[1] Ayyaanni Bira Dabruu tii fi Ayyaanni Qiinxaa Maattiraat guyyaa lamatti galee ti ture. Luboonni warri angafoonninii fi barsiisonni seeraa, heelaa ittiin Yesuus qabanii ajjeesan ni barbaadu turan.
[2] Isaan ammaas, “Ummanni rabshaan akka hin kaaneef, wayta ayyaanaa irratti tana godhuun hin tahu” jechaa ti turan.
[3] Yesuus ammaas, Bitaaniyaa mana Simoon, dhukkuba coraa tiin gaddaafamee keeysa, maadditti dhihaatee odoo jiruu, dubartiin takka axira aslii tan hedduu qaalii, naardoos irraa tan tolfatamte, bilqaaxatti qabattee ti dhufte; isiin bilqaaxa san caphsitee ti, axira san mataa Yesuus irratti dhangalaafte.
[4] Warra achi turan keeysaa hangi tokko if keeysatti dallanuu dhaan, “Axirri kun maaliif istiraafame?
[5] Axirri kun qarshii dhibba sadih caalaatti gurguramee, warra hiyyeeysootaaf kannuu ni dandayama ture” waliin jedhan; isii dhaaniis hedduu dha lolan.
[6] Yesuus ammoo, “Irraa usaa! Maaliif isii cinqitan? Isiin waan gaarii dha anaaf goote.
[7] Warra hiyyeeysoota wayta hundumaa if biratti arkattu, hogguu feetaniis isaan gargaaruu ni dandeeysan; ana taanaan ammoo, wayta hundumaa if biratti na hin arkattan.
[8] Isiin waan godhuu dandeeysu gootee ti jirti; jasada kiyyaas duraan dursitee awwaalchaaf axira dibdee ti jirti.
[9] Ani dhugumaan isiniin jedha, guutuma addunyaa, bakkuma Wangeelli itti lallabametti, wanti isiin goote tun yaaddannoo isii tiif jecha ni dubbatama” jedhe.
[10] Hogguus Yihudaan Keriyot, kan barattoota kudha lamaan keeysaa tokko ture sun, Yesuus dabarsee isaanitti kannuuf gara luboota warra angafootaa ti dhaqe.
[11] Isaan tana dhagayuuf gammadanii, horii isaaf kannuuf wa'ada galan; akkasitti Yihudaan dabarsee isa kannuuf carraa qunnamtii gaarii barbaadaa ti ture.
[12] Jalqaba guyyaa Ayyaana Qiinxaa Maattiraat irratti, hoolaa Bira Dabruu qaluun aadaa waan tureef jecha, barattoonni isaa, “Hoolaa Bira Dabruu akka nyaattuuf eeysa dheeynee akka siif qopheeysinu barbaadda?” jedhanii ti Yesuus gaafatan.
[13] Hogguus inni barattoota isaa keeysaa nama lama ergee, “Mandaricha seenaa tii! Namticha okkotee bishaanii baadhate tokkoo tu isin qunnamaa, isa duukaa deemaa!
[14] Manuma namtichi seenu sanitti, abbaa manaa tiin, ‘Manni keeysummaa kiyya, kaniin ani barattoota kiyyaan wajjiin, keeysatti Hiraata Bira Dabruu itti nyaadhu eeysa? siin jedha barsiisaan’ jedhaan!
[15] Namtichi hogguus mana guddaa tokko qallaa gubbatti, kan meeshaa manaa tiin guutamee afame isin agarsiisa. Achitti nuuf qopheeysaa!” jedheeni.
[16] Barattoonni sun karaa bu'anii magaalaa seennaan, akkuma inni isaanitti hime san tahee ti arkanii ti, achitti Hiraata Bira Dabruu qopheeysan.
[17] Hogguu galgalaawe Yesuus barattoota isaa kudha lamaan wajjiin dhufe.
[18] Maadditti taa'anii nyaachaa odoo jiranii ti Yesuus, “Dhugumaan isiniin jedha, isin keeysaa, tokko kan anaa wajjiin nyaachutti jiru, dabarsee ti na kannuuf taa'a” jedhe.
[19] Isaan hogguus nahanii, tokko tokkoon wal duukaa, “Wahi anaa ree? Anaa miti gaa!” isaan jedhan.
[20] Inni ammoo, “Kudha lamaan keeysaa tokko, isa kan anaa wajjiin biddeena qorii keeysatti tuqatuu dha.
[21] Ilmi Namaa illeen, akkuma isa laalchisuu dhaan barreeyfameefitti du'aaf deema; ammoo namticha Ilmi Namaa harka isaa tiin dabarfamee kannamuun saniif magan! Namtichi sun odoo dhalachuu baate irra wayyaaf ture” isaaniin jedhe.
[22] Nyaata irra odoo jiranii, Yesuus biddeena fuudhee ti, eeybisee, kukkutee tiis, barattoota isaa tiif laatee, “Fudhadhaa, kun jasada kiyya!” jedhe.
