[1] Akkuma lafti bariiteen luboonni warri angafoonni, manguddoonninii fi barsiisonni seeraa guutummaan yaa'ii warra Yihudootaa hundinuu, Yesuus irratti marihatan; kana booddee isa hidhanii geeysanii, Philaaxositti dabarsanii ti kannan.
[2] Philaaxos, “Ati mootii Yihudootaa tii?” jedhee ti isa gaafate; inni ammoo, “Eeyye, akkuma atuu jette” jedhee ti deebiseef.
[3] Luboonni warri angafoonni waan hedduu dhaan isa kasasan.
[4] Philaaxos ammaas, “Kunoo, waan hedduu dhaan si kasasaa ti jiruu, waan jawaabdu hin qabduu ree?” jedhee ti Yesuus gaafate.
[5] Yesuus ammoo eegasii jawaaba tokko illee hin deebifneef; tun ammoo Philaaxos ni ajaa'ibsifte.
[6] Philaaxos Ayyaana Bira Dabru irratti, warra hidhaman keeysaa nama tokko kan isaan, “Nuuf gadi dhiisi” jedhanii gaafatan, gadi ni dhiisa ture.
[7] Warra rabshaa kaasanii nama ajjeesanii hidhaman keeysaa tokko, Barabbaas kan jedhamuu tu ture.
[8] Hogguus namoonni gara mana mootummaatti ol bahanii ti, waan dur gochaafii ture akka isaaniif raawwatuuf Philaaxos kadhachutti ka'an.
[9] Philaaxos ammoo deebisee, “Mootii Yihudootaa akkaan gadi isiniif dhiisu barbaadduu?” isaaniin jedhe.
[10] Philaaxos ifumaa fuu, luboonni warri angafoonni hinaaffaa dhaan dabarsanii akka isa kannan hubatee ti ture.
[11] Luboonni warri angafoonni ammoo, isaa mannaa, Barabbaas gadi nuuf dhiisi, akka jedhaniif namoota itti tuqan.
[12] Ammaas Philaaxos, “Eegasuu namticha mootii Yihudootaa jettanii yaamtan san hoo, maal haa godhu ree?” jedhee ti isaaniif deebise.
[13] Isaaniis, “Isa fannisi!” jedhanii ti iyyan.
[14] Philaaxos ammoo, “Maaliif? Maal balleeyse?” isaaniin jedhe; isaan ammoo, “Isa fannisi!” jedhanii ti daranuu iyyan.
[15] Philaaxos hogguus namoota gammachiisuuf jecha, Barabbaas gadi isaaniif dhiise; Yesuus ammoo garafsiisee, akka fannifamuuf dabarsee ti isa kanne.
[16] Warri loltuu dhaa eegasii, Yesuus gara mana mootummaa sanitti ol galchanii ti, murna loltuu warra hafaniis hundumaa walitti yaaman.
[17] Uffata jaanoo dhaa Yesuusitti uwwisanii, gonfoo qoree irraa hojjatanii ti, mataa isaa irra kaayan.
[18] Ammaas, “Akkami ree, yaa mootii Yihudootaa!” jedhanii ti hanjamaan itti qoosutti ka'an.
[19] Ulee dhaan mataa isaa ni rukutan, irrattiis ni tufan, jilbiifatanii ti sagadaniif.
[20] Isaan eega itti qoosan booddee, uffata jaanoo san irraa baasanii ti, huccuu isaa deebisanii ti itti uwwisan; kana booddee isa fannisuuf gadi baasan.
[21] Namtichi Qareenaa, kan maqaan isaa Simi'oon jedhamu tokko, abbaa Iskindroosii fi Ruufoos, odoo lafa qotiisa isaa irraa gala deemuu ti isaanitti dhufe; isaan ammoo fannoo Yesuus akka baadhatuuf isa dirqan.
[22] Yesuusiis, Golgootaa bakka jedhamu geeysan; “Golgootaa” jechuun “Bakka lafee mataa” jechuu dha.
[23] Isaan hogguus cunfaa inabaa, tan qumbii dhaan makamte, Yesuusiif kanninaan, inni fudhachuu dha dide.
[24] Hogguus jarri isa ni fannisan; uffata isaa ammoo addaan hirachuuf, matatti waan isaan gahu beekuuf, hixaa dha darbatan.
[25] Za'aan isa itti fannisaniis waaree dura za'aa sagalitti ture.
[26] Yakka inni ittiin kasasame mullisuufiis, “Kun mooticha Yihudootaa ti” kan jedhu mataa isaa gararraatti barreeyfamee ti ture.
