[1] Yesuus garba bishaanii cinatti ammaas barsiisuu jalqabe. Ummanni danuun isa biratti walitti qabamee waan tureef jecha, Yesuus doonii takka seenee ti, bishaan irra achi hiiyfatee, barsiisuuf taa'e; hogguus namoonni hundinuu qarqara garba bishaanii ti turan.
[2] Yesuus barsiisa isaa keeysatti fakkeenya adda addaa tiin, waan hedduu dha isaan barsiise.
[3] “Dhaggeeyfadhaa! Namtichi tokko shanyii facaasuuf bahe.
[4] Inni odoo facaasuu hangi tokko karaa cinaa bubuunaan, shimbirroon dhufanii funaananii ti nyaatan.
[5] Kaan ammoo lafa dhagaa, tan biyyee hedduu hin qabne irra bu'an; lafti isaan irra bu'an biyyee gadi fagoo waan hin qabneef jecha dafanii ti biqilan.
[6] Ammoo hogguu aduun itti baate ni xoollaqan, hidda gadi fagoo waan hin godhatiniif ni goggogan.
[7] Kaan qoree keeysa bu'an; qoreen gurguddatee ti isaan hudhan; isaaniis firii hin godhanne.
[8] Shanyiin taan ammoo biyyee gaarii keeysa bu'an; biqilanii, guddatanii ti, midhaan godhatan. Firiin isaanii hangi tokko dachaa soddoma, warri kaan dachaa jahaatama, kaaniis dachaa dhibba tahe!” jedhe.
[9] Itti dabalee tiis, “Gurra dhagayuun namni qabu haa dhaggeeyfatu!” jedhe.
[10] Hogguu Yesuus kophaa tahe, warri isa bira turan barattoota kudha lamaanii wajjiin waa'ee fakkeenya kanaa ti isa gaafatan.
[11] Yesuus deebisee ti, “Hiccitiin Mootummaa Rabbii, isiniif kannamtee ti jirti; warra ala jiraniif ammoo kun hundinuu fakkeenyaan itti himama.
[12] Oduma ilaalanii akka hin agarreef, oduma dhagayanii tiis akka hin hubanneef, gara Rabbitti akka hin deebineef, diliin isaanii tiis akka isaaniif oomfii hin godhamneef, fakkeenyaan kannama” isaaniin jedhe.
[13] Yesuus itti furee, “Fakkeenyi kun isiniif hin gallee? Eegasuu akkamitti fakkeenyuma kaanuu hubattu ree?
[14] Inni facaasu, shanyii Qoowlii Rabbii ti facaasa.
[15] Karaa cinaan, fakkeenya warra hogguma Qoowliin Rabbii facaafamtu dhagayanii, hogguusuma Sheeyxaanni dhufee, qoowlii qalbii isaanii keeysatti facaafamte san jalaa fuudhuu ti.
[16] Lafti dhagaa tiis, fakkeenya warra qoowlicha wayta dhagayan san hogguusuma gammachuu dhaan fudhatanii ti.
[17] Isaan kun akka unkura hidda gadi fagoo waan hin qabneef, hanguma xiqqa dhaabbatu; eegas booda ammoo, sababa qoowlichaa tiif rakkinni yookiin reebamuun hogguu dhufu, dafanii ti gufatu.
[18] Ammaas warri kaan, fakkeenya shanyii qoree keeysatti facaafamtee ti; kanneen warra qoowlicha dhagayanii ti;
[19] ammoo cinqiin addunyaa irraa, kajeellaan taajirummaa sobaa tii fi kajeellaan diraa tiis itti seenanii, qoowlicha huunaan, firii odoo hin godhatin hafe.
[20] Lafti gaariin ammoo, fakkeenya warra qoowlicha caqasanii, fudhatanii ti, hangi tokko dachaa soddoma, kaan dachaa jahaatama, kaaniis dachaa dhibba firii godhatan” isaaniin jedhe.
[21] Yesuus ammaas, “Ibsaa fidanii taguuga jala, yookiin siree jala ni kaayanii? Akkasii mannaa ibsaan madabaa irra kaayamaa mitii ree?
[22] Wanni dhooyfame tokko ifatti bahuun isaa hin hafu; wanti dhooysaniis zaahir bahuuf deemti.
[23] Namni gurra dhagayuun qabu haa dhaggeeyfatu!” isaaniin jedhe.
[24] Yesuus itti furee tiis, “Waan dhageeysan qalbiin dhaggeeyfadhaa! Meeshuma namaaf ittiin saffartaniin isiniifiis saffarama, inumaa tuu irra caalatti isiniif kannama.
[25] Nama waa qabuuf itti dabalamee ti kannamaaf, kan waa hin qabne ammoo, hanguma silaa qabuu huu irraa fudhatama” isaaniin jedhe.
[26] Yesuus itti furee, “Mootummaan Rabbii akka nama ooyruu isaa shanyii facaafatee ti.
[27] Namtichi halkan rafeetuma guyyaa ka'a; shanyiin ammoo odoo inni hin beekin biqiltee ti guddattiis.
[28] Lafti, ifumaan biqilchitee ti midhaan itti gooti; dura somayyoo, itti aansee ukoo, booddees ukoo keeysatti firii guutu godhachiifti.
[29] Midhaan eega bilchaate ammoo, wayti oomishaa waan gaheef, hogguusuma haamtuu itti erga” jedhe.
[30] Yesuus amma ammoo, “Mootummaan Rabbii maal fakkaatti haa jennu? Yookiin isiif fakkeenya maal haa kanninu?
[31] Isiin akka firii zanaabii ti; hogguu lafatti facaasan, firiin isii shanyii hundumaa irra xiqqaatti.
[32] Isiin hogguu facaasan, biqiltee ti guddatti, biqila hadhoora keeysaa hundumaa irra tan caaltu taatee, damee gurguddaa ni baafatti. Shimbirroon dhufanii ti, gaaddisa damee isii jalatti goojoo ijaarratu” jedhe.
[33] Yesuus fakkiilee hedduu kanneen fakkaataniin hanga isaan hubachuu dandayan takkatti qoowlicha isaanitti hime.
[34] Inni fakkeenyaan malee isaanitti hin dubbanne, kophatti ammoo, waan hundumaa barattoota isaa tiif ni hiike.
[35] Yesuus guyyuma san galgala barattoota isaa tiin, “Koottaa mee, garba bishaanii kana gama haa ceenuu!” jedheeni.
[36] Barattoonni isaa namoota achi turan achumatti dhiisanii ti, akkuma inni doonii keeysa jirutti Yesuus fuudhanii ti deeman; ammaas dooniiwwan biraa tiis isaa wajjiin turan.
[37] Hogguus bubbeen jabduun bubbisaa ti dhufte; bishaan wal darbee doonicha dhawee, bishaaniin guututti ka'e.
[38] Yesuus ammoo doonicha keeysa gara duubaa tiin waa boraafatee ni rafa ture. Barattoonni isaa isa dammaqsanii ti, “Yaa barsiisaa! Hogguu nuti dhumnu caluma jettaa?” jedhaniin.
[39] Yesuus ol ka'ee ti, bubbee oofaa irra babaasee, bishaan wal darbuuniis, “Cal jedhi, adaba godhi!” jedheeni. As irratti bubbeen dhaabbannaan, nagayni guddaan sabate.
[40] Kana booddee barattoota isaa tiin, “Maaliif akkanatti sodaattan? Amma illee amantii hin qabdanii?” jedheeni.
[41] Isaan ammoo baaragaan, “Namni kun eenyu? Bubbeenii fi bishaan illeen isaaf ni ajajamu” waliin jedhan.