[23] Kana booddee ammaas, geebichaas fuudhee ti, galata galchee, isaaniif kanne; isaan hundi niis geebicha keeysaa ni dhugan.
[24] Inni ammaas, “Kun dhiiga irbuu kiyya, kan namoota hedduuf dhangala'ee dha.
[25] Dhugumaan isinitti hima, hanga guyyaa gaafaan ani Mootummaa Rabbii keeysatti haaraya dhugutti, deebi'ee firii inabaa irraa, gonkumaa hin dhugu” jedheen.
[26] Faarfannaa galataa eega faarfatan booddee, gara Gaara Ejersaatti ol bahan.
[27] Hogguus Yesuus, “Isin hundinuu ana irraa dheeysuuf deemtu. ‘Ani tiiysituu niin dhawa, hoolonni niis ni bittimfamu’ jedhamee barreeyfamee ti jira.
[28] Ergaan du'aa kaafame booddee ammoo, isin dura gara Galiilaa niin deema” isaaniin jedhe.
[29] Phexiroos hogguus, “Isaan hundinuu si irraa yoo dheeysan illee, ani si dhiisee hin dheeysu!” isaan jedhe.
[30] Yesuus ammoo, “Dhugumaan siin jedha, edanuma lukkuun odoo hoggu lama hin iyyin, ati hoggu sadih na ganta” isaan jedhe.
[31] Inni ammoo afaan jabaatee ti, “Sii wajjiin du'uun illeen yoo na barbaachifte, gonkumaa si hin ganu” jedhe; warri kaan hundi niis akkasuma jedhan.
[32] Getesemaanee bakka jedhamu tokkoo dhaqan; Yesuus barattoota isaa tiin, “Hangaan ani kadhannaa godhu asuma tattaa'aa!” jedheeni.
[33] Phexiroos, Yaaqoobii fi Yohannis ifiin wajjiin fuudhe; akka jabaa hiraaree sodaachuu dha jalqabe.
[34] Isaaniin ammoo, “Lubbuun tiyya hanga du'aatti heddu cinqamte; isin mee as turaa tii, dammaqoos tahaa!” jedheeni.
[35] Waa xiqqoos isaan irraa achi hiiqee ti, adda isaa tiin lafa gahee, yoo dandayame, waytiin tun akka isa irra dabartuuf kadhate,
[36] “Yaa Abbaa, waa halle siif ni dandayamaa tii; geeba hiraar kana ana irraa fuudhi! Ammoo fedha koo odoo hin tahin, fedhiin tee haa taatu” jedhe.
[37] Deebinaan rafanii ti isaan arkee, Phexiroosiin, “Yaa Simoon! Ni raftaa? Za'aa takkaaf illee dammayxee taa'uu hin dandeenyee?
[38] Fitinatti akka hin galleef dammaqaa tii, kadhadhaa! Ruuhaan illeen qophee dha, foon namaa ammoo dadhabaa dha” jedhe.
[39] Ammaas achi hiiqee ti, kadhatuma duraa san irra deebi'ee ti kadhate.
[40] Deebi'ee hogguu dhufees odoo isaan rafanii ti arke; ijji isaanii hedduu itti ulfaattee ti turte; maaluma akka isaaf deebisan wallaalan.
[41] Marraa sadeeysaaf dhufe, “Amma illee boqattaniituma rafutti jirtuu? Ni gaha, waytichi gahee ti jira; kunoo, Ilmi Namaa harka dilaawootaatti kannamuu isaa ti.
[42] Ka'aa haa yaanuu! Dabarsee na kannaan koo, kunoo, dhufaa ti jira!” isaaniin jedhe.
[43] Oduma Yesuus tana dubbachaa jiruu, kunoo Yihudaan, warra kudha lamaan keeysaa tokko kan ture, isaanitti as bahe. Isa wajjiiniis luboota warra angafoota, barsiisota seeraa tii fi manguddoota biraa warri ergaman, habalee fi jirma qabatanii ti dhufan.
[44] Inni dabarsee Yesuus kannuuf deemuus duraan dursee milikkitaaf, “Namtichiniin ani dhungadhu isaa! Qabaa tii waardiyyaan eegaa, fuudhaa deemaa!” jaraan jedhee ti ture.
[45] Yihudaan akkuma achi gaheen Yesuusitti dhaqee, “Yaa barsiisaa koo!” jedhee ti isa dhudhungate.
[46] Jarri hogguus qacam godhanii ti Yesuus qaban.
[47] Warra cinaa dhaabbatan keeysaa tokko habalee isaa luqqifatee ti, gabricha angafa lubootaa rukutee, gurra irraa kute.
[48] Yesuus ammoo, “Akka warra shiftaa qabuuf bahanitti, ana qabuuf habalee dhaa fi jirmaan yaatanii?