[27] Isaa wajjiin ammaas saamtoota lama, tokko mirga isaa tiin, kaaniis bitaa isaa tiin fafannisan.
[28] [Hogguus waan Barreeyfamni Qulqulluun, “Inni warra seera caphsutti lakkaawame” jedhu ni raawwatame].
[29] Warri achiin dabraniis mataa isaanii lulanii ti, “Ajab! Ha mumaa kan Beeytal Maqdas jiysitee guyyaa sadihitti ijaartu!
[30] Mee ifuu najaa baasii! Fannoo irraa hiis gadi bu'i!” jedhanii ni arrabsu turan.
[31] Luboonni warri angafoonninii fi barsiisonni seeraa tiis akkasumatti wal-faraqaa isatti hanjaman, “Inni namoota biraa najaa baasee ti jira, ifii isaa ammoo, najaa baasuu hin dandayu.
[32] Masiihichi mooticha Israa'el tahe kun, akka nuti agarree isatti amannuuf, amma fannoo irraa gadi haa bu'uu!” jedhan; warri isaa wajjiin fannifamaniis ammaas isa ni arrabsu turan.
[33] Guyyaa waaree irraa jalqabee hanga za'aa sadihitti dukkanti hunduma irra wal geeyse.
[34] Za'aa sadih irratti Yesuus sagalee guddaa dhaan, “Elohii, Elohii lamaa sabaktanii?” jedhee ti yaammate; kuniis, “Rabbii koo, Rabbii koo, maaliif na dhiifte?” jechuu dha.
[35] Warra achi dhaabbatan keeysaa hangi tokko tana dhageenyaan, “Dhagayaa kunoo, Eliyaas yaammataa” jedhan.
[36] Hogguus isaan keeysaa namtichi tokko fiigee ti, cunfaa inabaa tan kal qabu, waan bishaan xuuxxu takkatti guutee, uletti kaayee, akka inni dhuguuf itti kannee ti, “Eliyaas fannoo irraa gadi isa buusuuf yoo dhufe, mee ni ilaallaa, itti dhiisaa!” jedhe.
[37] Yesuus sagalee guddoo dhaan iyyee ti, lubbuun Isa keeysaa baate.
[38] Waytuma san, golgaan Beeytal Maqdas, olii hanga gaditti, bakka lamatti addaan baqaqe.
[39] Ammaas abbaan dhibbaalaa, kan achi fuula Yesuus dura dhaabbatu tokko, hogguu iyyansa isaa dhagayee, akka lubbuun isaa isa keeysaa itti baate hubate, “Namtichi kun dhuguma Ilma Rabbii ti ture” jedhe.
[40] Dubartoonni hangi tokko, halaalaa ni daawwatu turan; isaaniis, Maariyaam Magdalaa, Maariyaam haadha Yaaqoob quxisichaa tii fi tan Yosees, ammaas Salomeeniis turan.
[41] Isaan kun warra Galiilaa irraa isa duukaa bu'anii, isa tajaajilaa turanii dha; ammaas dubartoonni biraa hedduun, kanneen isaa wajjiin Yerusaaleemitti ol bahaniis, achi turan.
[42] Borumtii Sanbata waan tureef, namoonni guyyaa saniif qophaawu irra turan; galgalti dhihaannaan,
[43] yaa'ii warra Yihudootaa keeysatti, miseensa kabajamaa, Yoseef kan jedhamu nama magaalaa Armaatiyaa tokkoo tu ture. Namtichi kun, kan ifumaa fuu dhufa Mootummaa Rabbii abdachaa turee dha, inni ija-jabinaan Philaaxos bira dhaqee ti, reefka Yesuus kadhate.
[44] Philaaxos ammoo, duruun du'uu isaa dhageenyaan, ajaa'ibee ti; hogguusuma abbaa dhibbaaleeysaa yaamee ti, akka inni duruun du'e isaa gaafate.
[45] Akkasuma tahuu abbaa dhibbaaleeysaa irraa eega mirkaneeyfate booddee, reefka isaa Yoseefiif kannisiise.
[46] Hogguus Yoseef huccuu quncee qoonxar irraa dhawamte bitee, reefka isaa fannoo irraa gadi buusee, huccuu saniin kafane. Holqa garaa dhagaa keeysatti tolfame tokko keeysa eega kaaye booddee, balbala qabrichaatti ammoo dhagaa dha gangalche.
[47] Maariyaam Magdalaa tii fi Maariyaam haati Yosees, bakka reefki isaa kaayame arkan.