[1] Yesuus achii ka'ee ti gara kutaa Yihudaa tii fi ammaas Yordaanos gamaa ti deeme. Namoonni ammaas isa biratti walitti qabamuu jalqaban; akkuma aadaa isaatti ammaas isaan barsiisuu jalqabe.
[2] Hogguus namni muraasni Fariisotaa dhufanii ti isa fitinuuf jecha, “Namni tokko niitii isaa hiikuun seeraa?” jedhanii ti gaafatan.
[3] Inni ammoo deebisee, “Museen maal isin ajaje?” isaaniin jedhe.
[4] Hogguus isaan, “Museen, xalayaa hiikkaa barreeysee akka isii arihu ni hayyama” jedhaniin.
[5] Yesuus ammoo, “Sababa gara-jabina keeysaniif jecha, inni ajaja kana isiniif barreeyse.
[6] Jalqaba uumamaatti ammoo, ‘Rabbi dhiiraa fi dhalaa dha uume;’
[7] ‘Kanaaf jecha, dhiirti abbaa isaa tii fi haadha isaa tiis ni dhiifti [niitii isaatittiis ni maxxanti]
[8] isaan lamaanuu foon tokko tahu.’ Kanaaf asii achi isaan lamaa miti, foon tokko malee.
[9] Kanaafiis waan Rabbi walitti tokkeeyse, namni gargar hin baasin!” isaaniin jedhe.
[10] Mana keeysatti ammaas barattoonni waa'ee dubbii tanaa ti isa gaafatan.
[11] Inni ammoo, “Eenyu illeen niitii isaa baasee tan biraa yoo fuudhe, isii irratti zinaa godha;
[12] isiiniis dhiirsa isii hiiytee dhiira biratti yoo heerumte, ni ejjiti” isaaniin jedhe.
[13] Yesuus harka akka isaan irra kaayuuf jarri tokko daa'imman isaatti fidan; barattoonni isaa ammoo oofanii ti isaan dhoorkan.
[14] Yesuus ammoo hogguu tana arke aaree, barattoota isaa tiin, “Dhiisaa! Daa'imman gara kiyya haa dhufanii, hin dhoorkinaa! Mootummaan Rabbii tan warra akka isaanii ti taati.
[15] Ani dhugumaan isinitti hima, eenyu illeen Mootummaa Rabbii, akka daa'imni fudhatutti kan hin fudhanne, gonkumaa itti hin seenu” jedhe.
[16] Daa'imman ifitti qabee, harka mataa isaanii irra kaayee ti isaan eeybise.
[17] Yesuus amnaaf karaa irra buunaan, namtichi tokko gara isaa fiigee ti, fuula isaa duratti jilbiifatee, “Yaa barsiisaa gaarii! Jireenya bara baraa dhaaluuf maal godhuu tu ana irra jira?” jedhee ti gaafate.
[18] Yesuus ammoo, “Maaliif gaarii naan jetta? Rabbii tokkicha malee, namni biraa gaariin tokko illeen hin jiru.
[19] Heerri, ‘Hin ajjeesin, hin ejjin, zinaa hin godhin, hin hatin, kijibaan nama irratti ragaa hin bahin, gowwoomsaa dhaan hin fudhatin, abbaa kee tii fi haadha tee tiif ulfina kanni!’ akka jedhu ni beeyta” jedheeni.
[20] Namtichi ammoo deebisee, “Yaa barsiisaa! Kana hundumaa huu, ijoollummaa kiyya irraa jalqabee raawwadhee tiin jira” jedheeni.
[21] Yesuus isa laalee ti jaalatee, “Waa takkaa tu si irraa irrata. Deemii, waan qabdu hundumaa gurgurii tii, warra deegaaf kanni, samii irratti badhaadhinni walitti siif qabama; san booddee koottuu tii ana duukaa bu'i!” jedheeni.
[22] Namtichi hogguu tana dhagaye, taajira diittaa waan tureef jecha, fuulli isa dottaattaatee, nahee ti achii deeme.
[23] Hogguus Yesuus, naannawa isaa millatee ti barattoota isaa tiin, “Warra taajirootaaf Mootummaa Rabbii seenuun heddu rakkoo dha!” jedheeni.
[24] Barattoonni isaa, jecha isaa kana ni ajaa'iban. Yesuus ammoo ammaas deebisee, “Joolle! [Warra taajiroota qabeenya isaanitti if amananiif] Mootummaa Rabbii seenuun isaaniif akkam rakkoo dha!
[25] Taajirri tokko Mootummaa Rabbii seenuu irra, gaalli qaawa lilmee keeysaan hulluuquu tu irra sablata” jedhe.
[26] Tuniis hedduu dha isaan ajaa'ibsifte, “Akkana taanaan eenyuu tu najaa-bahuu dandaya ree?” waliin jedhan.
[27] Yesuus ammoo isaan laalaa, “Tun namaaf hin dandayamtu, ammoo Rabbi hin dhibdu; Rabbi waan hundumaa ni dandaya” jedheeni.
[28] Phexiroos as irratti, “Kunoo nuti waan hundumaa dhiifnee si duukaa buunee ti jirra” jedheeni.
