xarzii huccuu isaa tuqe hundinuu ni aafihaman.