[49] Guyyuu isinuma jiddutti, Beeytal Maqdas keeysatti barsiisaa tiin ture, isin ammoo hogguus ana hin qabne; amma ammoo wanti Barreeyfamni Qulqulluun jedhan raawwatamuun irra jira” jedheeni.
[50] Hogguus barattoonni hundinuu dhiisanii ti isa irraa dheeysan.
[51] Hogguus dargaggeeysi tokko, huccuu quncee qoonxar takka qofa if irra buusee ti, Yesuus duukaa deeme; jarri niis isa qaban.
[52] Inni ammoo huccuu san harka isaanitti dhiisee qullaa fiigee ti harkaa bahe.
[53] Isaan Yesuus gara angafa lubootaa ti geeysan; luboonni warri angafoonni hundinuu, manguddoonni, barsiisonni seeraa tiis achitti walitti qabamanii ti turan.
[54] Phexiroos hanga abaada mana angafa lubootaa gahutti, irraa fagaatee ti Yesuus duukaa deeme, achiis waardiyyoota wajjiin taa'ee ti ibidda oowwifata ture.
[55] Luboonni warri angafoonni, guutummaan yaa'ii warra Yihudootaa tiis Yesuus ajjeesuuf ragaa qabatamaa tahe isa irratti arkachuuf ni barbaadu turan, ammoo ragaa tokko illee hin arkanne.
[56] Namoonni hedduun, ragaa cubbuu isa irratti bahan illee, ammoo dubbiin isaanii duraa wal dhooyte.
[57] Hangi tokko ka'anii, ragaa cubbuu isa irratti bahuu dhaan,
[58] “‘Beeytal Maqdas harkaa namaa tiin hojjatame kana jiysee, guyyaa sadihitti kan biraa kan harka namaa tiin hin hojjatamin niin ijaara’ jechuu isaa dhageenyee ti jirra” jedhan.
[59] Haa tahu malee, hogguus illee wanti isaan dubbatan duraa wal dhabe.
[60] Hogguus angafni lubootaa hunduma isaanii dura dhaabbatee ti, “Waan jarri kun si irratti ragaa bahan kanaaf jawaaba tokko illee hin qabduu?” jedhee ti Yesuus gaafate.
[61] Inni ammoo caluma jedhe malee, jawaaba tokko illee hin laanneef. Angafni lubootaa ammaas, “Ati Masiihicha, Ilma Rabbii galateeyfamaa tii?” jedhee ti isa gaafate.
[62] Yesuus ammoo, “Eeyye ani isuma; Ilma Namaa tiis, kan harka mirgaa humna-qabeeysaa tiin taa'ee, duumeeysa samii keeysaa tiin odoo dhufuu arkuuf jiraattu” jedheeni.
[63] Hogguus angafni lubootaa sun aaree uffata isaa tarsaasee ti, “Amma ammoo ragaa maali nu barbaachisa?
[64] Rabbi arrabsuu isaa isinuu kunoo dhageeysanii ti jirtuu! Maal isinitti fakkaata?” jedhe. As irratti isaan hundinuu ajjeefamuun akka isa irra jiru itti murteeysan.
[65] Namoonni hangi tokko isatti tufan, ija isaa tiis hidhanii ti, isa dummucanii, “Eenyuu tu si dummuce? Nabiyyummaa tee tiin nutti himi!” isaan jechu turan; warri waardiyyoonni niis isaan harkaa fudhatanii ti isa kakkabalan.
[66] Phexiroos amma illee abaaduma keeysa odoo jiruu, wandaqoottan angafa lubootaa keeysaa takka dhuftee,
[67] Phexiroos ibidda oowwifachutti jiru agartee, qalbiin isa laaltee ti, “Atiis nama Yesuus Naazireet saniin wajjiin turee mitii?” jetteeni.
[68] Inni ammoo, “Ani hin beeku, wannummaan ati jettuu huu, anaaf hin galu!” jedhee ti inkaaree; ka'ee ti, gara karra moorichaatti gadi bahe; [hogguus lukkuun iyyite].
[69] Wandaqtittiin isa achitti agartee ti, ammaas warra achi dhadhaabbataniin, “Namtichi kuniis isaan keeysaa tokko” jette.
[70] Inni ammoo ammaas ni inkaare. Waa xiqqo booddee ammaas warri achi dhadhaabbatan Phexiroosiin, “Atiis nama Galiilaa waan taateef, dhuguma isaan keeysaa tokko tahuun tee mirkana” isaan jedhan.
[71] Inni ammoo, “Namtichuma isin jettan kanaa huu, ani hin beeku” jedhee ti if abaaruu fi kakachutti jalqabe.
[72] Hogguusuma lukkuun lamada iyyite; Phexiroos hogguus Yesuus, “Lukkuun hoggu lama odoo hin iyyin, ati hoggu sadih na kaadda” waan isaan jedhee ture san yaadatee, booyichaan lafatti if darbe.