[1] Guyyaa muraasa booddee Yesuus ammaas Qifirnaahomitti hogguu deebi'e, namoonni niis akka inni manatti galee jiru dhagayan.
[2] Namoonni hedduun walitti qabamnaan, balbaluma dura illee hanga bakka dhabanitti, lafti nama ni hanqatte. Yesuus ammoo Qoowlii Wangeelaa isaanitti ni lallaba ture.
[3] Hogguus jarri afran tokko, nama qaamni isaa laamshawe, baadhatanii ti, gara Yesuus fidan.
[4] Hoddomina namaa irraa kan ka'e Yesuusitti dhiheeysuu dadhabnaan, wixina manaa addeela Yesuus tureen diiganii eega buqqaasan booda, siree namtichi laamshawe irra ciisee jiru san gadi buusan.
[5] Yesuus amantii jarreen kanaa hogguu arke, namticha laamshawaa dhaan, “Yaa ilma liyya, diliin tee hundinuu oomfii siif godhamtee ti jirti” jedheeni.
[6] Barsiisonni seeraa warri achi taa'aa turan tokko, qalbii isaanii keeysatti gaaffii kaasaa ti turan,
[7] “Maaliif namtichi kun akkanatti dubbata? Tun Rabbi arrabsuu dha! Mee Rabbii tokkicha malee, eenyuu tu dilii namaaf oomfii godhuu dandaya?” jedhan.
[8] Yesuus hogguusuma, qalbii isaanii keeysatti maal if gaafachaa akka jiran ruuhaan hubatee, “Maaliif waan akkanaa qalbii teeysan keeysatti yaaddu?
[9] Kamtu sablata? Namticha laamshawe kanaan, ‘Diliin tee oomfii siif godhamtee ti jirti’ jechuu dha moo yookiin, ‘Ka'ii tii siree tee fudhadhuu deemi’ jechuu dha?
[10] Ammoo Ilmi Namaa, lafa irratti dilii oomfii godhuuf amrii akka qabu beekaa!” isaaniin jedhe. Namticha laamshawaa dhaan ammoo,
[11] “Ol ka'ii tii, siree tee fudhadhuu, mana keetitti galiin! siin jedha” jedheeni.
[12] Oduma hundi isaanii laalaa jiranii ti, namtichi sun hogguusuma ka'ee, siree isaa tiis fudhatee ti gadi bahe. As irratti hundi isaanii tuu ajaa'ibanii, “Waan akkanaa takkaa agarree tuu hin beeynu” jedhanii ti, Rabbiif hamdii galchan.
[13] Yesuus ammaas gadi bahee ti, gara qarqara garba bishaanii dhaqe; ummanni hundinuu gara isaa dhufnaan, inni niis isaan barsiise.
[14] Inni odoo dabraa jiruu, Leewii ilma Alfewos waajira qaraxaa keeysa odoo taa'uu arkee ti, “Na duukaa bu'i!” jedheeni. Hogguusuma Leewiin ka'ee, isa duukaa bu'e.
[15] Warri Yesuus duukaa bu'an namoota heddu turan. Yesuus mana Leewitti gabatee dhihana itti nyaatan bira hogguu taa'e, qaraxxoonninii fi warri tuffatamoon isa duukaa turan heddomaatanii, Yesuusii fi barattoota isaa tiin wajjiin tattaa'an.
[16] Fariisota keeysaa barsiisota seeraa kanneen turan, Yesuus warra tuffatamoo fi warra qaraxxuu wajjiin isaa nyaatu hogguu arkan, “Inni akkamitti warra qaraxxuu dhaa fi warra tuffatamoo wajjiin nyaata?” jedhanii ti barattoota isaa gaafatan.
[17] Yesuus tana hogguu dhagaye, “Warri fayyaa qaban ogeeysa fayyaa hin barbaadan, dhukkubsataa tu barbaada malee; ani warra jireenya qaceeloo jiraatan yaamuuf hin dhufne, warra dilaawoota yaamuufiin dhufe malee” isaaniin jedhe.
[18] Barattoonni Yohannisii fi barattoonni Fariisotaa ni soomanu turan; jarreen tokko ammoo dhufanii Yesuusiin, “Barattoonni Yohannisii fi barattoonni Fariisotaa maaliif soomanu? Barattoonni kee ammoo maaliif hin soomanne?” jedhaniin.
[19] Yesuus deebisee, “Aruuztichi odoo isaan wajjiin jiruu, warri milliseen soomanuu ni dandayuu ree? Hanga aruuzticha if biraa qabanitti, soomanuu hin dandayan.
[20] Waytiin aruuztichi isaan biraa itti fuudhamu dhufuuf jirti; eegasuu isaan waytii san ni soomanu.
[21] Namni tokko illeen, erbee haaraya takkaa hin miicamin, uffata moofaa irratti hin hodhu; akkana yoo godhe ammoo, erbeen haarayni uffata moofaa san ni dhoofti, dhoohaan isaa tiis kan duraa irra kan caalu taha.
[22] Akkasuma ammaas daadhii inabaa haaraya qandii moofaatti hin naqan; akkana yoo godhan ammoo, daadhiin qandicha ni dhoofti, daadhii fi qandiiniis ni badu. Kanaaf jecha, daadhii inabaa haaraya qandii haarayatti naqu” isaaniin jedhe.
[23] Guyyaa Sanbataa tokko ammaas, Yesuus ooyruu qamadii takka keeysa dabraa ti ture; barattoonni isaa tiis odoo deemanii, ashiita cirachuu jalqaban.
[24] Fariisonni hogguus, “Ilaali mee! Barattoonni kee guyyaa Sanbataa waan godhuun seeraan dhoorkame maaliif godhu?” jedhanii ti isa gaafatan.
[25] Yesuus deebisee, “Daawwid namoota isaa wajjiin waan nyaatu dhabee wayta beelawe, waan inni godhe isin takkaa hin dubbifnee ree?
[26] Inninuu, bara Abiyaatar angafa lubootaa ture san, mana Rabbii akkamitti seenee, biddeena ilaalchaa Rabbii tiif dhihaate, kan luboota malee warri biraa nyaachuun seeraan dhoorkamaa ture san, ifiif nyaatee, ammaas namoota warra isaan wajjiin turaniifiis kanne” isaaniin jedhe.
[27] Yesuus ammaas itti dabalee, “Sanbataa tu namaaf uumame malee, namni Sanbataaf hin uumamne.
[28] Eegasuu, Ilmi Namaa Gooftaa Sanbataa ti” isaaniin jedhe.