[29] Yesuus ammoo deebisee, “Dhugumaan isinitti hima, eenyu illeen mana yookiin obboleeyyan dhiiraa yookiin obboleeyyan dhalaa yookiin haadha, yookiin abbaa, yookiin joollee, yookiin araddaa isaa anaa fi Wangeelaaf jecha kan dhiise,
[30] bara jireenya isaa keeysatti reebamuun irra geeysu illee, manneen, obboleeyyan dhiiraa, obboleeyyan dhalaa, haawwan, joollee, araddaas dachaa dhibba ni arkata, bara dhufuttiis jireenya bara baraatti ni gala.
[31] Ammoo warra duraa kan tahan keeysaa, hedduun warra booddee tahuuf taa'u, warri booddee tiis dura tahu” jedhe.
[32] Isaan Yerusaaleem dhaquuf karaa seenan, Yesuus isaan dura deema ture. Barattoonni ni rifatan, warri isaan duukaa bu'aniis sodaachaa ti deemu turan. Inni warra kudha lamaan ammaas kophaatti achi baasee ti, waan isatti dhufuuf deemu isaanitti himuuu jalqabe;
[33] “Kunoo Yerusaaleemitti ol bahuu keenya! Ilmi Namaa luboota warra angafootatti, barsiisota seeraatti tiis dabarfamee ni kannama; isaan ammoo du'a itti muranii, warra qomoo Israa'el hin tahinitti dabarsanii ti isa kannu;
[34] jarri itti ni hanjamu, itti ni tufu, ni tumu, ni ajjeesuus; inni ammoo guyyaa sadih booddee du'aa ni ka'a” jedheeni.
[35] Yaaqoobii fi Yohannis ilmaan Zabdewos Yesuusitti dhihaatanii ti, “Yaa barsiisaa! Waanuma Si kadhannu akka nuuf gootu barbaanna” jedhaniin.
[36] Inni ammoo, “Maal akkaan isiniif godhu barbaaddan?” isaaniin jedhe.
[37] Hogguus isaan deebisanii, “Durrii ulfina kee tii irra teeysee, nu tokko mirga kee tiin, kaan bitaa kee tiin akka teenyu nuuf kanni!” jedhaniin.
[38] Yesuus ammoo, “Waan kadhattanuu hin beeytan! Geebaan ani dhugu isin dhuguu ni dandeeysanii? Cuuphaan ani cuuphamuus isin cuuphamuu ni dandeeysuu?” isaaniin jedhe.
[39] Isaan ammoo, “Eeyye ni dandeenya” jedhaniin. Yesuus ammoo, “Geebaan ani dhugu, isiniis dhuguuf jiraattu, cuuphaan ani cuuphamuus isiniis cuuphamuuf deemtu.
[40] Haa tahuu malee, mirga kiyyaan yookiin bitaa kiyyaan taa'uu, kan kannu anaa miti; bakki kanneen warra qopheeyfamaniif tahu” isaaniin jedhe.
[41] Barattoonni hafan kurnan, hogguu waa'ee tanaa dhagayan, Yaaqoobii fi Yohannisitti aarutti ka'an.
[42] Hogguus Yesuus ifitti isaan yaamee ti, “Warri saboota addunyaa irraa bulchan, gooftummaa dhaan akka isaan cunqursan isinuu ni beeytu; hooggantoonni gurguddoon isaanii tiis aangoo qaban, isaan irratti agarsiisu.
[43] Isin jiddutti ammoo akkas hin tahu; eenyu illeen isin keeysaa guddaa tahuu kan barbaadu, kaadamaa keeysan tahuu tu isa irra jira.
[44] Eenyu illeen isin keeysaa, kan dura tahuu barbaadu, hundumaaf gabricha tahuu tu isa irra jira.
[45] Ilmi Namaa illeen kaadamamuuf hin dhufne, namoota kaadamuu fi lubbuu isaa tiin namoota hedduu najaa baasuuf dhufe malee” jedheeni.
[46] Eegas Yerikoo dha dhufan. Hogguu Yesuus barattoota isaa tii fi namoota dila wajjiin Yerikoo dhaa bahee deemuuf ka'e, Barximeewos ilmi Ximeewos, dhoorto kadhattuun jaamaan tokko, karaa cinaa dha taa'a ture.
[47] Yesuus nama Naazireet tahuu isaa hogguu dhagaye, iyyee, “Yaa Yesuus! Ilma Daawwid na maari!” jedhe.
[48] Namoonni hedduun isa callisiisuuf oofan; inni ammoo daranuu iyyaa, “Yaa Ilma Daawwid, na maari!” jedhe.
[49] Hogguus Yesuus dhaabbatee ti, “As yaamaa!” jedhe. Isaaniis namticha jaamaa san yaamanii, “Jabaadhuu, ka'i! Si yaamaa!” jedhaniin.
[50] Hogguus inni huccuu isaa if irraa darbee, utaalee ka'ee ti, gara Yesuus dhufe.
[51] Yesuus ammoo, “Maal akkaan siif godhu barbaadda?” jedheeni. Namtichi jaamaaniis deebisee, “Ani arkuu dhaan barbaada yaa barsiisaa!” jedheeni.
[52] Yesuus ammoo, “Karaa kee bu'i, amantiin tee si fayyifte!” jedheeni. Hogguusuma ijji isaa banamteefi, inni niis Yesuus duukaa dha bu'e.