[1] Kana booddee Yesuus, “Dhugumaan isinitti hima, namoota as dhaabbachaa jiran kanneen keeysaa, odoo du'a hin dhamdhamin dura, warri Mootummaan Rabbii, humnaan dhuftee, arkuuf taa'an ni jiru” jedhe.
[2] Guyyaa jaha booddees, Yesuus Phexiroosii fi Yaaqoob Yohannisiis fudhatee ti, ol gaara dheeraa tokko irratti kophaatti isaan baase; achitti bifti isaa isaan duratti ni jijjiiramte.
[3] Uffanni isaa tiis miiccituun lafa irraa akkasitti addeeysuu akka hin dandeenyetti addaatee ti walqise.
[4] Eliyaasii fi Museeniis achitti isaanitti mullatanii ti, Yesuusii wajjiin haasawaa ti turan.
[5] Phexiroos hogguus, “Yaa barsiisaa! Bakka tana jiraachuun nuuf gaarii dha! Koottaa, asitti gojoo sadih, takka siif, takka Museef, takkaas Eliyaasiif haa ijaarruu!” jedhee ti Yesuusitti hime.
[6] Barattoonni sun hedduu waan rifataniif jecha, Phexiroos waanuma dubbatu illee hin beeku ture.
[7] Hogguus duumeeysi dhufee ti hunduma isaanitti uwwise; sagaleen takkaas duumeeysa keeysaa, “Kun Ilma kiyya kaniin ani jaaladhu, isa dhagayaa!” jettee ti dubbatte.
[8] Barattoonni hogguusuma naannoo isaanii millannaan, Yesuus qofa malee, nama biraa tokko illee if biratti hin agarre.
[9] Isaan gaara gubba irraa odoo gadi bu'utti jiranii ti Yesuus, “Hanga Ilmi Namaa du'a keeysaa ka'utti waan agartan tana nama tokkotti illee hin himinaa!” jedhee ti barattoota isaa ajaje.
[10] Isaaniis jecha isaa haa fudhatan malee, ammoo “Warra du'an keeysaa ka'uu jechuun maal jechuu dha?” jedhanii ti wal gaggaafatan.
[11] Achumaan ammaas, “Barsiisonni seeraa maaliif, ‘Eliyaas duraan dursee dhufuu tu irra jira’ jedhu?” jedhanii ti Yesuus gaafatan.
[12] Yesuus deebisee, “Waan hundumaa bakkatti deebisuuf Eliyaas duraan dursee dhufuun isaa mirkana; haa tahu malee, Ilmi Namaa hedduu dha dararamuuf taa'a, tuffatamuufiis deema, jedhamee ana ilaachisee maaliif barreeyfame ree?
[13] Ani ammoo isinittiin hima, Eliyaas duruun dhufee ti jira; akkuma waa'ee isaa tiif barreeyfamee jiruttiis, isaan waanuma fedhan isa irratti raawwatan” isaaniin jedhe.
[14] Isaan kun, gara barattoota warra kaanii hogguu deebi'anii dhufan, namoonni hedduun isaaniin marsanii, jarri barsiisonni seeraa tokkoos isaaniin odoo falmanii ti arkan.
[15] Ummanni hundinuu akkuma Yesuus arkaniin mirqaananii, gara isaa fiiganii ti, nagaya isa gaafatan.
[16] Inni ammoo, “Maal irratti isaaniin falamaa jirtu?” jedhee ti isaan gaafate.
[17] Hogguus ummata san keeysaa namtichi tokko deebisee, “Yaa barsiisaa! Ilma kiyya, kan ruuhaa didaa dhaan qabameen kunoo, gara kee fidee jira.
[18] Ruuhaan bakkuma isa qabutti lafaan isa dhawa; hoomachaas afaaniin isa yaasa, ilkaaniis waliin qara, qaamni isaa tiis irratti goggoga. Ani illeen barattoonni kee akka ruuhaanicha irraa baasan gaafadhee tiin ture; ammoo isaan hin dandeenye” jedheeni.
[19] Yesuus deebisee, “Isin yaa dhaloota amantii hin qabne, hanga yoomittiin isin bira jiraadha? Hanga yoomittiis ba'aa anatti taataniitiin isiniif obsa? Gara kiyya fidaa!” isaaniin jedhe.
[20] Hogguus isaan gurbicha gara Yesuus fidan. Ruuhaanichi hogguma Yesuus arke, gurbicha wixxifachiisee, lafaan dhawee, gangalachiisee ti, hoomacha afaaniin baase.
[21] Yesuus, “Kun yoom isa qabe?” jedhee ti abbaa gurbaa dhaa gaafate. Inni ammoo deebisee, “Daa'imummaa isaa ti irraa jalqabe.
[22] Wayta hedduus isa ajjeesuuf ibidda keeysatti, bishaan keeysattiis darbee ti jira; ammoo waanuma takka godhuu yoo dandeeyse, mee nuuf nahii tii nu gargaari!” jedheeni.
[23] Hogguus Yesuus, “Yoo dandeeyse jettee? Nama amanuuf waan hundumaa tu dandayama” jedheeni.
[24] Hogguusuma abbaan mucichaa sagalee isaa ol fudhatee, “Ani niin amana, amanti-dhablummaa kiyya ati na gargaari!” jedheeni.
