[1] Yerusaaleem gahuuf dhihaatanii, Gaara Ejersaa jalatti Beetfaagee fi Bitaaniyaatti hogguu dhufan, Yesuus barattoota isaa keeysaa nama lama ergee ti,
[2] “Mee ganda fuullee keeysan jiru kana dhaqaa tii, akkuma seentaniin, nyagoo harree tan takkaa namni irra hin taa'in hidhamtee ti agartuu; hiikaa tii fidaa.
[3] Namni tokko illeen yoo ‘Maaliif tana gootu?’ jedhee isin gaafate, ‘Gooftaa tu itti haajame, inni niis ammumaan tana deebisee as erga’ jedhaan!” isaaniin jedhe.
[4] Akkasitti isaaniis deemanii, nyagoo san ala karra duratti, tan karaa irraatti hidhaa arkanii ti hiikan.
[5] Jarri achi dhaabbachaa turan tokko, “Maal godhuuf nyagoo tana hiiku?” isaaniin jedhan.
[6] Barattoonni ammoo waanuma Yesuus jedhe itti himan, jarri niis akkasitti deemuu hayyamaniif.
[7] Nyagoo saniis gara Yesuus fidanii ti, huccuu isaanii irra kaayan; inni niis irra taa'e.
[8] Namoonni hedduun uffata isaanii, warri kaan ammoo dameelee baalaa, mukkeen dirree keeysaa irraa ciranii ti, karaa inni irra dabru irra afan.
[9] Warri isa dura yaa'anii fi warri duukaa deeman, sagalee isaanii ol fudhatanii ti, “Hosaanaa! Inni maqaa Rabbii Gooytaa tiin dhufu galateeyfamaa dha.
[10] Mootummaan Daawwid abbaa keenyaa tan dhuftu galateeyfamtuu dha! Hosaanaa ol samii gubbatti” jedhan.
[11] Yesuus Yerusaaleem seenee, gara Beeytal Maqdas dhaqee ti, waan hundumaa laale; galgalaawuu jalqabnaan barttoota kudha lamaan wajjiin bahee gara Bitaaniyaa ti deeme.
[12] Guyyaa borumtii dhaa hogguu Bitaaniyaa bahan, Yesuus ni beelawe.
[13] Muka habruu tan baala qabdu takka halaalatti arkee ti, firii irra barbaaduuf dhaqee hogguu bira gahe, baala malee waa takka irraa dhabe; manziilli suniis kan habruun firii itti gootu hin turre.
[14] Yesuus hogguus muka saniin, “Nam tokko illeen asii achi gonkumaa firii si irraa hin nyaatin” jedheeni; barattoonni isaa tiis akkana jechuu isaa ni dhagayan.
[15] Akkuma Yerusaaleem gahaniin, Yesuus hogguusuma Beeytal Maqdas seenee ti, warra achi keeysatti naggadan gadi baasuu dha jalqabe, miizzan warra maallaqa sharafuu tii fi barcuma dagalee kanneen warra himiimii gurguranii tiis ni kokombolche.
[16] Nam tokko illeen shaqaxa baadhatee Beeytal Maqdas keeysa dabruu ni dhoorke.
[17] Yesuus ummata barsiisuuf, “‘Manni kiyya, saboota hundumaa fuu, mana kadhataa jedhamee ti yaamama’ kan jedhu hin barreeyfamnee ree? Isin ammoo holqa hattuu ti isa gootan” isaaniin jedhe.
[18] Luboonni warri angafoonninii fi barsiisonni seeraa tiis dubbii tana dhageenyaan, karaa isa ittiin balleeysan barbaadan; barsiifni isaa garaa namoota hundumaa tuqee waan isaan harkiseef jecha, isa irraa ni sodaatu turan.
[19] Hogguu galgalaawe, Yesuusii fi barattoonni isaa mandaricha keeysaa bahan.
[20] Ganama barii odoo achiin dabraa jiranii, habruun sun hiddumaa kaaftee akka goggooyde arkan.
[21] Phexiroos hogguus waan tahe yaadatee, “Yaa barsiisaa! Ilaali, habruun ati abaarte sun goggooydee ti jirti” jedheeni.
[22] Yesuus ammoo deebisee, “Amantii Rabbi irratti qabaadhaa!
[23] Dhugumaan isiniin jedha, namni garaa isaatti odoo hin mamin gaara kanaan, ‘Ka'ii tii bahar keeysatti darbami!’ jedhee, wanni inni jedhees akka taatuuf yoo amane, ni tahaaf.
[24] Kanaafiin isinitti hima; waan kadhannaan gaafattan hundumaa, akka waan fudhatanitti lakkaawaa amanaa, isiniif tahaasi!
[25] Kadhachuuf hogguu dhaabbattan, Abbaan keeysan kan samii irraa dilii teeysan akka isiniif oomfii godhuuf jecha, waa takka illee nama irratti yoo qabaattan, oomfii godhaaf!
[26] [Isin yoo namaaf oomfii godhuu baattan ammoo, Abbaan keeysan kan samii irraa tiis dilii teeysan oomfii isiniif hin godhu]” jedheeni.
[27] Isaan ammaas Yerusaaleem dhaqan; Yesuus Beeytal Maqdas keeysa odoo deddeemuu, luboonni warri angafoonninii fi barsiisonni seeraa, manguddoonni niis gara isaa ti dhufan.
[28] Yesuusiin ammaas, “Amrii maalii tiin tana hundumaa goota? Yookiin tana hundumaa akka gootuuf eenyuu tu amrii tana siif kanne?” jedhaniin.
[29] Yesuus ammoo deebisee, “Anis dubbii takkaan isin gaafadha, anaaf deebisaa! Aniis amrii maalii tiin tana hundumaa akkaan godhu isinitti niin hima.
[30] Cuuphaan Yohannis cuuphe, Rabbi biraa hi moo, nama biraa ajajame? Mee anaaf deebisaa!” isaaniin jedhe.
[31] Isaan hogguus, “Rabbi biraahi yoo jenne, ‘Eegasuu isin maaliif isa hin amaninaa ree?’ nuun jedha,” jedhanii ti walitti falaman.
[32] Duuba, “Nama biraa ajajame” jennaa ree? Tana akka hin jennees, ummanni hundinuu Yohannis nabiyyii tahuu isaa waan fudhataniif jecha, ummaticha ni sodaatu turan.
[33] Kanaaf, “Nuti hin beeynu” jedhanii ti Yesuusiif deebisan. Yesuus ammoo, “Eegasuu, aniis, tana hundumaa amrii maalii tiin akkaan godhu isinitti hin himu” isaaniin jedhe.