[1] Yesuus ammaas mana sagadaa tokko ol seene, namtichi harki isaa tokko naaffatees ammaas achi ture.
[2] Jarri tokko ammoo, inni guyyaa Sanbataatti, namticha kana yoo kan fayyisu tahe laalanii isa kasasuuf ni basaasu turan.
[3] Yesuus namticha harki isaa naaffate saniin, “Mee gamana koottu” jedheeni.
[4] Hogguus Yesuus, “Seerri guyyaa Sanbataatti, gaarii dalaguu dha moo hamaa dalaguu, yookiin lubbuu eewaluu dha moo ajjeesuu dha ajaja?” jedhee ti isaan gaafate. Isaan ammoo caluma jedhan.
[5] As irratti Yesuus aaree, warra naannawaa isaa jiran laalee, mata-jabina isaanii tiifiis gaddee namtichaan, “Harka kee diriirsi!” jedheen. Hogguu namtichi harka isaa diriirse, harki isaa kunoo deebi'ee ti fayye.
[6] Hogguusuma warri Fariisotaa gadi bahanii, warra murna Herodis tahan wajjiin mataa waliin bahanii ti, akkaataa Yesuus itti ajjeesan irratti marihatan.
[7] Yesuus barattoota isaa wajjiin jara biraa bahee ti, gara garba bishaanii dhaqe. Kutaa Galiilaa tii fi Yihudaa irraa namoonni dilli hanga hin qabne isa duukaa dha deeman.
[8] Waan inni hojjate hundumaa warri dhagayan, magaalaa Yerusaaleem irraa, Edoomiyaa tii fi, Yordaanos gamaa irraa, ammaas naannoo mandaroota Xiiroosii fi Sidoon irraa dilli namaa gara isaa ti dhufan.
[9] Inni niis, dilli namaa sun, dhiibbaa dhaan akka isa hin hacuucne godhuuf, barattoonni isaa doonii takka akka qopheeysaniif itti hime.
[10] Inni dhukkubsattoota hedduu waan fayyiseef jecha, warri uzrii adda addaa qaban hundinuu isuma harkaan qabachuuf jecha, isa irratti wal darbaa ti turan.
[11] Ruuhaanonni hamoon hogguma isa arkan, fuula isaa duratti kufanii, “Ati Ilma Rabbii ti” jechaa ni iyyu turan.
[12] Inni ammoo akka isaan isa hin mullifneef, jabeeysee ti isaan dinniine.
[13] Yesuus gaara gubbatti ol bahee ti, warra ifii barbaade san ifitti yaame; isaaniis gama isaa ti dhufan.
[14] Isa wajjiin tahanii, Wangeela lallabuufiis akka inni isaan erguuf jecha, nama kudha lama barattoota godhee ti file; (isaan kana warri inni “Ergamoota” jedhee yaamees).
[15] Ruuhaanota hamoo baasuuf, amrii akka isaan qabaatan godhe.
[16] Warri kudha lamaan inni barattoota isaa godhate sun, Simoon kan inni “Phexiroos” jedhee moggaase,
[17] Yaaqoobii fi Yohannis ilmaan Zabdewos warra inni “Bo'anerges” jedhee moggaase; kuniis “Ilmaan mandiisuu” jechuu dha.
[18] Indiriiyaas, Filiphoos, Bartolomewos, Maatewos, Toomaas, Yaaqoob ilma Alfewos, Taadewos, Simoon “Hinaafticha” jedhamee kan beekame;
[19] akkasuma ammaas Yihudaa Keriyot, kan Yesuus dabarsee kanne.
[20] Yesuus mana hogguu gahe, isaa fi barattoonni isaa tiis, biddeena illee nyaachuu hanga dadhabanitti ammaas dilli namaa walitti dacha'an.
[21] Firoonni isaa ammoo, namoonni kaan, “Isa qalbii tu waa tahe” jechuu isaanii dhagayanii ti, isa qabuuf dhufan.
[22] Barsiisonni seeraa warri Yerusaaleem irraa dhufaniis, “Bi'el Zebuul tu isa keeysa jira; humna alaqaa ruuhaanota hamoo tiin ruuhaanota hamoos baasa” jedhanii ti Yesuus irratti odeeysan.
[23] As irratti inni ifitti isaan yaamee ti fakkeenyaan, “Akkamitti Sheeyxaanni, Sheeyxaana baasuu dandaya?
[24] Mootummaan takka ifii yoo gargar caphxe, mootummaan sun dandeeysee hin dhaabbattu;
[25] haaskaan mana tokkoo tiis yoo gargar if hire, manni sun dhaabbachuu hin dandayu.
[26] Sheeyxaanni niis if irratti ka'ee yoo gargar if hire, dhuma isaa tu gahee, dhaabbachuu hin dandayu.
[27] Duraan dursee namticha jabaa san yoo hidhe malee, nam tokko illeen mana nama jabaa tokkoo caphsee, seenee meeshaa isaa saamuu hin dandayu; eega isa hidhe booddee ammoo, dhuguma mana isaa saamuu ni dandaya.
[28] Ani dhugumaan isinitti hima, diliin hundinii fi jecha arrabaa kan afaan namaa keeysaa bahuuf, ilmaan namaa tiif oomfiin ni godhamti.
[29] Ammoo, nama Ruuhal Qudusiin mormee isa arrabseef ammoo, dilii bara baraa ti itti taha malee, gonkumaa oomfii hin arkatu” isaaniin jedhe.
[30] Tana illee namoonni, “Inninuu ruuhaa hamaa dha if keeysaa qaba” jechaa waan turaniif dubbate.
[31] Kana booddees, haati Yesuusii fi obboleeyyan isaa dhufanii ti ala dhadhaabbatanii, isa yaamsisuuf nama itti ergan.
[32] Wayta san dilli namaa isatti marsanii ni tattaa'u turan. Isaan, “Kunoo, haati tee tii fi obboleeyyan kee tiis alaa si gaafachaa jiru” isaan jedhan.
[33] Inni ammoo deebisee, “Haati tiyyaa fi, obboleeyyan kiyyaas eenyu?” isaaniin jedhe.
[34] Gara warra isatti marsanii tattaa'anii laalee ti, “Haati tiyyaa fi obboleeyyan kiyyaas warra kanneeni.
[35] Namni fedhii Rabbii godhu eenyu illeen obboleeysa kiyya, obboleeytii tiyya, haadha tiyyaas” jedheeni.