[25] Yesuus, namoonni hedduun orihaa akka walitti qabamaa dhufan arkee ti, ruuhaa hamaa saniin, “Ati yaa ruuhaa dhegelaa, didaa, isa keeysaa bahi! Deebitee tiis itti hin seenin!” jedhee ti isaan lole.
[26] Ruuhaaniis, mucicha iyyisiisee, hedduu eega wixxifachiise booddee, keeysaa bahe; hogguus gurbichi akkuma waan du'ee fakkaannaan, namoonni hedduun “Du'e” jedhan.
[27] Yesuus ammoo gurbicha harka qabee lafaa ol isa kaafnaan, inni niis ka'ee ti dhaabbate.
[28] Yesuus eega mana seene booddee, barattoonni isaa kophatti, “Nuti maaliif ruuhaa hamaa san baasuu dadhabne?” jedhanii ti isa gaafatan.
[29] Inni ammoo deebisee, “Kan akkasii kun kadhata qofaan malee, waan biraa tiin baasuu hin dandayamu” isaaniin jedhe.
[30] Eegas booda isaan achii ka'anii ti, kutaa Galiilaa keeysa dabran; Yesuus ammoo namni tokko illeen bakka isaan jiran, beekuu hin barbaanne.
[31] Inni, “Ilmi Namaa harka namootaatti dabarfamee ti kannama, isaaniis isa ni ajjeesu; Inni ammoo ajjeefamee guyyaa sadih booddee Ni ka'a” jechaa, barattoota Isaa barsiisaa ti ture.
[32] Barattoonni ammoo, jecha Isaa kana hin hubanne, Isa gaafachuus ni sodaatan.
[33] Kana booddee isaan Qifirnaahom dhufan. Eega mana seene booda Yesuus, “Karaa irratti maal irratti walitti dudubbachaa turtan?” jedhee ti isaan gaafate.
[34] Isaan ammoo, eenyuu tu hunda irra caala jechaa, karaa irratti walitti dudubbachaa waan turaniif jecha, caluma jedhan.
[35] Yesuus eega taa'e booda, kudha lamaan ifitti yaamee ti, “Namni kan duraa tahuu barbaadu hundumaa booddee tahuu tu isa irra jira, nama hundumaafiis kaadamaa tahuu tu isa irra jira” isaaniin jedhe.
[36] Hogguus inni, mucaa xiqqaa tokko fuudhee ti isaan jidduu dhaabbachiisee, ifitti qabee barattoota isaa tiin,
[37] “Joollee xixiqqoo akkanaa keeysaa tokko maqaa kiyyaan kan simu ana sima, kan na simuus ammaas isa na erge sima malee, ana simuu isaa tii miti” jedhe.
[38] Yohannis hogguus Yesuusiin, “Yaa barsiisaa, namtichi tokko odoo maqaa kee tiin ruuhaa hamaa baasuu agarree, inni nu keeysaa tokko waan hin tahiniif, isa ni dhoorkine” jedheeni.
[39] Yesuus ammoo, “Isa hin dhoorkinaa, namni tokko illeen maqaa kiyyaan hujii quduraa godhee, hogguusuma ammaas ana irratti, hamaa dubbachuu kan dandayu hin jiruu bar.
[40] Namni nuun hin mormine gara keenyatti lakkaawama.
[41] Ani dhugumaan isinitti hima, isin warra Kiristoos waan taataniif jecha, nam tokko illeen maqaa kiyyaan kan bishaan dheengee takka isinitti kanne, ujuraa isaa hin dhabu” jedhe.
[42] Yesuus itti furee, “Eenyu illeen, warra xixiqqaa anatti amanan kanneen keeysaa tokko gufachiisuu irra, dhagaan daakuu guddaan, morma isaatti hidhamee bahar keeysatti odoo darbamee isaaf irra wayyaafi ture.
[43] Harki kee yoo si gufachiise, if irraa muri; harka lachuu qabaattee, gara jahannam ibidda hin dhaamnee seenuu kee mannaa, harka tokko dooluu taatee jireenyatti galuu tu siif irra wayya.
[44] [Jahannam san keeysa, raammoon nama nyaattu hin duutu, ibiddi isaa tiis hin dhaamu.]
[45] Miilli kee yoo si gufachiise, if irraa muri; miila lachuu qabaattee jahannamitti darbatamuu kee tii mannaa, miila tokko qabaattee jireenyatti galuu tu siif irra wayya.
[46] [Jahannam san keeysa, raammoon nama nyaattu hin duutu, ibiddi isaa tiis hin dhaamu.]
[47] Ijji tee yoo si gufachiifte if keeysaa baasi; ija lachuu qabaattee jahannamitti darbatamuu kee tii mannaa, ija takka qabaattee, Mootummaa Rabbitti galuu tu siif irra wayya.
[48] Jahannam san keeysa, raammoon nama nyaattu hin duutu, ibiddi isaa tiis hin dhaamu.
[49] “[Akkuma kannaan aarsaa dhaa soogiddaan xaaharamutti], waanni hundinuu ibiddaan xaaharamu.
[50] Soogiddi waan gaarii dha, soogiddi ammoo lazzaa isaa yoo dhabe, maaliin deebiftanii soogiddeeysitu? Soogidda if keeysaa qabaadhaa, isin waliin nagaya tahaa!” jedheeni.