[1] Akkuma Yesuus Beeytal Maqdas keeysaa baheen, barattoota isaa keeysaa tokko, “Yaa barsiisaa, dhagaa gurguddaa kanneen, ijaarsa darbii babbareedaa kanaas mee daawwadhu!” isaan jedhe.
[2] Yesuus deebisee, “Darbii gurguddoo kanneen agartaa? Odoo diigamee hin jigin, bakka tanatti dhagaan tokko illeen, dhagaa biraa irratti kan hafu, hin jiraatu” jedheeni.
[3] Yesuus Gaara Ejersaa gubbaa, fuullee Beeytal Maqdasiin odoo taa'uu ti, Phexiroos, Yaaqoob, Yohannisii fi Indiriiyaas kophaatti isa gaafatan,
[4] “Kun yoom akka tahu, nutti himi. Wanni kanneen hundinuu, wayta raawwatamuuf dhihaatan, milikkinni isaa maali?” jedhaniini.
[5] Yesuus ammoo, “Nam tokko illeen akka isin hin dogongorsiifne if eegaa!
[6] Warra hedduu dha, ‘Ani Kiristoosi’ jechaa, warri maqaa kiyyaan dhufuuf taa'u, namoota hedduus ni dogongorsiisu.
[7] Duulaa fi oduu duulaa tiis hogguu dhageeysan hin nahinaa, kanneen tahuu tu isaan irra jira; haa tahuu malee, amma illee dhumti hin geenye.
[8] Sabni saba irratti, mootummaaniis mootummaa irratti ni ka'u; sossoohuun lafaa bakka adda addaatti, abaariis ni taha; wanni kanneen ammoo jalqaba cimiimmuu ti.
[9] “Ammoo if eeggadhaa, isaan, yaa'ii garaa garatti dabarsanii isin ni kannu, manneen sagadaa keeysattiis ni garafamtu. Anaaf jettanii fuula bulchaa biyyaa, fuula mootootaa duraas ni dhaabbattu; kuniis ragaa isaanitti ni baha.
[10] Duraan dursee Wangeelli saba hundumaa fuu lallabamuu dha qaba.
[11] Hogguu qabamtanii mana firditti geeyfamtan, maal jenna irratti duraan itti hin cinqaminaa! Waanuma hogguma sanitti isiniif kannamu dubbadhaa malee; bar isinii mitii warri dubbattan, Ruuhal Qudusii tu dubbata malee.
[12] Hogguus, obboleeysi obboleeysa du'aaf dabarsee ni kanna, abbaaniis ilmoo isaa, joolleeniis haawwan isaanii irratti aaqqawanii isaan ni ajjeesisu.
[13] Anaaf jecha nama hundumaa biratti warra jibbamtan ni taatu; namni hanga dhumaatti jabaatee dhaabbatu ammoo naja baha” isaaniin jedhe.
[14] Yesuus itti furee, “Inni jibbisiisaan bakka xaahara najisu sun, bakka isaaf hin malle dhaabbachuu isaa hogguu agartan - namni kana dubbisu haa hubatu! - warri Yihudaa jiran gara gaarotaatti haa baqatanii!
[15] Namni abaada isaa keeysa jiru, deebi'ee waa fudhachuuf mana ol hin seenin.
[16] Lafa qotiisaa kan jiruus huccuu isaa fudhachuuf hin galin.
[17] Ammoo dubartoota ulfaa tii fi warra hoosisaniif guyyoonni sun akkam sodaachisoo dha.
[18] Haa tahu malee, kun, manziila gannaa keeysa akka hin taaneef kadhadhaa!
[19] Guyyoonni sun guyyoota rakkinaa ti tahu; rakkinni akkasii tiis, eega Rabbi lafaa uumee jalqabee hanga ammaatti takkaa hin taane, deebi'ee tiis hin tahu.
[20] Rabbi Gooytaan, guyyoota san odoo gabaabsuu baatee, namni tokko illeen irraa hin hafu ture; amma ammoo warra filatamoo, kanneen inni ifiif fileef jecha, guyyoota san ni gabaabsa.
[21] Hogguus namni, ‘Kunoo, Masiihi as jira! Kunoo, inni achi jira!’ yoo isiniin jedhe hin amaninaa.
[22] Masiihonni sobaa tii fi nabiyyoonni sobaa ka'anii, silaa waan dandayamuuf tahee, warra Rabbiif filataman illee dogongorsiisuuf, milikkitaa fi baasa adda addaa ni agarsiisu.
[23] Isin ammoo akeekkadhaa! Ani kunoo duraan dursee waan hundumaa isinitti himee tiin jira” jedheeni.
[24] Yesuus itti dabalee, “Guyyootuma san keeysatti, rakkina kana booddee, ammoo aduun ni dukkanooyti, jiini niis ifa isaa hin kannu.
[25] Urjoonni, samii irraa ni harca'u, haalli eemara bantii samii ni roorra'a.
[26] Hogguus Ilmi Namaa humna guddaa dhaan ulfinaaniis duumeeysaan odoo dhufuu ni arku.
[27] Inni ammoo maleeykoota isaa samii irraa ergee, warra Rabbiif filataman qilleensa afran irraa, ammaas xarafa lafaa irraa hanga xarafa bantii samitti walitti ni qaba” jedhe.
[28] Yesuus amma ammoo, “Muka habruu fakkeenya godhaa tii irraa baraa! Dameen isii quqquuyxee baala hogguu fiilsiftu, birraan akka dhihaate ni hubattu.
[29] Akkasumatti isiniis, wanni kanneen hundinuu tahuu isaa hogguu agartan, akka inni balbalatti dhihaate beekaa!
[30] Dhugumaan isinitti hima, wanti tun hundinuu hanga raawwatamanitti, dhaloonni kun hin dabru.
[31] Samii fi dachiin dabruuf taa'u; qoowliin tiyya ammoo gonkumaa hin dabartu” jedhe.
[32] Yesuus itti furee, “Guyyaa san yookiin za'aa san ammoo, Abbaa kiyya qofaa tu beeka malee, maleeykoonni samii irraa, Ilmi niis, namni tokko illeen hin beeku.
[33] Akeekkadhaa, dammaqaas! Za'aan sun yoom akka geeysu hin beeytan.
[34] Kun akka nama mana isaa dhiisee, imaltuu fagoo dhaquuf ka'ee ti. Inni hojjatoota isaa tiif itti gaafatama kannee, matumatti hojii adda addaa isaanitti kanne; karra eeyduu dhaan ammoo ‘Hin dagatin dammaqi!’ jedhee ti ajaje.
[35] Eegasuu dammaqaa! Abbaan manaa yoom akka dhufu, galgala dhufaa fi halkan waarii dha dhufaa, iyyansa lukkutti dhufaa fi ganama dhufaa hin beeytan.
[36] Dingatuma dhufee, odoo isin rafaa jirtanii akka isin hin agarre,
[37] waanumaan isiniin jedhu tanaan, nama hundaaniis jedha, dammaqaa!” isaaniin jedhe.